1 Goriinto 9 - NEAJEEDA EESH BEA BUUNEESSEAN

Gittoobiiwsa gadiyeeda Giijasoodiga

¹ Neada aniini meabali geawi? Aniini meawosi giijasoochcheanda? Aniineeda ea mii dadaa Yeesuuyda was Ng'uttamiideanya? Agooga moowosi gadiyeedeanyu aba jeeda Ng'uttamiida?

² Aba gideaba iimeawoosi giijasoochcheanda, aba heeda buuneeda suurja, iiduu geawoschi aba heedeang'wa agooga; aba gideaba agooga goowooschi girooraneeda giijasoochcheandumeedeanyu aba jeeda Ng'uttamiida.

³ Nii gidearukkwiisi fuga sikkiideaweani.

⁴ Neada ea madoobiiwseasa gideaba geyeagiischi nea geeleeshi?

⁵ Neada ea mammiiseasa gideaba getteayeewi gatmooda, aba jeeda neayeedeanya eewuurjeewana giijasoodiga suurja sea o oorjooga geenyea Ng'uttamiida sea Geefa?

⁶ Ghana sughus Barnaba sea aniini was fuga jea gagadiiyi ak ea mwanyasa hamitta?

⁷ Nii gajea ana shirikaarajean gil jea gawa ng'uchcheeda aba lappiyeadaannyi niny nea gaba geaw? Nii gajea ng'eaha gil siida jea gwahista msabiibu jea ea may ghwaak haghweagaaschi? Nii gajea ng'eaha gil jea gooheagwiischi ak aamwali eanooga haleanjeeda ahaaghwa?

⁸ Heappi ng'asheesu geargu aba gheambalmeeda siida? Neada deaweeda earada marukuna ng'asheesu?

⁹ Aba gideaba aba jeeda deaweedeeda Muusa geang'waar gideaba, “Adiradi ghuutta heeyda dattas booga.” Abeeda gajeeyeena Aseetta gang'ula ng'asheega heewga?

¹⁰ Neada niny ea mabaloolana badahuukkaasa? Ng'asheesu geang'waar appadahuukkaasa, aba gideaba siida bwar ng'eanyi iissa gidabal ghabwar ng'eanyi nea ghwarar nea siida las booga ea dalasa nea ghwarar gideaba gayghwanyas booga.

¹¹ Abeeda aseasa ghayi iisihisi mbeeyooda miyaas bea guroorooda jeesingeagwa, abeeda gajea ng'asheanda haw gil gideaba gealaji haleanjeedeang'wa oanyaschi?

¹² Asi iinyas buuneeda suurja haleanjeeda doabiiw aba heedeang'wa, abeeda amearaanyani aseasa? Iiduu, ea meagasi aseasa gideaba gajeatoabiiwdunu, iissa geamilikghti haleanjeassean ak ameatteali Giijasta miy bea Gristo.

¹³ Moanali gideaba fukka sin gadiyeeda aba gheeda sibatta Aseettean gwanyassa hamitta nyaawa gheeda sibatta Aseetta, nea fuga sin gadiyeeda, aba altaari iissa amwanyasa haleanjeetta sisappa geadi bea lukghumajeegeani?

¹⁴ Gwanu, eara Ng'uttamiida gwargu gideaba fukka rukkwiida Giijasta miyiin gay ghwanyas hamitta nyaawa appadayda Giijasta miy.

¹⁵ Amaduu aniini ghanyea mii dasin aaragi aba ng'asheesu doabiiwiin, ak amwang'waari aba gideaba geagasayi danyas haleanjeani. Aba gideaba ghang'wana ghaameayi mwasamwa gideaba gayghaweedanaan siida ghwaroodeanyu bea geaw.

¹⁶ Earappeadi earukkwiidi Giijasta miyiin manda gichchea daghwara geaw. Aba gideaba sugoonan dasin gadiyeani. Eamuy deanyu imearukkwiidani giijasta miy!

¹⁷ Aba gideaba iyeasinnyi aba gideagassiidi aniini, abeeda geandeawi gimearda; ama iimii gideagassiidi aniini, abeeda gadiyeeni geetteaganean.

¹⁸ Abeada giimeardeanyu annaaha? Ada nihi: gideaba gaydarukkwiida giijasta miy nea meegu gili, ak aamwanung eegu gittoobiiwsean aba rukkwiideayda giijasta miy.

¹⁹ Earappdi eaballi geaw aba heeda buuneessean iin geasinyi geaw ging'ng'oonyaneeda buuneessean, ak abeeda geanyaksi geaw fuga saang'a.

²⁰ Iissa geawuurjeewi Yahuudi aba heeda fuga Yahuudi, ak abeeda ghaanyaschi fuga Yahuudi; aba heeda fuga deaweeda, iissa geasinyi geaw siida deaweeda, earappeadi meandani jeeda deaweedean, ak abeeda ghaanyaschi fuga ang'ng'waay deaweeda.

²¹ Nea fukka manda jeeda deaweedean geasinyi geaw gilimeandani jeeda deaweeda, nea mii gideaba meandeawani deaweeda aba heeda Aseetta gil, nea bih geawoschi siida mideawa deaweeda aba heeda Gristo, ak abeeda ghaanyaschi fukka mandeawana deaweedean.

²² Aba heeda fuga ng'arng'ari iissa geawoschi ng'arng'ar, ak abeeda ghaanyaschi fuga ng'arng'ari. Geandi damannyoojiga sean aba heeda buuneessean, ak abeeda aba naweadinga sean ghaanyaschi gichchea dalealdeayda buuneeda.

²³ Ak geasinyi haleanjeessean appadayda giijasta miy, ak abeeda geeppareanyi ghawooda sea buuneeda suurja.

²⁴ Neada ea moanali gideaba fuga galleada iissa gwasalda sean gang'aleallli, nea siida jea ghwanyas shiipka aagi? Asi agalleada ak ghoanyaschi.

²⁵ Nea siida mida jeeda deangheeda iissa ghwasaja geaw haleanjeessean. Asi iissa gwasindunu ak abeeda ghwanyas shiipka, ak geegalleadi ak abeeda geanyaschi shiipka mayghwadattasa.

²⁶ Asaha, earaniini mwafwaji mwadaagha nea manda gidabuurbuurji, ak ea meakuli dawuurji siida bwar jeammeeda;

²⁷ aba sareani geasawannyi saseedeanyu nea geagadiiyi, ak amwahuuwi siida rukkwiisa giijasta buneessuurja, amaduu ghaahuuyi aniini siida jea eaheawa.