1 Goriinto 14 - NEAJEEDA EESH BEA BUUNEESSEAN

Ng'asha suuk goona Gurorooda Ghaydit

¹ Anung' ghoaw bariinyeega, gidajea agassa, nea goosinnyi badiida aba haleanjeeda jea eegu bea gurorooda, raanya gideaballi ghoaramwaarji.

² Aba gideaba siida baloola iitnuut meabaloola buuneeda goobalool Aseetta; aba gideaba manda siida nal ng'asheagaaschi, niny gwarukku makcheameeda funyaat aba jeeda Gurorooda.

³ Nea aba meatkweeda niirja, siida ramoorani gobalool buuneeda aba gidiing'nooda nyaawa nea goomajeek ea geandeayda salagheang'da.

⁴ Siida baloola iitnuut goomajeek geaw niny, nea siida rukku ramooranga goomajeek ganiisa.

⁵ Ak geagasayi aniini gideaba gajabaloolana iit nuut, nea ghwaraanya muuchchi gideaba gajaramoarana. aba gideaba siida ramoorani ahaweewa siida baloola iit nuut, geaghus gwarooppu siinuut, ak abeeda geemmajeek ganiisa.

⁶ Ak ghamneawa fuga eaduupcheewi, iyaawunnyi heedeang'wa ak geabaloolli aba iit nuut, abeeda gaydanung' anyagaadaydaan, geaghus darukuneegwa nea ghadahaaji ghana aba fughareeda, ghana daramooran, ghana aba ginealshooda?

⁷ Eara haleanjeeda mandeawana gurooruunatka, uurji durumbeatti, ghanea gidondoriida gil, iimwanya nea gwaheelli nyeashta, gajeanaldaan duumda was?

⁸ Aba gideaba giguuleanda iinyaa nyeashta meanala, gajeang'eaha siida jea ahidaat aba ng'uchcheeda?

⁹ Asi gwasnu earagooga; iyoobalooli iit nuut meanala, gajeang'eaha jea ghwanal gissurgu? Aba gideaba gajuurjeewana siida rukkwiisa ng'asheega jeammeeda.

¹⁰ Asi gwanda iidiga saang'a heelli aba jeeda ng'eanyiida, ak ea manda dea meanala girrugu.

¹¹ Abeeda iimwanali ginnyah iittida, gaydoaw rabascheanda aba heeda siida balool nea siida balool gayghoaw rabascheanda aba heedeanyu.

¹² Gwasnu earaba heedeang'wa; aba gideaba googasayi muuchchi gideaba gajahuuwa fuga mideawa uurda aba Gurorooda, agassa muuchchi gideaba gajandeawana ak ghoadeaschi ganiisa.

¹³ Asi, siida baloola iit nuut ea damwaasha Aseetta eattaw rooppiideayda.

¹⁴ Aba gideaba iyaamwaashchi Aseetta aba iit nuut, ghamwaach guroroodeanyu Aseetta, nea fughareedeanyu ea mandeawana haghweega.

¹⁵ Abeeda gaydasin naaha? Gaydamwaash Aseetta aba gurorooda earada gaydamwaash aba fughareeda, gaydasarman aba gurorooda ak gaydasarman earada aba fughareeda.

¹⁶ Eara gwasa, ang'iing'i iibadiischeesi aba guroorooda, siitta uurji gilimida jaroodean gaygwayeendaan “Amina,” iing'atta badiischeesindaang'u iimwanala gidurgu?

¹⁷ Aba gideaba gwadeeppa badiischeesiina muuchchi, iiduu siida niirja eamaloossiina gil.

¹⁸ Geabadiischeesi Aseetta aba gideaba geabalooli iit nuut ea dadarameagwa oagasean;

¹⁹ amaduu, aba jeeda ganiisa ghabwariinyi gideaba gaydabaloola ng'asha muut aba fughareedeanyu, ak ghanaalli buuneeda suurja, eaghwalabwa hoowa gideaba gaydabaloola ng'asha sagalamnyooji damanamughuush aba iit nuut.

