1 Goriinto 15 - NEAJEEDA EESH BEA BUUNEESSEAN

Duunnooda Gristo

¹ Asi fuga eaduupcheewi, ghamneawa gaydeapkeanneegwa Giijastida miy ghayi earukuneegwean, ghayi oang'ng'waanyi was dea oamiinaadawi,

² amaduu geelealneegwa, aba iyoang'ng'waanyi muuchchi ak geaghus gaba masaweegeagwa mwadaagha.

³ Aba gideaba geagonnyeegwa giijasta majeek bea huumwa ghayi sigoonan, bea gideaba Gristo ghami aba riing'eagaasa gawuurji ginnyaashta ng'ooruutka,

⁴ ea gideaba geebuy, ea gideaba geettuudu eaweetteaba samwagu, aba ginnyaashta ng'ooruutka,

⁵ ea gideaba nibussiinnyi sea Geefa, ea biissa ginealangiga attamaniyyeenyean.

⁶ Iimuchchu gabussiinnyi sea fuga naawa bughalaji muut aba damwanagi, nea aba jeedeaba fiisu gwanda gea saang'a duugwanda eara ghamneawa, nea mwaatkwa gwanda gea nimeewa.

⁷ Iimuchchu gabussiinnyi sea Yakkobo, ea gichcha giijasoodiga sean.

⁸ Amaduu aba huydeandeaba sean, geabussinnyeewi aniini, ak geawuurjeewi siida siji nea mii ghwahitta damandaannyi.

⁹ Aba gideaba aniini geawoschi mwanang'eawa giijasoodiga, biissa ea mammiissean gideaba gajeeguureewean giijasoochcheanda, aba gideaba ghayi naaghabwaschi ganiiseeda Aseetta.

¹⁰ Iiduu aba dagheerjeandumeeda Aseetta anaahuuyi gideawuurjeewi bea ghamneawa, nea dagheerjeameadaannyi aba heedeanyu ea maba mwadaagha. Aba meatkweeda niirja ghaaraanyi muuchchi aba sinooda gadiyeeda ea dalaabwa hoowa siida wassean aba saawa, nea mii aniini gil, nii gwasin dagheerjeandumeeda Aseetta mida heedeanyu.

¹¹ Asi ii aniini gil, ghanea fukka, nii gissurukkwiidi gil, ak hean ghoamwaschi.

Duunnoodeanya

¹² Asi ghamneawa iinukkwa geerukkwiida gideaba Gristo niduunna miyeeda, anda ak gwayeena fuga mwaatkwa manda duunnooda fuga nimeewa.

¹³ Ama manda duunnooda fuga nimeewa, adabeeda Gristo ea mii gwaduudu;

¹⁴ ama Gristo ii mii gwaduudu, abeeda rukkwiideaydeanya bea giijasta gaba mwadaagha ak masaweegeagwa gaba mwadaagha.

¹⁵ Iissa earaseasa geanung' eahuuwa gili sinappiisi Aseetta ng'uyyeega, aba gideaba gemuuwwu gideaba niiduudu Gristo, was dea mii gwaduudu ii huumwa gil gideaba ghami ak ea mii gwaduudu.

¹⁶ Aba gideaba ii meettuttuuna fuga nimeewa, abeeda eara Gristo ea mii gwaduudu.

¹⁷ Ama Gristo iimii gwaduudu, masaweegeagwa gaba mwadaagha, adabeeda ea gudandana jeeda riing'eegeagwa.

¹⁸ Gwasnu abeeda eara fukka sean ghayi meewa aba jeeda Gristohiin ea nirooda.

¹⁹ Aba gideaba aba jeedeaba eaweesu bea ghamneawean isindeawi rarooda aba heeda Gristo, gidabal geabwaydaneasa ea ealaabwana hoowa buuneessean.

²⁰ Ak aba huumwa Gristo ea nuduunna miyeeda, was haghweega madeeda aba jeeda fuga nimeewa.

