1 Yohaana 1 - NEAJEEDA EESH BEA BUUNEESSEAN

¹ Gitta ghayi ng'eat ammwadi ghayi siyiinyi, akkeadaayi aba gheanyangaasa, ak geedaayi nea geang'ng'waanyi aba geattingaasaan, was ng'asheanda eaweegean,

² nea eaweega geanung' ghwadaajiit, akkeadaayi, ak geemuuwwu, ak geerukuneegwa eaweega manda mudeanooda mida heeda Bwaabwa ak geanung' ghwadaajiit aba heedeanya,

³ gitta ghayi sidaayi ak geayiinyiin geerukuneegwa earagooga ak abeeda geebareannyi sea aseasa; nea bareannyeedeanya gwanda heeda Bwaabwa ea heeda Balleandaannyi was Yeesu Gristo.

⁴ Ak geeng'oorneegwa ng'asheesu ak abeeda ghwahit hooseaneegaasa.

⁵ Nii ng'asheanda ghayi siyiing'si headaannyi gil ak geerukuneegwa, gideaba Aseetta weeshinda gil ak jeadaannyi ea manda misaneeda earahay.

⁶ Isiyeennyi geebareannyeewi niny nea geneayeewi jeeda misaneeda, geanapchi ng'uyyeega nea meeppiidani naweeda humeanda;

⁷ nea isineayeewi jeeda weeshinda, gawuurji gidamideatta niny jeeda weeshinda abeeda easibareannyi aseasa, ak foojeanda Yeesuuyda was Balleandaannyi gaygoohuun ring'eegaasa sean.

⁸ Isiyeeshshi geat meendeawani ring'eeda, gereenganayi geat, nea ea manda humeanda jeedeanya.

⁹ Nea isidukkuni ring'eagaasa, niny awaam nea doabiiwaat, ak gaygwasamsa ring'eagaasa, ak gohuuneasa aba haleanjeessean mwadoabiiwa.

¹⁰ Isiyeshshi geat miyesna ring'eeda, geanung' gaba niny ng'uyya, nea ng'asheandaannyi ea manda jeedeanya.