1 Yohaana 2 - NEAJEEDA EESH BEA BUUNEESSEAN

Gristo dea jea ghaweadeasa gil

¹ Diibigeasu manang'i, geang'ooneegwa ng'asheesu ak abeeda ea moosni riing'eeda; ama mida siida nisin riing'eeda, abeeda gendeawi siida ghuutteanya aba heeda Bwaabwa nea Yeesu Gristoyda doabiiwaat gil;

² nea niny ea siida jea ghoadayda leadeeda riing'eagaasa, ak ea meakghusa gaasa akghwahit eara riing'eega muunda ng'eanyiissean.

³ Appdaydeaba nii abeeda geanalli gideaba geanalli niny, ising'ng'waanyi digheannyeekkaaschi.

⁴ Nea dea eena, “Ghaanalli ning” nea gafool digheannyeekkaaschi gabang'uyya, ak eara humeanda eamanda jeadaannyi;

⁵ nea siida ang'ng'waay ng'asheandaannyi, aba jeedeaba niny bariinyeega huumwa bea Aseetta nideay. Aba jeedeaba nii geanalli gideaba geendi jeadaannyi:

⁶ siida eena gwanda jeedeaba niny gammiisa gideaba gayghabeada gidabeada niny.

⁷ Fuga abwariinnyi, meang'oorneegwa digheandeesh, nii digheanda ghayi bea garayi ghayi oayiinyi ammwadiin gil; digheandeaba waas ng'asheanda ghayi oayiinyi.

⁸ Ak geang'oorneey digheandeesh bea huumwa aba jeadaannyi ea jeedeang'wa, aba gideaba misaneeda ning'atta ak ea niiboong'u weeshinda huumwa.

⁹ Siida eena geandi jeeda weeshinda, nea ghwasit oorjeeda ghaamwat gwanda jeeda misaneeda eara ghamneawa.

¹⁰ Nea siida bwariiy oorjeeda ghaamwat, siisi gwanda jeeda weeshinda, nea aba jeadaannyi eamanda ng'asheanda jeagweadu russooda.

¹¹ Nea siida sit oorjeeda ghaamwat gwanda jeeda misaneeda ak gwaneayeewa jeeda misaneeda ak ea mwanala heeda gal, aba gideaba nidukuta gheanyangaaschi misaneeda.

¹² Geang'oorneegwa agooga, diibiga manang'i, aba gideaba sisamsa riing'eegeagwa, appadaydaannyi.

¹³ Geang'oorneegwa agoogaa, ghweaniga, aba gideaba nonalli ninnyeeda ghayi bean ghang'eada ging'eetta. Geang'oorneegwa agooga, gheareemanga, aba gideaba noajoarji diitta muyiin. Geang'oorneegwa agooga, diibiga aba gideaba nonalli Ghweanda.

¹⁴ Neang'oorneegwa agooga ghweaniga, aba gideaba nonalli ninnyeeda ghayi bean ghang'eada ging'eetta. Neang'oorneegwa agooga gheareemanga, aba gideaba gondeawi uurda, nea goobiida ng'asheanda Aseetta jeedeang'wa, ak ea noattaraamnyi diitta muyiin.

¹⁵ Adoabwariinyi ng'eanyiida ea haleanjeeda mida muunda ng'eanyiida. Aba gideaba siida bwariiy ng'eanyiida, bariinyeekka bea Ghweandeen ea maygwanda jeadaannyi.

¹⁶ Aba gideaba haleanjeessean mida muunda ng'eanyiida, was haleanjeeda gasa saseeda ea haleanjeeda gasa gheanyanga ea ghwarjeeda eaweega, suu maleapna heeda Ghweanda, gwaleabu heeda ng'eanyiida.

¹⁷ Ak ng'eanyiida gayghang'atta sea ng'asheagaaschi bea geawunda gheang'da; nea deasina gidagassiida Aseetta gaygoobiida ea ghoaw damanda manda mudeanooda.

¹⁸ Diibiga, nii damanda huydeani; gawuurji gidaghayi oayiing'di bea gideaba gayghwahidu weajoochcheanda Gristo, ak eara ghamneawa ea goolla ghapka gea saang'a was weajoodiga Gristo; hean ghoaw gidasinali gideaba damanda huydeani.

¹⁹ Nea saawa ghabeawa heedeanya, ak ea maba meatkweedeanya; aba gideaba inyeeda gaba meatkweedeanya, gwachchi gaygoobiida heedeanya; hean ghang'eatng'eat gwaritta jarooda, ak ghwadaajiit gideaba maba sean meatkweedeanya.

²⁰ Ak agooga ea nimwareagwa dea ghaydit, ak ghoanalli oagasean.

²¹ Geang'oorneegwa nea meakna gideaba moanali humeanda gil, gweagu gideaba ghoanalli, ak ginali gideaba manda ng'uyyeega jea gwaleabu jeeda huumeanda.

²² Gaba ng'eaha ng'uyya geaghus dea shaang' gideaba Yeesu mii Gristo gil. Nii weajoochcheanda Gristohi, dea shaang' Bwaabwa ea Balleanda.

²³ Manda siida jea ghwashaang' Balleanda akkwandeawa Ghweanda. Dea mwas Balleanda gwandeawa eara Ghweanda.

²⁴ Anung'waada ng'asheega ghayi oayiinyi ammwadi goobiida jeesingeagwa. Asi iyabiida jeesingeagwa ng'asheega ghayi oayiinyi ammwadi, abeeda gajooppiidana jeeda Balleanda ea jeeda Ghweanda.

²⁵ Nea nii ea heelleeda ghayi rukuneasa gil, nea ea eaweega manda mudeanooda.

²⁶ Geang'oorneegwa ng'asheesu appadayda fukka gasa gwareenganneegwea;

²⁷ nea gimearda ghayi oanyaschi aba headaannyiin gwanda jeesingeagwa, ak ghanyea moogassi ghoanaleagwa sih; aba gideaba gimeardida ghoanaaleagwa haleanjeessean, ak ea huumwa, ak ea manda ng'uyyeega, gawuurji gidaghayi anaaldaneegwa, oppiidana jeadaannyi.

²⁸ Asi ghamneawa diibiga manang'i, oppiidana jeadaannyi, aba gideaba ihidu abeeda geaghuschi ak ea meebiiktani bwadaw aba baspaseega aba hinnoadaannyi.

²⁹ Iyoanalli gideaba niny ea doabiiwaat, abeeda ghoanalli gideaba siida sina ng'asheega doobiiweadi gwajiilu niny.