2 Desaloniikke 3 - NEAJEEDA EESH BEA BUUNEESSEAN

Amwasha Aseetta appadahuukkaasa

¹ Asi huydeanda fuga eaduupcheewi, amwaasha Aseetta appadahuukkaasa, ak abeeda gawa ng'asheanda Ng'uttamiida mwadi aba hooseaneega, gawuurji giduurji aba heedeang'wa,

² ak gelealnaneasa heeda fuga mii dobiiweadi, munyas; aba gideaba mii sean gil gea mideawa masaweega.

³ Iiduw Ng'uttamiida ea doabiiwaat; jea gomajeegideegwa nea ghoahaghwaneegwa aba diitta muyiin.

⁴ Amaduw earaseasa ea sughuschi Ng'uttamiida appadahuukkeagwa, nea gideaba goosinnyi ng'asheega ghayi surukuneegwa, ea gideaba gajasna ng'asheega sugoonnyeegwa aba digheanda.

⁵ Gagasa ghoadoabiiw Ng'uttamiida guroruunatkeagwa ak ghoanyaschi bariinyeega Aseetta, nea ghoamilikghti aba Gristo.

Gidamiisa eesinda gadiyeeda

⁶ Fuga eaduupcheewi, geegoonnyeegwa digheanda, aba gheawunga Ng'uttamiida was Yeesu Gristo, ohhelleewana geat oorjeedagiyeang'wa wassean bea ghaleahu nea masna ng'asheega ghayi sing'ng'waanyaan heedeanya.

⁷ Ak ghoanalli agooga gidamiisiindaneegwa gideaba gajootteascheewana geat, ak ea meebeahi ghaleahu damanda sindeayeewi sea agooga,

⁸ nea ghanyea miyeayaaga mukkatteeheemba siida wassean nea meashaahi, geaghus aba sawanadeeda ea deawiitmeeda nea geesinnyi gadiyeeda eawa ea askweari, ak abeeda ea meesawani siida wassean aba jeedeang'wa.

⁹ Nea meakna gideaba meendeawani uurda gil, geebaysiini gideaba geegasayi ghoaw searoojigaasa gichchea agalana ak gotteascheewi.

¹⁰ Aba gideaba earaba damandida ghayi sindeayeewiin, gegoonnyeegwa digheanji, “Gideaba siida iimagassa gwasin gadiyeeda abeeda ea adagweagiischi.”

¹¹ Aba gideaba siyiinyi gwanda jeedeang'wa fuga ghaleehooda, iissa ghasa geat ng'asheega buuneeda, nea goodeawiit buuneeda suurja.

¹² Asi ghamneawa gajeattawa fiisu digheanda nea geamiinnyi gheang'da aba naweeda Ng'uttamiida was Yeesu Gristo dasna gadiyoojiga nyaawa nea ghwasiinda ak ghwanyas hamitta nyaawa jea ghwaak.

¹³ Asi fuga eaduupcheewi, adoalagaannyi aba sinooda ng'asheega miyaas.

¹⁴ Ama deeppa gwanda siida wassean heawa gwasissa mureeda ng'asheandeanya surgu aba jeedeaba barawajeanji, abeeda orroora siisi, nea adiiduw goppaloolli, ak abeeda ghabwaspwas.

¹⁵ Ak ea doanung' ghoaw weajoochcheanda, areekusiinda gheang'da oorjeeda giyeang'wa.

Ng'asheega huydean

¹⁶ Asi ghamneawa gagasa gagooneegwa weayda Ng'uttamiida ninyeeda mideawa weayda galeagasean aba naweadinga sean. Gagasa gobiida Ng'uttamiida heedeang'wa oagasean.

¹⁷ Aniini, Baulo, ghang'waarji giighadi aba geattindeanyu. Nii girooraneeda gil aba giliwas barawajeandeanyu; nii gideang'oorriidi.

¹⁸ Gagasa anyasa dagheerjeandumeeda Ng'uttamiideanya was Yeesu Gristo oagasean.