Biblia Todo Logo
Bìoball air-loidhne

- Sanasan -

2 Desaloniikke 2 - NEAJEEDA EESH BEA BUUNEESSEAN


Gitta muyiin

1 Asi ghamneawa aba iitta hinnooda Ng'uttamiideanya was Yeesu Gristo ea bassiinda jea eabwada geat ak gendeawi niny, geemuscheegwa, fuga eaduupcheewi,

2 ak ea adagabay gwaduumduum fughareengeagwa ghana adeawiida, aba gurorooda ghana ng'asheanda, ghana aba barawajeanda sighay gwaleabu heedeanya, ahiimu gideaba eaweeda Ng'uttamiida nihidu.

3 Asi adagwareenganneegwa sih aba gidawassean; aba gideaba eaweettida mayghwahidu, ea ghanyi gooshoohu mwadi heheeweega, ak abeeda geattahaach siitta was roodaneeda, was balleanda roodaweegean,

4 diida heewachchiin ak goodiing'ng'u geaw appadayda giliwassean sugurriideawa aseetta ghana gilinyoo eebada, ea eeyi bwak ea gageanu horgeadaannyi aba jeeda gheeda sibatta Aseetta, ak ghoahiimu geaw gideaba niny Aseetta.

5 Moapkaadi damanda ghayi sindeayeewi sea agooga nearukuneegwa ng'asheesu?

6 Ak ghamneawa ghoanalli gidadeal niny, abeeda geattahaach aba damandaannyi.

7 Aba gideaba makcheameetta bea heheweega deaweedean ghamneawa gagadiiyi; ak ghamneawa gwanda siida adeal, gaygwasindunu ea eeghus ea sigeanda aba jeennaweeda.

8 Abeeda diitta mandeawana deaweedean gajeattahaach, ak abeeda gaygwanuus Ng'uttamiida was Yeesu aba aroosta ghuuttaannyi ak gwanyarja niny aba deaktaannyi ea hinnoadaannyi.

9 Aba hinnooda dea mandeawana deaweeda aba gadiyeeda Shattaani gaygwandeawa uurda sean nea gwandeawa gwadeagwajeega ea deamdeamanga,

10 ea ng'uyyeega sean munyas aba heeda fuga jea gameewa, aba gideaba saawa mwamwasa bariinyeega, ak abeeda ghwanyas lealeanooda.

11 Ghoaw gidanung'waadawa Aseetta gobiideewa jeeda uurda roodaweega, ak ghwanung' ghamwas ng'uyyeega,

12 ak abeeda gergweaksa sean giikka mwamwasa huumeandean ak goohoosan geat aba jeeda ng'asheega munyasiin.


Gealoadeagwa ak ghoanyaschi lealeanooda

13 Iiduw gammiiseasa aseasa gideaba gajeebadiischeesiina Aseetta galeagasean appadahuukkeagwa, fuga eaduupcheewi bwariiy Ng'uttamiida, aba gideaba ghayi nibay ghwaloadeagwa Aseetta ghang'eada mwadi ak ghoanyaschi lealeanooda, aba gimmiinooda jea ghoammiinneegwa Gurorooda, ak ghoamwaschi huumeanda.

14 Aba nii ghayi guurnaneegwa aba naweeda giijasteanya miy, ak abeeda ghoanyaschi gigheambiitta Ng'uttamiideanya was Yeesu Gristo.

15 Asi, fuga eaduupcheewi, amiinaada nea gommajeekchi geat, ak ghoang'ng'waanyi ng'asheekka ghayi sinnalleagwean, gaba ng'asheega ghana gaba barawajeanda.

16 Nea abeeda Ng'uttamiideanya was Yeesu Gristo niny, ea Aseetta was Ghweandeanya, ghayi bwariinyeasa ak gageandeawaneasa salgheang'da ea ghoaw eaweega mammuudeana ea gidamiy sirarji aba jeeda dagheerjeandumeeda,

17 ak gageandeawa guroruunatkeagwa salgheang'da, nea gomajeegideegwa aba giliwas gadiyeeda miy ea ng'asheanda.

Datooga New Testament © Bible Society of Tanzania, 2009. 

Bible Society of Tanzania
Lean sinn:



Sanasan