²¹ Aba gideaba miyeeda ghayi gweadu siida, gwasnu eara duunnooda miyeeda gweadu siida.

²² Gawuurji ghayi aba Adam gameewa buuneessean, gwasnu earaba heeda Gristo gaygwaduuttu sean.

²³ Ak gaygaba siisi siittuudu aba badiida Aseetta: Nea Gristo ea haghweega madeeda gil, nea damanda jea ghwahinna gayghwaan heeda fuga was gea Gristo.

²⁴ iing'atta hiji gayghwahidu mudeanooda, damanda jea ghoadawa Aseetta was Bwaabwa gheambalmeeda iing'atta nyarjeawuda sugoochcheandumeeda ea fuga ambaliischi sean ea uurda.

²⁵ Ak ghanyi goombaliischi ea eaghus ghwayiin weajoodigaaschi sean jeeda baneaguuka geeshangaaschi.

²⁶ Weajoochcheanda huydean jea eejakta miyeeda gil.

²⁷ “Aba gideaba Aseetta niyiin haleanjeen jeeda baneaguukka geeshangaaschi.” Haleanjeessean siyiin hing'eadaydaannyi, ak ea daach gideaba numwas siida iin haleanjeessean jeeda baneaguukkaaschi.

²⁸ Asi iisiyiin haleanjeessea jeeda baneaghuukka geeshangaaschi, abeeda Balleanda gayghwayiin geaw jeeda baneaguukka Aseetta, ak abeeda Aseetta ghoaw haleanjeessean aba hichpa giliwas siida.

²⁹ Asi ghamneawa gwayeenaan buuneeda isippattiisa aba hoorgeeda fuga nimeewa? Iimuchchu nea meettuunna fuga nimeewa earahay, abeeda buuneeda geppeattanniisa naaha aba hoorgeeda nyaawa?

³⁰ Abeeda ghwasaan inyas geendi jeeda gidiinyeanda damannyoojiga seani?

³¹ Fuga eaduupcheewi, aniini geargu ng'asheesu nea ghaaghwarji geaw appadahuukkeagwa agoogeeda mida jeeda Gristo Yeesu was Ng'uttamiideanyean, iissa genuusan galeagasean!

³² Gaydanya naaha abeeda iyeabalooldi siida, aniini geang'uchcheewi diyeanga aba Efeesohiin? Aba imaduuttuuna fuga nimeewa, “Asi eyeagiischeena nea geeleeshi, aba gideaba numuji gajeemeewwa.”

³³ Adeereenganneegwa, “Baloolda muy iissa gwanuus searoojiga miyaas.”

³⁴ Anung' ghwadoabiiw fughareengeagwa, ak ea adagudoosinnyi riing'eeda. Aba gideaba buuneeda mwaatkwa mandeawana fughareeda Aseetta. Geergu ng'asheesu ak abeeda ghoabwaaspwaaschi.

Saseeda jea ettuudu

³⁵ Iiduu gwadeeppa ghoanyaashta sih, “Fuga nimeewa gettuuttaydaan? Ak gayghapka nea gweadu sasanuukka uurjiin?”

³⁶ Ea siittasha, haleanjeeda ihisti maygwahissa heeda ea eaghus ghanyi ghami.

³⁷ Nea gidihisti ea mii bookcheanda niheedu, iissa gheang'nyeanda, deeppa gaba nngano ghana gaba booga suurja.

³⁸ Nea Aseetta ghoadaw saseeda loat nea gilinyoo ea mbeyooda gil iissa ghwanyas saseadaannyi.

³⁹ Aba gideaba sasanuukka sean mawuurji, amaduu sasanuukka buuneeda gawuurji, nuut gaba diyeanga, nuut gaba dariidakka, nuut gaba ghweayeega.

