1 Dimotteo 4 - NEAJEEDA EESH BEA BUUNEESSEAN

Ginealshoodiga Ng'uyyeega

¹ Asi ng'asheanji gabean gwargu Gurorooda Ghaydit nea ghwadaajiit bea gideaba damanda huydean gwanda fuga jea gooheelli geat masaweega, ak gooleeysiit fuga ng'uyyeega ea ginealshooda Shattaani.

² Aba ng'uyyeega fuga ammiittu geat, hean ghaghwarda jeesinga nyaawa saawa nea gaba geat.

³ Inyeessa ghoadeal buuneeda geeshshooda, ea agitta hamichchoojiga nea hamichchoojusu ghayi ghabwat Aseetta ak ghwanung' ghwadeattaawa badiischooda fuga mideawa masaweega naal humeanji.

⁴ Aba gideaba haleanjeesean sin Aseetta amiyaas, nea manda dea jea eeheawa, dea jea eeheawa, gamiisa gideaba gajedeaptaawa badiischooda.

⁵ Aba gideaba haleanjeeni siminna ng'asheanda Aseetta ea mwooshta ghawooda.

Siida gadiyeeda miy bea Yeesu Gristo

⁶ Apkeasiina oorjoogiga ng'asheesu, ak gaywoosa siida gadiyeeda miy bea Gristo Yeesu, naal ng'asheega masaweega, ea ginealshooda miiy ghayi iyaadi geeshta.

⁷ Asi heawana deanghoochka munyas bea gweargwa mwaloada giliin. Ak ang'iing'i giinaali geaw baditta Aseetta.

⁸ Aba gideaba deangheeda nung ghwanyas saseeda uurda ghwahit gilmwanang', ak baditta Aseetta ghwahit aba haleanjeesean, aba gideaba gindeawi heelleeda eaweegeaba ghamneawa ea diitta iiduw jea ghwahiduun.

⁹ Ng'asheanji huumwa gil ak gammiisa gideaba gajeemwas.

¹⁰ Aba gideaba ghoaw gidaghamna adeawiideasa ea gidasigadiyeatti muuchchi appadaydeaba gili. aba gideaba aseasa geeghuschi Aseetta majeek was lealnoochcheanda buuneessean, ghwaraanya gea mwas niny.

¹¹ Ng'asheesu rukuta nea ginaali.

¹² Adiidu gafool sii gheareemanandumeedaang'u, ak guwoosi siida jea eegala aba heeda fuga mideawa masaweega, aba jeeda baloolda ea giibinda sea bariinyeega ea masaweega ea alooheeda.

¹³ Damani jea doonaan, milmiliida aba giissoomanda nea gireekusi buuneeda nea ginaali.

¹⁴ Adinung'waadi gadiyeetta immuusi mida jeedaang'uuni, sigoonyi aba ramooraneedean, ak ghwayiin gweargwa geattinga nyaawa uhuudaang'u.

¹⁵ Ateemsheesiina ng'asheesu muuchi, ak giibiidi jeeda nea giing'ng'ooysi aba gideaba gay ghwadaajiit giibindaang'u aba heeda buuneessean.

¹⁶ Ghamwada saseedaang'u ea ginealshoadaang'u. Abiidana jeedeaba ng'asheesu aba gideaba iisini ng'asheanji gajaghuhageaw ea fukka alleeyseey iidiin.