1 Goriinto 6 - NEAJEEDA EESH BEA BUUNEESSEAN

Giiheakteayda fuga Gristo

¹ Ideeppa gwanda jeedeang'wa siida giisan appadayda oorjeeda ghaamwat, ghwadoabiiw gideaba gaygabadaksa gawa ghoahaakta aba madeeda fuga mii doobiiweadi nea ghwanung'waada fuga ghaydidi?

² Moanali gideaba fuga ghaydidi gaygoorgweaksa ng'eanyiida? Ama abeeda ng'eanyiida ijeaorgweaksiina agooga, abeeda ea moahiidi iyorgweaksi ng'asheega manang'i?

³ Moanali gideaba galannya gajeergweaksiina malaykajeega? Asi abeeda ea may ghwaraanya, ng'asheesu bea ghamneaweani!

⁴ Asi iyoondeawi girgweaguutka sunu, ghwasaan inyas ghoayiinnyi madeeda fuga meawwala gheanyanga aba jeeda ganiisa?

⁵ Geargu ng'asheesu nea geagasayi dabwaspwaseagwa. Heappi gwasin gideaba aba jeedeang'wa manda siida eara siyagi was weaghoochcheanda ammu ghwalach girgweageeda fuga gheannyaawa,

⁶ iissa gawa siida ghoahaakta oorjeeda ghaamwat, ea biissa aba madeeda fuga mandeawana masaweega?

⁷ Hean gohheakkiidi geat agooga ak ghoaw joorda aba heedeang'wa. Neada ea mwang'wana goosawani aba gidiinyeanji? Neada ea mwang'wana gearreannyi haleanjeadaang'u?

⁸ Iiduu earagooga iissa goottinnyi nea goorreedayi haleanjeeda, nea iissa ghoareachchi eara fuga oduupcheewi.

⁹ Ghana moanali gideaba fuga mii doobiiweadi maygwahearan sugoochcheandumeeda Aseetta? Adeereenganneegwa; fuga munyas searooji gil, ghanea fuga bada haleanjeeda gidamawosa Aseetta, ghanea fuga mealuuli, ghanea fuga ashiigi suurja,

¹⁰ ghana mareanghooga, ghana fuga geawi ghaanyan, ghana leeyda, ghana fuga giing'weaka, ghana fuga areedi fii haleanjeeda jea gwahearan sugoochcheandumeeda Aseetta.

¹¹ Nea aba jeedeang'wa ghayi goowooschi fuga sina ng'asheesu. Iiduu ea siihhuuneegwa, ak ea simiineegwa, ak geegooneegwa doobiiwnatta aba gheawunga Ng'uttamiida was Yeesu Gristo, ea aba Guroorooda Aseetteanya.

Agadiyeatta sasanuukkeagwa aba gigheambiita Aseetta

¹² “Haleanjeessean aba heedeanyu ghwahit,” ak ea mii sean gil gea doabiiw. “Haleanjeessean ghwadoabiiw aba heedeanyu,” ak aniini ea meagassi gideaba gayghoaw soomjeanda gidawassean.

¹³ “Hamitta gaba jeeda, nea jeeda gaba hamitta,” ak gaygwanyarja Aseetta duwaaw. Amaduukku saseeda ea maba mealuuleega, gaba Ng'uttamiida, nea Ng'uttamiida gaba saseeda.

¹⁴ Nea Aseetta ghayi gooduudu Ng'uttamiida ak gaygooduunneasa aseasa aba uurdaannyi.

¹⁵ Heappi nea ea moanalli gideaba sasanuukkeagwa damealga Gristohi? Asi gay dageanu damealga Gristo ak ghanung' ghoaw damealga giweakshoochcheanda? Manda!

¹⁶ Ghana moanali gideaba siida guuyi sea giweakshoochcheanda niiw saseanagi sea ninyi? Aba gideaba geang'waar, “Fiisu assiyyeenyean gay ghoaw saseanagi.”

¹⁷ Nea siitta guuyi sea Ng'uttamiidean gaguuyi gurooroonagi sea niny.

¹⁸ Asalda anung'wana heeda mealuuleega. Gilinyoo ea riing'eeda gil sin siida gwanda badayda saseeda; amaduukku siida mealuul gwasin riing'eeda aba saseadaannyi nea gabwageaw.

¹⁹ Ammoanali gideaba sasanuukkeagwa gheeda sibatta Aseetta gil bea Guroorooda Ghaydit mida jeedeang'wa, ghayi gooneegwa Aseetta? Nea sasanuukkeagwa ea mii geagwa gil.

²⁰ Agooga geashaheagwa. Asi, oakghambiida Aseetta aba sasanuukkeagwa.