1 Goriinto 13 - NEAJEEDA EESH BEA BUUNEESSEAN

Bariinyeega

¹ Eara dabaloola ghuusiga fuga muunda ng'eanyiida ea dea malaykajeega, nea meandeawani bariinyeega, abeeda anaahuuyi gharinnyeanda ajuuri ea deebajeanda was moonngeanda.

² Nea eara dandeawa uurda sibaneandumeeda, ak ghaanalli makcheamuutka sean bea fughareeda, ak geandeawi masaweega sean, ammu goobaleak giijeega, ak ea meandeawani bariinyeega, meawosi gil.

³ Iyaadaydi haleanjeedeanyu sean eandeawi, ama adaydi saseedeanyu eaghwarda, ak ea meandeawani bariinyeega, ea meanyasi gil.

⁴ Bariinyeega iissa ghamilikghta nea innya jih; bariinyeega mandeawana lachng'eanyiida ghana ghwarjeeda;

⁵ ak ea maba ghunduufka ghana ghwarjeeda. Bariinyeega ea maska naweadaannyi nea gaba geaw; ak ea mii assas nyaras ghana gwandeawa sichcheeda;

⁶ ak ea mahoosanniisiina ng'asheega munyas, iissa gahoosassa ng'asheega doobiiweadi.

⁷ Bariinyeega iissa ghamilikghta ng'asheega sean, ak ghamwas ng'asheega sean, ak ghwarar ng'asheega sean ak ghwarjeang'da aba ng'asheega sean.

⁸ Bariinyeega manda mudeanooda; nea iimida ramooranga gayghang'atta; gwasnu eara iitta emoojiga, gaygammuudean, ama mida fughareeda gayghang'atta.

⁹ Aba gideaba fughareangaasa iissa ea mwahitta nea eara ramoorangaasa ea mwahitta;

¹⁰ Iimuchchu nea ghwahidu gitta hidaadiin, abeeda gayghang'atta gitta mii hidaadiin.

¹¹ Ghayi nea guttawos jeepta, iissa geabalooldi jeepta, ak geattemsheatti jeepta, ak gwadeenna fughareedeanyu dea jeepta; hean nea geeheedu doaw ng'eedeeda, ghaanung'waadi ng'asheega jeepchcheandumeeda.

¹² Aba gideaba ghamneawa geeng'ulli geat giyooh aba jeeda misaneeda, nea damandida gaygwaroonnyi gheanyangaasa. Asi ghamneawa ghaanalli aba meatkweenagi; damandida gajadanal muuchchi, aba gideaba Aseetta ghwanalan muuchchi.

¹³ Asi masaweega ea ghusooda ea bariinyeega, ngasheesu assamwaguun, aba jeedeaba ng'asheesu daahaw muchchi bariinyeega gil.