1 Dimotteo 6 - NEAJEEDA EESH BEA BUUNEESSEAN

¹ Soomjooga sean gammiisa gideaba gay ghwaadaw meanang'oodiga nyaawa mureeda aba gideaba meang'eawwa gheawunga Aseetta ea ginealshoodeanya.

² Ak soomjoogiga was meanang'oodiga nyaawa fuga masaweegean adagafool aba gideaba oorjookkeennyaawa ghang'wana gagadiyeesa muuchchi aba gideaba suu weat soomjooga aba gadiyeeda nyaawaan niiw fuga masaweega ak ghabwariiy. Ng'asheesu anaala nea gireekusi.

Ginealshooda ng'uyeega ea meanang'oocheandumeeda huumwa

³ Siida wassean iyanaal fughara nuut nea mwamwasa ng'asheega mideawa eaweega Ng'uttamiideanya was Yeesu Gristo, ghana ginealshooda samgeat sea baditta Aseetta,

⁴ nii nung'ut ghwarjeeda ak ea manda gil nal, ak gaba geeska gittemshooda badayda ginyeeshteayda ng'asheega ea galleadayda ng'asheega nea aba jeedeaba suu gwarinna ng'ullooda siida aba gheangda muy, jalliida ea ging'weaka ea meannyooda muy bea siida,

⁵ ea sheangnyeeda fuga nidatasa fughareenga nyaawa nea mandeawana humeanda ak ghaghay gili meanang'oocheandumeeda gil.

⁶ Nea baditta Aseetta ea rearnatta meanang'oochcheandumeeda haw gil.

⁷ Aba geaba geepkaanyi badayda ng'eanyiida nea meeyeani gil, ak gajeebiikta nea meayaadi gil.

⁸ Ak iisindeawi gichea eayaaga ea hang'weaka gajeerearniitta.

⁹ Ak fukka gasa meanang'oocheandumeedean gay ghwahitta jeeda simsimda ea jeeda gadageeda ea jeeda ng'asheega munyas mabwa gil bea leendeeda nung ghwahitta buuneeda jeeda roodaweega.

¹⁰ Aba gideaba gumdooda ng'asheega munyas sean gweadu bariinyeega lappiya, ak buuneeda mwaatkwa ea ninungwaada masaweega aba bariinyeesu bea lappiyaan ea gwasawan jeesinga nyaawa.

Dimotteo geeruksa ng'asheega jea gwasin

¹¹ Asi ang'iingi siida Aseetta, ang'aamwana geaw ng'asheesu ak giyaadi geeshta doobiiwnata, ea baditta Aseetta ea masaweega ea barinyeega milighteayda ea garbabanda.

¹² Ng'uchcheena muuchchi ng'uchcheedida bea masaweegean, ang'ng'waanya eaweegiga manda mudeanooda ghayi suguurnaneeyiin, ak gimuuwwu muuwwunooda miy aba madeeda muushoodiga saang'a.

¹³ Ng'asheanji gearukuneey aba madeeda Aseetta diitta adaw haleanjeesean eaweegean, ea madeeda Gristo Yeesuda ghayi muwwu muwnoodaanyi miy aba madeeda Bondiyo Bilatto,

¹⁴ bea gideaba ang'waanya digheanji aba doobiiwnata nea manda habearga, ea ghwahidu hinnooda Ng'uttamiideanya was Yeesu Gristo.

¹⁵ Aba gideaba iihiitta damandaanyi gay ghwadaajiinyi Aseetta niny geekghambiit ak goombalischi nea gabwageaw sugoocheanda sugoodiga Ng'uttamiida ng'uttang'oojiga,

¹⁶ ninyi nea gaba geaw mwayghami ak gwanda jeeda weeshinda majeeneekiisa ak ea manda siida nidaah ak ea manda siida ammu ghwadaa. Mureeda ea uurda daanyi gil ea ghoaw eaweega manda mudeanooda! Amin.

¹⁷ Fuga ghamneawa was meanang'oodiga appadayda ng'eanyiida rukusiina gideaba adagagwara geat nea ghaghus meanang'oocheandumeani jea goosheani, gagasa ghaghus Aseetta goona haleanjeesean saang'a, ak geegadiyeati aba hoosaneega.

¹⁸ Dasna ng'asheega miyaas ak ghoaw meanang'oodiga aba sinooda gaamiyaas, ak ghoadayda haleanjeenyaawa nea gabareanyi sea buneesuurja aba jeeda miy,

¹⁹ nea goodiiwsa geat haleanjeeda ghoaw sindeatta miy aba damanda jea ghooni ak ghwanyas eaweega was gea huumwa.

²⁰ Ea Dimotteo, fura muuchi diitta ghayi siteaganeeyiin ak ang'aamwana geaw ng'asheega mwaloada gil, mawoosa gea diiniin ea sheangnyeeda fughareeda suguura, “Fughareeda ng'uyyeega.”

²¹ Ak gwanda fuga suuk aba muwwunoodeaba ng'asheesu ea niramwas masaweega. Gagasa anyasa dagheerjeandumeeda!