1 Yohaana 3 - NEAJEEDA EESH BEA BUUNEESSEAN

Diibiga Aseetta

¹ Ang'ulla nii bariinyeega uurjiin gil gooneasa Ghweanda, bea gideaba egureewaneasa diibiga Aseetta, ak ea gidasuwuurjeewi gil. Ak abeeda ghoaw gidamwanalaneasa ng'eanyiida ak ea mwanala niny.

² Oorjooga abwariinnyi, asi ghamneawa suwoschi diibiga Aseetta; ak ea miighwadaajiit gichchea ewuurjeewana, ak geanalli gideaba ihidu gajeewuurjeewana niny, aba gideaba gajeadaaha giduurji.

³ Nea giliwas sih rar niny iissa ghoammiidu geaw gawuurji gidamiyda niny.

⁴ Siida wassean sina riing'eeda gwandeawa ramaseanda aba deaweeda; aba gideaba riing'eeda ramaseanda deaweeda gil.

⁵ Nea ghoanalli gideaba niny ghwaan gageanda riing'eega, nea niny jeadaannyi ea manda riing'eeda.

⁶ Manda siida mida jeadaannyi ak gwasin riing'eeda; ak ea manda siida sina riing'eeda jea ea nidaa niny ghana ghwanal niny.

⁷ Diibiga manang'i, adagwareenganneegwa sih; siida sina ng'asheega doobiiweadi gwandeawa doobiiwnatta, gawuurji gidamideayeatta doobiiwnatta.

⁸ Siida sina riing'eeda gaba meang'nyeandeenda; aba gideaba meang'nyeandeenda ghayi gollagabean gwasna riing'eeda. Gissibaysiina wunooda Balleanda Aseetta geattaajiit ghwadattas gadiyeeda meang'nyeandeenda.

⁹ Manda siida jiilu Aseetta ak gwasna riing'eeda; aba gideaba seareeda Aseetta gwanda jeadaannyi, ak ea maygwasin riing'eeda aba gideaba gwajiilu Aseetta.

¹⁰ Aba nii abeeda gajeadaah gideaba diibiga Aseetta akkeega gil, ak ea akkeega gil diibiga meang'nyeandeenda, aba gideaba dea masinna ng'asheega doobiiweadi maba Aseetta, ghana dea mwabwariinya oorjeeda ghaamwat.

¹¹ Aba gideaba nii giijasta ghayi oobean ayiinya ammwadi gil, gideaba abwariinnya geat,

¹² ak ea adoowuurjeewi Gain ghayi was siida muy ak gwanuus oorjeeda ghaamwat. Ak ghwasaan inyas gwanuus? Gweagu sinaweagaaschi munyas nea oorjeeda ghaamwat ea doabiiwaat.

¹³ Oorjoogiyya, adaghahameagwa ng'eanyi, aba gideaba ghwasteagwa ng'eanyiida.

¹⁴ Aseasa geanalli gideaba sisuuchchi miyeeda ak geeweayi jeeda eaweega, aba gideaba geabwariinyi fuga suduupcheewi. Nea damwabwariinya goobiida jeeda miyeeda.

¹⁵ Giliwas sih nyooghwasit oorjeeda ghaamwat abeeda gwanuusa buuneeda, ak agooga gonalli gideaba siida nuusa buuneeda mandeawana eaweega manda mudeanooda aba jeadaannyi.

¹⁶ Aba nii sinalli bariinyeega, aba gideaba niny gabeagu eaweagaaschi appadahuukkaasa; asi gammiiseasa earaseasa eebeakna eaweagaasa appadahuukka oorjoogiyya.

¹⁷ Nea siida iimideawa haleanjeeda ng'eanyiida ak ghwadaa oorjeeda ghaamwat nea gwanda gidagasa, ak ghaweada gida aba jeadaannyi, abeeda bariinyeega Aseetta gwandeattaan jeadaannyi?

¹⁸ Diibiga manang'i, adeabwariinyi aba gadiyeeda ghana baloolda gagasa eabwariinya aba sinooda ea huumeanda.

¹⁹ Aba nii gajeanala gideaba geebeayi huumeanda, ak geesikteawi aba jeesingaasa aba madeadaannyi

²⁰ iyargweakseasa jeesingaasa; aba gideaba Aseetta ahaweawa jeesingaasa, ak ghwanal haleanjeessean.

²¹ Fuga abwariinnyi, iimeargweakseasa gurooruunatkaasa, abeeda gendeawi gissirarji aba madeeda Aseetta;

²² ak iissa geenyaschi gidasumuschi, aba gideaba geang'ng'waanyi digheannyeekkaaschi nea geesinnyi gidabwariiy niny.

²³ Nea nii ea digheandaannyi gil, gideaba ea mwasa gheawunga Balleandaannyi wa Yeesu Gristo nea geebariinyayi geat, gawuurji gidagoondaneasa.

²⁴ Buuneessean ang'ng'waay digheannyeakkaaschi goobiitta jeadaannyi, nea goobiida niny jeannyaawa. Aba sareani abeeda geanalli gideaba goobiida jeedeanya, aba Gurorooda ghayi goaneasa.