Biblia Todo Logo
Bìoball air-loidhne

- Sanasan -

1 Dimotteo 5 - NEAJEEDA EESH BEA BUUNEESSEAN


Gadiyeeda fuga mwas Aseetta

1 Adiwoowsi gweargweeda, reekusiina gawurji ghweanda, ak eara gheareemanga gawurji oorjooga giyeang'wa,

2 gadeemga woosi gawuurji geamadu, gadeemga manang'i gawuurji haweega giyeang'wa aba alooheeda sean.

3 Sissiina mureeda masinng'weega was masinung'weega huumwa.

4 Ak masinung'weanda iimideawa diibiga ghana diibigaabwa gaaschi, gidamadeeda diibisu gagasa ghwanal gidamiisa saawa bea ng'ullooda fuga nyaawa, nea gang'ula fuga jiilu aba gideaba ng'asheanji aamiy aba madeeda Aseetta.

5 Nea dea was masinung'weanda huumwa, sinung'wa heeda nea gaba geaw, niih ghusoadaanyi niidaw Aseetta ak niny goomajeek mooshta ghawooda ea baditta Aseetta eawa ea askweari.

6 Nea masinung'weanda moammu ghoong'ng'waay geaw aba ng'asheega munyas nii niimi eara eeng'ula nea gudea majeek.

7 Ng'asheesu rukkuta aiduw abeeda adaghoaw habearga.

8 Gili was sii mwaghamwada fugaaschi was fugaabwa gheanyi niheawa masaweega, ak gamunyiiti ea ghang'al siida mandeawana masaweega.

9 Masinung'weanda adeang'waar ea gaba gweanyeewi laadam nea abeeda siyeadaanyi ghayi aagi.

10 Ak easumwowuna badaydaanyi ng'asheega miyaas bea gireerda diibiga, ak ea nideapta rabasta nea niihuun gishanga fuga ghaydidi ak ea niweat fuga mida jeeda sawanadeeda, ak ea nisin muuchi ng'asheega miyaas.

11 Ak masinung'weega was gadeemga duea manang'i adung'waari gheawunga nyaawa aba gideaba iiraanya geawunda gheangda bea saseeda gay gwanungsa heeda naweeda Gristo ak gaweay gheenda.

12 Abeeda saawa gajeergweaksa aba gideaba ninung'wa heeda masaweega nyaawa bea madeeda.

13 Nea gicha ea meaghusa nii, ghwanaal geat ghaleehooda ak gwaneaydooschi aba gealga ak ea mii ghaleehooda gil gabeachi, inyeesa goong'uuchi buuneeda nea gwasikideawa ng'asheega nea gabaloola ng'asheega mamiisiina saawa.

14 Asi aniini geagasayi masinung'weega was gadeemga manang'i eegeena, ak gwaji diibiga ak goombal gealga nyaawa, aba gideaba eamwanyasa weajoocheanda gheata habearga appadahuukka nyaawa.

15 Aba gideaba gwanda mwaatkwa gea niyamgeat ak ghwaat geeshta Shataan.

16 Gatmooda mideawa masaweega imideawa masinung'weega aba gheanyi daweada ninyi nea gabwageaw masinung'weegiga, aba gideaba adaghoaw sareenda Ganiisa, Ganiisa gay ghaweati masinung'weegiga bea huumwa.

17 Gweargwa sin gadiyeenyaawa nea ghwoamiidu gamiisa eattaw mureeda muuchchi ghwaraanya gikka deawiitti aba rukwiideayda ng'asheega Aseetta nea goonealshiin.

18 Aba gideaba gwayi ng'ooruutka, “Adiradi ghuutta deeda gadiiyi.” Ak gwayi gicha, “Siida gadiiyi gahaguuwsa gidageattindaannyi.”

19 Adimwasi giheakteayda badayda gweargweeda ea ingsiina gisiihaaktaawa ghuusispa fii iyeenya ghana samwagu.

20 Fukka sina ring'eedean awoowsiina aba madeeda buuneessean, ak abeeda ghabeal suurja.

21 Ngasheanji gearukneey aba madeeda Aseetta ea madeeda Gristo Yeesu ea madeeda gijasoodiga humng'eeda siloat, sina ng'asheesu nea adilamwaji girgweaksiinda, nea adisini ng'asheanda aba shiitmeeda.

22 Adilamachsi inda geattinga uhuuda siida nea adung'udi geaw ring'eega buuneessuurja. Ak gishageadi geaw ak gimmiidu.

23 Gidang'eada ghamneawa adileahayi beega ak ghwahiti, leaha difaayeeni ng'ay aba agidi bea jeadaang'uuni ea geyoonung'weakka biikkiiseey galagasean.

24 Ring'ega buuneeda mwaatkwa adaach ak ea nisheeda gaweay heeda girgweaksiinda nea suuk ring'eega nyaawa gaygweadu geeshta.

25 Ak aba sareani sinooda ng'asheega miyaas aadaachi ak eara giikka miidaajiin ea mwajeamu eafuyi.

Datooga New Testament © Bible Society of Tanzania, 2009. 

Bible Society of Tanzania
Lean sinn:



Sanasan