2 Dimoteo 3 - NEAJEEDA EESH BEA BUUNEESSEAN

Eawoojiga huydean

¹ Ak ginali ng'asheanji gideaba eawoojiga huydean gay gwanda washta.

² Aba gideaba buuneeda gaygaba nii bwariiy geaw, ak gaygaba siisi bwariiy lappiya, gaba nii ghwargeaw ea gea weashweashta ea gea ging'weakka ea fuga mwamwasa ng'asheega jilnoodiga nyaawa ea gea mandeawana badischooda ea gea miimiyaas.

³ fuga magasa fukgheanyaawa ea gea magasa gidupcheeda ea gea naba ng'uyyeega ea gea mwamu ghwadeal geat ea gea ng'weani ea gea mwabariinya ng'asheega miyaas,

⁴ ea gea leapageatbwadaw ea fuga hang'oonyi iheen, ea gea gwarageat, ea gea bwariy mittagheasta muunda ng'eanyiida nea mwasamwa ghabwariiy Aseetta.

⁵ Inyeesa gawuurji gili bada Aseetta ak ghaheawa uurdaanyi ang'aamwana geaw fiisu.

⁶ Aba gideaba aba jeedeaba suu gwanda headiga ama inyeesa gaweay jeesinga gealga buuneeda ak gageanda nea ghwasareanda gadeemga dasheahi mideawa sareenda ring'eeda nea gagis mittagheasta muunda ng'eanyiida.

⁷ Gadeemsu inyeesa gagasa nalooda ng'asheega galagasean ak eamwamu eara hay nalooda humeanda.

⁸ Nii gawuurji gidaghayi heawaatta geaba Yaane ea Yambure ng'asheega Muusa ak eara fiisu ghaheawa humeandida ak suu ea fuga nidatasa fughareenga nyaawa gil, ak ea siheawa aba ng'asheega masaweega.

⁹ Ak ea mayghang'atta mwaadi muuchchi aba gideaba leendeenyaawa gayghwadaajiiti aba heeda buuneessean, gawuurji gittajiitta leendeedeaba fiisu.

Ng'asheega huydean

¹⁰ Ak ang'iing'i ea niyaadi geeshta ginealshoodeanyu ea gideabadiiniidi ea gideagasiidi ea masaweega ea milighteayda,

¹¹ ea bariinyeega ea milighteada ea sawanaduutkeasu bea ng'asheega ghayi anyaschi aba ng'eanyiida Andogiya nea Igunio ea Listra, bea haleanoojiga sawanaduutka ea milighteaysi ak gwalealneani Ng'uttamiida aba suuh seaniin.

¹² Huumwa gil siida wassean iigasa giibinda ea baditta Gristo Yeesu gayghwanyas sawanadeeda.

¹³ Ak fuga munyasearooji ea gea ng'uyyeega gayghang'atta mwadi ak ghwaranya buuneeda nea eara saawa geereengani.

¹⁴ Asi ang'iing'i abiidana jeeda ng'asheega ghayi sinaalnyi nea geesikteawean aba gideaba ginali gideaba geabeang'a guil gea ghayi anaalanyi.

¹⁵ Aba gideaba ghang'eada jeepcheandumeeda ninali ng'ooruutka ghaydidi jea ghwanung nyasa weaghuumeeda ea nyasa lealeanooda aba naweeda Gristo Yeesu aba masaweega.

¹⁶ Giliwas ng'ooruut mideawa Yeammeeda Aseetta ghwahit aba ginealshooda ea rekkusinda buuneeda aba gidinyeannyeekka nyaawa ea gidoobiiwda nea ghwanyas ghoorjooda doobiiwaat.

¹⁷ Abeeda aahidaat siida gadiyeeda Aseetta nea sinung ghwahit ak gwasin giliwas gadiyeeda miy.