²⁰ Fuga eaduupcheewi, adoahuuyi diibiga aba fughareengeagwa; ahuuwa diibiga aba ng'asheega munyas, nea aba fughareengeagwa ghoahuuyi fuga hees.

²¹ Geang'waar aba jeeda deaweeda gideaba, “Aba ghuusiga fuga baloola iit nuut, ea biissa ghuusiga rabasta gaydeabalool fiisu, ak earagwasa ghanyea maygoleeysean iit, gwargu Ng'uttamiida.”

²² Asi, iit nuut gwadeagooda gil ak ea maba fuga mideawa masaweega, gaba fuga mandeawana masaweega, nea ramooranga ea maba fuga mideawa masaweega.

²³ Asi iibwat geat ganiiseessean ak gabaloola sean iit nuut, amaduu ghwahidu gah fuga jarooda, ghanea fuga mandeawana masaweega gil, heappi maygwayi goobeayi geasi?

²⁴ Ama ramoaran sean, amaduu ghwahidu gah siida iiyiin gaygoohiimsa munyindaannyi, nea ng'asheekka sean iiyiin gaygoorgweaksa,

²⁵ Makcheameeda jeadaannyi gajeanung' ghwadaajiit; ak abeeda gwatkuy, ak gayghabwat Aseetta ak gwargu gideaba aba huumwa Aseetta gwanda jeedeang'wa.

²⁶ Fuga eaduupcheewi, asi gajeeyeanaan? Iyoobwachchi geat, gaba siisi mideawa duumda, ea ginealshooda, ea gidaheachta, ea iit nuut, ghana rooppunooda ng'asheega.

²⁷ Siida iibaloola iit nuut, ea dabaloola fii iyyeenya ghanea samwagu gil adaghwanaawa, nea dasinna galannyoojiga gwayamuuttooschi; ak ea darooppuuna siyagi.

²⁸ Iimanda siichchea gwarooppu, ea daba siisi siinda aba jeeda ganiisa, deabaloola geaw niny ea Aseetta.

²⁹ Nea sibanga ea dabaloola nea iyyeenya ghanea samwagu, ak ea dasikteawana ng'asheega surgu.

³⁰ Nea isittaheachsa ng'asheanda siinuut apteada, adasiinda siida ghwanyawa bea madeeda.

³¹ Aba gideaba ghoammuuschi oagasean gaba siisi ramoaran, ak abeeda ghwanal sean, nea geemmajeek sean;

³² nea gurooruunatka sibanga iissa gwasissa gadiyeeda sibanga.

³³ Aba gideaba Aseetta mii Aseetta ang'uuttooschi fii gil, niny gaba hoyyoo. Gawuurji aba jeeda ganiisajeega sean bea fuga ghaydidi.

³⁴ Nea gadeemga ea dasiinda aba jeesinga ganiisajeega. Aba gideaba manda gheatta jea gabaloola, gagasa gweada geat ng'eanyi, gawuurji ginnyaashta deaweeda.

³⁵ Ama mida ng'asheanda wassean gasa ghwanal, ea daanyaasha siyeedinga nyaawa aba ghoah. Aba gideaba gaba baspaseega gideaba gaygabalool gatmooda aba jeeda ganiisa.

³⁶ Heappi! Ng'asheanda Aseetta ghang'eada heedeang'wa ghana hisseegwa agooga nea goabwageadi?

³⁷ Siida iyeeshsha geaw guwosi sibaneeda gil, ghana ea siida gurorooda, gayghamwas ng'asheesu eang'oorneegwean gideaba gwargu Ng'uttamiida.

³⁸ Nea siida imwanala ng'asheesu, ea mwajeanaal niny.

³⁹ Asi fuga eaduupcheewi, asna badiida ak googasayi muuchchi ramooranda ng'asheega, nea adoaheawi fuga baloola iit nuut;

⁴⁰ nea goosni ng'asheega sean badiida ea alooheeda.