1 Goriinto 1 - NEAJEEDA EESH BEA BUUNEESSEAN

¹ Baulo, ghayi suguursa aba gidagassiida Aseetta ghoaw giijasoochcheanda Gristo Yeesu, ea oorjeediyya was Sosteene,

² Heeda ganiiseeda Aseetta mida Goriinto was fuga ghayi simmiidu aba jeeda Gristo Yeesu, ghayi suguursa ghoaw fuga ghaydidi, sea fuga sean guriisa gheawunga Ng'uttamiideanya was Yeesu Gristo aba heeda wassean. Niny Ng'uttamiida nyaawa gil, ea deanya.

³ Gagasa andeawana dagheerjeandumeeda ea hooyyoo leabu heeda Aseetta was Ghweandeanya ea heeda Ng'uttamiida was Yeesu Gristo.

Ghawooda aba heeda Gristo

⁴ Geabadiischeesi Aseetta galeagasean appadahuukkeagwa appadayda dagheerjeandumeeda Aseettaa ghayi sugooneegwa aba jeeda Gristo Yeesu,

⁵ ak aba naweadinga sean geepparureegwa aba jeedeaba niny aba weaghuumeeda ea fughareeda sean.

⁶ Ak abeeda gawuurji muuwwuunooda Gristo gidamajeekta aba jeedeang'wa,

⁷ ak abeeda ea mwashoadeewaneegwa haleanjeeda sugu bea guroorooda, nea ghoammuughu giidaheachta Ng'uttamiideanya was Yeesu Gristo;

⁸ niny gaygoomajeegeegwa ea ghwahitta mudeanooda, nea manda ramaseanda aba eaweeda Ng'uttamiideanya was Yeesu Gristo.

⁹ Aseetta ea doabiiwaat, was deaghayi gurneegwa ak abeeda gobareannyeewi Balleandaannyi was Yeesu Gristo was Ng'uttamiideanya.

Dardeayda aba jeeda fuga ganiisa

¹⁰ Geamucheegwa fuga eaduupcheewi aba gheawunga Ng'uttamiida was Yeesu Gristo, gideaba abaloolda gilagi oagasean, nea adagwanda dageascheedeang'wa fuurjeeda, ak gidabal goguuyi aba fughareanagi ea girgweageanagi.

¹¹ Aba gideaba nirukunean fuga Gloe gideaba gwanda jeedeang'wa jaliida, fuga eaduupcheewi.

¹² Asi gideargu nii gil gideaba giliwassih aba heedeang'wa iissa gwayi, “Aniini geabeayi Baulo,” ghana, “Aniini geabeayi Appolo,” ghana, “Aniini geabeayi Geefa,” ghana, “Aniini geabeayi Gristo.”

¹³ Heappi neada Gristo gabearshi? Heappi Baulo ghayi geengoor appadahuukkeagwa? Ghana heappi geepaatiisaneegwa aba gheawunga Bauloohi?

¹⁴ Geabadiischeesi Aseetta aba gideaba mii deabaatiisan siida aba ng'eangdeang'wa. geaghus Grispo ea Gayo;

¹⁵ adiiduu gwayi sih ghayi geepaatiisan aba gheawungeasu.

¹⁶ (Hean geabattiisannyi eara fuga gheeh Stefaano. Iing'atta suu ea mwaapkaadi ea neabaatiisanyi sih nuut wassean.)

¹⁷ Aba gideaba Gristo ghayi meajeaknean deabaatiisan, goojeaknean darukkwiida giijasta miy nea meakna bareaynatta weaghuumeeda, ak abeeda ea moawa beehiida Gristo gidamwadaagha.

Gristo uurda gil ea weaghuumeeda Aseetta

¹⁸ Aba gideaba ng'asheanda beehiida aba heeda fuga roodeadi leendeeda gil, nea aba heedeanya aseaseeda silealu ea uurda Aseetta.

¹⁹ Aba gideaba geang'waar, “Gaydanyarja weaghuumeeda fuga weaghoodi, nea fughareenga fuga mideawa fughareeda gaydaheawa.”

²⁰ Gwandeenu siida was weaghoochcheanda? Gwandeenu ng'oorshoochcheanda? Gwandeenu siida argweaji bea damani? Neada Aseetta ea mii ghwanung' ghoaw lendeeda weaghuumeeda ng'eanyiida?

²¹ Nea, aba weaghuumeeda Aseetta, ghanyea mwanala ng'eanyiida Aseetta aba naweeda weaghuumeeda, gohoosan Aseetta aba naweeda lendeetta bea ng'asheega surukkwiidiin ak abeeda geelealu fukka numwasiin.

²² Aba gideaba fuga Yahuudi gagaseadayyi gwadeagwajeega, nea fuga Yunaani gagaseadayi weaghuumeeda,

²³ amaduukku aseasa geerukkwiidi Gristoyda ghayi singoor, aba heeda fuga Yahuudi gwaruusa fii nea aba heeda fuga Emoojiga ea lendeeda gil,

²⁴ nea aba heeda fuga suguura, sean Yahuudi ea Yunaani, Gristo ea uurda Aseetta ea weaghuumeeda Aseetta.

²⁵ Aba gideaba dasheaynatta Aseetta gaburdeawa muuchchi fughareeda buuneeda, nea ng'arng'aranda Aseetta gwandeawa uurda muuchchi ea ghoadaraam buuneeda.

²⁶ Asi asikteawana gurnoodeang'wa, fuga eaduupcheewi; aba jeedeang'wa mii weaghoodi fuga saang'a aba ing'ulleegwa buuneeda, mii saang'a gea mideawa uurjeenga, ak ea mii saang'a fuga sijiilsa gealga hees;

²⁷ iiduu ghwaloat Aseetta ng'asheekka sifool bea jeeda ng'eanyiidean ak ghoabwaaspwaas fuga mideawa fughareenga, ghwaloat Aseetta haleanjeeda ng'arng'ari mida ng'eanyiida ak ghoobwaaspwaas gea mideawa uurjeenga,

²⁸ Aseetta ghwaloat haleanjeeda ng'arng'ari sifool aba jeeda ng'eanyiida, ea haleanjeeda mandana, ak ghwanung' ghoaw haleanjeeda mwadaagha gea mida,

²⁹ ak ea manda siida jea ghoammu ghaghwar geaw aba madeeda Aseetta.

³⁰ Niny gumdooda eaweegeagwa gil aba jeeda Gristo Yeesu, ghayi nung' Aseetta ghoaw weaghuumeedeanya, ea doobiiwnatteanya ea gimmiinnooda, ea lealeanooda;

³¹ asi gawuurji gidaghayi sung'waarda, “Siida ammu ghaghwar geaw, daghwara geaw appadayda Ng'uttamiida.”