⁴⁰ Ak gwanda sasanuukka humng'eeda ea sasanuukka ng'eanyiida; nea gigheambiitta sasanuukka humng'eeda ea agi, nea gigheambiitta sasanuukka ng'eanyiida ea nuut gil.

⁴¹ Asi gwanda gigheambiidagi bea Aseetta, ak gigheambiit nuut gaba sheeda, nea gigheambiit nuut gaba miinga; aba gideaba ming'weanda gwaheelli sea ming'weanda aba gigheambiitta.

⁴² Gwasnu eara duunnooda fuga nimeewa. Gidasihista iissa ghami, nea gisittuudu ea mayghami.

⁴³ Geehista nea ghasghasaat, ak geettuunna nea gwandeawa gigheambiitta. Geehista ng'arng'aranda, ak gettuudu nea gwandeawa uurda,

⁴⁴ Geehista saseeda geallaan, ak gettuudu saseeda gurorooda. Iimida saseeda geallaan, gwanda eara dea gurorooda.

⁴⁵ Gawuurji gissung'waarda bea gideaba, “Siida madeeda was Adam ghoaw siida mideawa eaweega,” nea Adamooda huydean ea Gurorooda adawi buuneeda eaweega gil.

⁴⁶ Nea dea asheeda giibinda ea mii saseeda guroorooda gil, geaghus saseetta bea geallaaniin amang'atta ghabwat saseeda gurorooda.

⁴⁷ Siida madeeda ghayi gwaleabu ng'eanyiida, ak geesna birjeanda; siideaba iyyeenya gwaleabu humnng'eeda.

⁴⁸ Gawuurji siitta bea birjeandean, ea giduurji fukka sisna birjeandean gil; gawuurji siitta bea humng'eedean, ea giduurji fukka bea humng'eedean gil.

⁴⁹ Ak gawuurji sea gissuwuurjeatti sea siida ghayi sisna sigeedean, gwasnu geewuurjeewi siitta ghayi leabu humng'eedean.

⁵⁰ Gearukuneegwa ng'asheesu, fuga eaduupcheewi: saseeda ea foojeanda maygwahearan sugoochcheandumeeda Aseetta, ghana dea jea ghami mayghoammu gwahearan dea mayghami.

⁵¹ Asi ng'ulla gearukuneegwa agooga makcheameeda. Aseasa majeemeewwa sean, ak gajeayameesa eesasean,

⁵² aba gheadi nuwaas, aba dukuteayda gheanyanga ea jeaditta, damanda jea ghwanyaasha durumbeatteeda huydean. Aba gideaba gayghwanya durumbeatti, ak gaygwaduuttu fuga nimeewa, ak ea maygudu ghwadaa miyeeda, ak aseasa gajeayameesa.

⁵³ Aba gideaba saseani meewean gayghanyi gookkwa saseeda mayghami, nea saseeda jea ghami abeeda gookkwa saseeda mayghami.

⁵⁴ Abeeda nii iissa ghamiin eaweetta jea gookkwealla saseeda mayghamiin, nea diitta meewean gookkwa dea mayghami, abeeda aba damani gaygwasa ng'asheanda ghayi sung'waar: “Miyeeda sijoar, ak ea nisa jooriischchooda.”

⁵⁵ “Ea miyeeda, jooriischoadaang'u gwanda yeenu? Ea miyeeda, ng'weanindaang'u gwandayeenu?”

⁵⁶ Ng'weaninda miyeeda riing'eeda, nea uurda riing'eeda ea deaweeda gil.

⁵⁷ Iiduu gagasa ebadiischeesa Aseetta, dea goona jooriischchooda aba Ng'uttamiideanya was Yeesu Gristo.

⁵⁸ Asi fuga eaduupcheewi abwariinnyi, andeawana alooheeda, ak ea adoabealbealli, ak goosinnyi galeagasean gadiyeeda Ng'uttamiida, ak ghoanalli gideaba gadiyeedeang'wa mii mwadaagha gil aba heeda Ng'uttamiida.