2 Dimoteo 1 - NEAJEEDA EESH BEA BUUNEESSEAN

¹ Aniini Baulo ghawooschi gijasoocheanda Gristo Yeesu aba gidagasiida Aseetta appadayda heelleeda eaweega mida jeeda Gristo Yeesu,

² Ea Dimotteo balleandeanyu abwariinyi. Dagheerjeandumeeda dahinna headaang'u, ea baydeayda ea hoyyoo leabu heeda Aseetta was Bwaabwa ea heeda Gristoyda was Ng'uttamiideanya.

Badiischooda ea ng'asheega gimajeekta

³ Geabadischeesi Aseetta eabadayi aba guroorooda miy ghan'geada damandida bea gweargweasuun inyeesa ghaapkaacheeyi galaagasean aba jeeda mooshteanyu bea ghawooda eawa ea askweari.

⁴ Ak geagasayi muuchchi deaktaang'u, iyaapkaachi dabeakkaagu ak abeeda ghaanyaschi hooseaneega.

⁵ Iyaapkaachi masaweega indeawi manda gimminnoodeaba geaw ghayi bean gwandeawa ghamageamadu suguura Loisi, ea geamadu wa Eunike ak ghanali gideaba eara ang'iing'i gindeawi.

⁶ Ak aba seareeni geapkeaneey gideaba aseawsiina ghwaahaada giimuusta goonyi Aseetta mida jeedang'u aba damanda ghayi ayiini geattingeasu uhuudaang'uuni.

⁷ Aba gideaba Aseetta magooneasa guroorooda giyoonda, gagooneasa dea uurda bea barinyeega ea jeeda mideawa deascheeda.

⁸ Adibwaspwasi aba muwunooda badayda Ng'uttamiideanya ak eara aniineani eandi ghealooniga appadaydaanyiin adibaspasseeweani, asi milighteaysiina ng'asheega munyasiin sea aniini appadayda Giijasta Miy aba uurda Aseetta.

⁹ dea ghayi lealneasa ak gaguurneasa aba guurnooda ghaydit nea nii ea mabaysiina aba gissisinyi aseasa ak nii gabaysa ninyi ea dagheerjeandumeedaanyi. Dagheerjeandumeani geegooneasa aba naweeda Gristo Yeesu nea miyeebwat ng'eanyiida.

¹⁰ Ak ghamneawa dagheerjeandumeani geataajiit aba hinnooda lealnoocheandeanya was Gristo Yeesu Ninyi nijoar miyeeda, ak ghwadaajiiti eaweega mayghwadatasa aba giijasta miy,

¹¹ appadaydeaba ng'asheesu geayiinan doaw ginealshoocheanda ea gijasoocheanda darukwiida giijasta miy.

¹² Ak aniini ghaanyaschi sawanadeeda appadaydeaba ng'asheesu ak geawoschi hidaat aba gideaba ghaanali ninyi dea amwaschi ak ghaanali gideaba ghwoamu gafur giita ghayi goonaniini bwak ea ghwahitta damandida.

¹³ Ang'ng'waanya gidahiimu ng'asheega mideawa eaweega ghayi iyiing'si heedeanyu, aba masaweega ea bariinyeega mida jeeda Gristo Yeesu.

¹⁴ Fura diita miy ghayi siteaganeeyiin aba naweeda Gurorooda Ghaydit mida jeedeanyean.

¹⁵ Ang'iing'i ginali gidaghayi nungsiindanean heeda fuga ng'eanyiida Asiya eara geaba gwanda jeeda eara geaba Figelo ea Hermogene.

¹⁶ Gagasa ghwoadaw Ng'uttamiida baydeada fukghea Onesiforo aba gideaba inyeesa imiighoaw gil goomajeegan nea mwabwaspwasa aba ghealoonigeasu.

¹⁷ Inyeesha iihidu hiji bea Ruumiin gagasean muuchi ea ghwanyasan.

¹⁸ Ang'iing'i ginali muuchi gidaghayi deawiitta aba ngeanyiida Efeso appadaydeanyu. Gagasa ghweadaw Ng'uttamiida eaweedida.