1 Goriinto 3 - NEAJEEDA EESH BEA BUUNEESSEAN

Soomjooga Aseetta

¹ Nea aniini fuga eaduupcheewi mwammuusi deabalooldaneegwa fuga mideawa guroorooda, geaghus awuurjeewana fuga saseeda, nea goowuurjeewi diibiga Gristo.

² Aniini ghaabiyeagwa eanooga, meagooneegwa hamitta hang'waay; aba gideaba agooga miyoammuusa; asi eara ghamneawa miyoammuusa,

³ aba gideaba agooga gudabeaha saseeda. Nea iimida jeedeang'wa lachng'eanyiida ea ng'alealleeda, abeeda mowosi fuga saseeda, nea ghoabeadi fuga geallaani?

⁴ Aba gideaba iyayi siyagi, “Aniini geabeayi Baulo,” nea gwayi nuut, “Aniini geabeayi Apoolo,” abeeda agooga ea mowosi buuneeda?

⁵ Asi Apoolo ng'eaha? Ama Baulo ng'eaha? Soomjooga ghayi nung amwasa gil, gawuurji gidadawda Ng'uttamiida giliwas sih gwasin.

⁶ Aniini ghayi geahisti, ak ghwayiin Appolo beega, nea dea arruudu ea Aseetta.

⁷ Siida hista mii gili ghana siida iin beega geaghus Aseetta arudu.

⁸ Siida hista ea dea iin beega gooyang'deayyi, amaduu gay gaba siisi nyas gimeardaannyi gawuurji gidaghayi sinda gadiyeeda.

⁹ Aba gideaba aseasa geewooschi fuga sin gadiyeeda Aseetta; agooga goowooschi madamnyeanda Aseetta, nea goowooschi gheeda Aseetta.

¹⁰ Aba gitteenna dagheerjeandumeeda goonan Aseetta, ak geawuurjeewi siida geariir haweewa fuga deekshi geasinyi sindeetta, ak gwadeeksheewa siinuut uhuuda. Ak ea daba siisi ng'ula gitteeksheatta aba uhuudeaba sindeedi.

¹¹ Aba gideaba manda siinuut jea gwasin sindeetta nuut, geaghus diitta ghayi nigeawiit eesiniin, nea Yeesu Gristohi.

¹² Iiduu nea gwadeeksheewa siinuut uhuudeaba sindeedi, iideakta lagheanga meeng'meeng'i, ghana lappiya, ghana lagheanga haw sheayeat, ghana geediga, ghana seenga, ghana nyeega,

¹³ abeeda gajeattajiit gadiyeemba giliwas sih; aba gideaba gayghoahiimu Eaweettida, aba gideaba gajeattaajiida beasta, ak abeeda gwasin beasta gadiyeeda ghayi sisin giduurji.

¹⁴ Nea gadiyeeda sin siida wassean nea gwadeeksa uhuudeaba sindeettida gayghaghu abeeda gayghwanyas gimearda.

¹⁵ Nea siida dattasa gadiyeadaannyi, gay ghwaak lugooda, amaduuku niny gajeelealu, gay gawuurji gili mwanmwandaawa jeeda beasta.

¹⁶ Moanali gideaba agooga goowooschi gheeda sibatta Aseetta bea Aseetta, ea gideaba Guroorooda Aseetta gwanda jeedeang'wa?

¹⁷ Siida iinuus gheeda sibatta Aseetta, gay gwanuus Aseetta siisi. Aba gideaba gheeda Aseetta aaghaydit, nea agooga gil.

¹⁸ Siida adagwareengani geaw. Siida idaah geaw, gideaba gwandeawa weaghuumeeda aba jeedeang'wa aba gweannyeeksu adadashahiida ak abeeda ghwanyas weaghuumeeda.

¹⁹ Aba gideaba weaghuumeedeaba ng'eanyiini leendeeda gil aba heeda Aseetta. Aba gideaba geang'waar, “Siida ang'ng'oonyi siida weaghoot aba jeeda milmilanda nyaawa,”

²⁰ nuut gichcha, “Ng'uttamiida ghwanal fughareenga fuga weaghoodi gideaba mwarachchi gil.”

²¹ Asi siida wassean adagagwarsa geaw buuneeda. Aba gideaba haleanjeessean geagwa gil,

²² ea Bauloohi, ghanea Apooloohi, ghanea Geefaahi, ghanea ng'eanyiida, ghanea eaweega, ghanea miyeeda, ghanea haleanjeeda ghamneawa mida, ghanea gea jea ghwahidu gil, suu geagwa sean;

²³ nea agooga goowooschi fuga Gristo; nea Gristo gaba Aseetta.