1 Yohaana 5 - NEAJEEDA EESH BEA BUUNEESSEAN

Jooriischoodeanya appadayda ng'eanyiida

¹ Siida wassean mwas gideaba Yeesu niny Gristo gil siisi jeepta Aseetta, siida wassean bwariiy ghwaan ea ghaamwat ghabwariiy jeepta.

² Aba seareani geanalli gideaba geabwariinyi diibiga Aseetta, isubwariinyi Aseetta nea geang'ng'waanyi digheannyeekkaschi.

³ Aba gideaba nii bariinyeega Aseetta, nea gideaba geesissi mureeda digheannyeakkaaschi. Nea digheannyeakkaaschi ea miidurumani.

⁴ Aba gideaba gissijiila Aseetta iissa ghwajoar ng'eanyiida; nea nii ea jooriischchooda joar ng'eanyiida gil, nea masaweagaasa.

⁵ Anneeda dea joar ng'eanyiida geaghus iimii dea was gideaba Yeesu Balleanda Aseetta?

⁶ Nii deaghayi wuna beega gil ea foojeanda, Yeesu Gristo, ak ea meakghusa beega akghwahit ghoana beega ea foojeanda.

⁷ Ak Gurorooda ea deamuuwwu gil, aba gideaba Gurorooda huumeanda gil.

⁸ Gwanda mushoodi samwagu, Gurorooda gil, ea beega ea foojeanda; assuh assamwaguun ghamwas geat.

⁹ Iisumwaschi muuwwuunoona buuneeda, abeeda muuwwuunoona Aseetta aahaw muuchchi; aba gideaba nii muuwwuunoona Aseetta gil gideaba nimuwwu iitta Balleandaannyi.

¹⁰ Siida mwas Balleanda Aseetta gwandeawa muuwwuunoadaannyi aba jeadaannyi. Nea deamwamwasa Aseetta ghwanung' gaba ng'uyya, aba gideaba mwamwasa muuwwuunoona Aseetta appadayda Balleandaannyi.

¹¹ Ak nea nii ea muuwwuunooda gil, bea gideaba, Aseetta gagoaneasa eaweega manda mudeanooda, ak eaweesu gwanda jeeda Balleandaannyi.

¹² Siida mideawa Balleanda gwandeawa eaweega; nea dea mandeawana Balleanda Aseetta ea mandeawana eaweega.

Eaweega manda mudeanooda

¹³ Geang'oorneegwa ng'asheesu agoogeeni mwas gheawunga Balleanda Aseettean, ak abeeda ghoanalli gideaba goondeawi eaweega manda mudeanooda.

¹⁴ Annih ea gidaararji gil aba headaannyi, gideaba iisumuschi gil aba gidagassiida niny gayghwayiinyeasa.

¹⁵ Ak isinalli gideaba gayghwayiinyeasa aba giliwas sean sumwaashchi, geanalli gideaba gajeanyasa haleanjeetta sigasayiin.

¹⁶ Siida wassean idaa oorjeeda ghaamwat nea gwasin riing'eeda maba miyeeda, abeeda damwaasha ghawooda, ak gayghoadaw Aseetta eaweega appadahuukkeaba suu sina riing'eega maba miyeedean. Gwanda riing'eeda was dea miyeeda; meayeeni gayghamwaash Aseetta appadaydeaba nii.

¹⁷ Gidawassean mwadoabiiwa riing'eeda gil, ak gwanda riing'eeda mawosa dea miyeeda.

¹⁸ Geanalli gideaba giliwas Balleanda Aseetta maygwasin riing'eeda, ak Balleanda Aseetta gaygafurgeaw, ak eara diitta muyiin ea mayghwasat.

¹⁹ Aseasa geanalli gideaba geebeayi Aseetta, ak ng'eanyiissean goombal diitta muyiin.

²⁰ Ak aseasa geanalli gideaba Balleanda Aseetta goolla ghwahidu, ak gagoaneasa fughareeda eanala ninnyeeda was huumwa; ak aseasa geendi jeadaannyi ninnyeeda was huumwa, aba jeeda Balleandaannyi was Yeesu Gristo. Nii dea was Aseetta huumwa gil, ea eaweega manda mudeanooda.

²¹ Diibiga manang'i, afrageat aba duguuga sinung' ghoaw aseechcheekka.