1 Yohaana 4 - NEAJEEDA EESH BEA BUUNEESSEAN

Gurorooda huumwa ea dea ng'uyyeega

¹ Fuga abwariinnyi, adoamwaschi giliwas gurorooda, iissa ghoonyoo asma guroruunatsu ak ghoadaayi ea gaba Aseetta; aba gideaba nihidu jeeda ng'eanyiida sibanga saang'a bea ng'uyyeega.

² Aba nii abeeda gajanala Gurorooda Aseetta: gurorooda mwas gideaba Yeesu Gristo nuwu nea ghwaana saseeda gaba Aseetta,

³ nea guroorooda wassean mwamwasa Yeesu maba Aseetta. Nii gurorooda daheawa Gristohi, was deaghayi oayiinyi gideaba gayghwahidu, ak ghamneawa ea nigeawiit ghwahidu jeeda ng'eanyiida.

⁴ Diibiga manang'i, agooga goobeayi Aseetta, ak ea noajoarji saawa; aba gideaba dea mida jeedeang'wa ahaweawa dea mida jeeda ng'eanyiida.

⁵ Suu gaba ng'eanyiida, ak gabaloola ng'asheega ng'eanyiida, ak goleeysiit ng'eanyiida saawa.

⁶ Aseasa geebeayi Aseetta. Siida nal Aseetta gaygoleeyseasa iit, nea deamaba Aseetta ea maygoleeyseasa iit. Ak aba seareani gajeanala gurorooda huumwa ea gurorooda ramaseanda.

Aseetta bariinyeega gil

⁷ Oroogeasu abwariinnyi, ebariinya geat aba gideaba bariinyeega gwaleabu heeda Aseetta, ak giliwas sih mideawa bariinyeega gwajiilu Aseetta, ak ghwanal Aseetta.

⁸ Nea siida mandeawana bariinyeega ea miighwanal Aseetta aba gideaba Aseetta bariinyeega gil.

⁹ Aba seareani bariinyeega Aseetta geattajiit aba jeedeanya, gideaba Aseetta goojeagu Balleandaannyi was haghasheeda badayda ng'eanyiida, ak abeeda geanyaschi eaweega appadaydaannyi.

¹⁰ Nea nii ea bariinyeega, mii gideaba geabwariinyi aseesa Aseetta ghabwariinyeasa niny ak goojeagu Balleandaannyi ghoaw dea adayda leadeeda riing'eegaasa.

¹¹ Fugaabwariinnyi, iinukkwa ghabwariiyduneasa Aseetta, gammiisa gideaba gajeebariinya geat.

¹² Manda siida nidaa Aseetta; isubwariinyayi geat, abeeda Aseetta goobiida jeedeanya, ak bariinyeagaaschi ea niihit aba jeedeanya.

¹³ Abaa seareani geanalli gideaba geeppiidi jeadaannyi, ak eara niny gwanda jeedeanya, aba gideaba nugoaneasa Guroroadaannyi.

¹⁴ Ak aseasa asidaayi nea simuuwu gideaba Bwaabwa nijeagu Balleandaannyi ghoaw lealnoochcheanda ng'eanyiida.

¹⁵ Giliwas sih mwas gideaba Yeesu Balleanda Aseetta gil, abeeda Aseetta goobiida jeadaannyi nea goobiida niny jeeda Aseetta.

¹⁶ Aseasa geanalli ak geamwaschi Aseetta appadahuukkaasa. Aseetta bariinyeega gil, ak siida abiida jeeda bariinyeega, goobiida jeeda Aseetta, ak goobiida Aseetta jeadaannyi.

¹⁷ Aba jeedeaba bariinyeesu sihhiit aba heedeanya, ak geamwaschi aba eaweeda girgweaksiinda, aba gideaba giduurjeatta niny ea gissuwuurjeatti gil aba badaydeaba ng'eanyiini.

¹⁸ Aba jeeda bariinyeega manda muuwda, ak bariinyeega huumwa gaygageanda muuwda. Aba gideaba muuwda gwandeawa ghoorjooda, ak siida mideawa muuwda ea mii hidaat aba bariinyeega.

¹⁹ Aseasa geabwariinyi, aba gideaba goosheeda niny ghabwariinyeasa.

²⁰ Siida iyayi, “Ghabwariinnyi Aseetta,” nea ghwasit oorjeeda ghaamwat, abeeda siisi gabang'uyya; aba gideaba siida mwabwariinya oorjeeda ghaamwat nidaa, moammu ghabwariiy Aseetta miighwadaah.

²¹ Ak digheanji gagooneasa niny gideaba siida bwariiy Aseetta, dabwariinya eara oorjeeda ghaamwat.