1 Dimotteo 3 - NEAJEEDA EESH BEA BUUNEESSEAN

Fuga hees bea Ganiisa

¹ Ng'asheanji huumwa gil gideaba siida jea ghoaw siida haw jea ghoahaaghwa fuga ganiisa gagasa gadiyeeda miy.

² Siida haw bea ganiisa gamiisa gideaba ea meerukna gidamuy appadaydaanyi ng'eedeeda mideawa gatmoonagi, mideawa gheadeenda biissa gwandeawa weaghumeeda, siida aroottooschi haleanjeeda, deapiida buuneeda, naal goonealshi,

³ Mii siida boogidi gil, mii siida bara buuneeda, ak ea garbabu, mii siida gheangnyachi gil, ak ea mii siida bwariiy lapiya,

⁴ ak ea siida ammu goobal gheanyi muuchi nea ghwanung gaba diibigaaschi mureeda.

⁵ (aba gideaba siida mwaammu goombal gheanyi gay ghwamustaan ghoahaaghwa Ganiseeda Aseetta?)

⁶ Ak ea adaghoaw siida duughwalalaan askwearjoojusu neekiin, ak ghaghwargeaw ak goobeedeaysa jeeda girgweaksiinda gawurji gidasihinda Shataan.

⁷ Ak gamiisa gideaba gamuuwwuuna badaydaanyi fuga manda jeeda Ganiisa ng'asheega miyaas, aba gideaba adeergu ng'asheega munyas appadaydaanyi ak ghoabitta jeeda gadageeda Shataan.

Weedanga jeeda Ganiisa

⁸ Weedanga fuga Ganiisa eara saawa gamiisa gideaba ea fuga miyaas searooji ak ea mii fuga yamiisachchi ng'asha, ak ea mii fuga leeha difaayeeda ak ea fuga bwariiy lapiyeeda leabu naweeda mwadaabiiwa gil.

⁹ Ak saawa gamiisa gideaba goomajeek masaweega aba jeeda miy.

¹⁰ Fiisu gidamadeeda ghang'wana ghanyi eadaa ea jea ghoammu gadiyeani i manda gilsidaa muyi abeeda geenung wasin gadiyeani bea weedangean.

¹¹ Eara gadeemga nyaawa gamiisa ea fuga miyaas searooji gil, mii fuga nappiisa buuneeda ng'uyeega, ak gamiisa ea fuga mideawa gheadeenda gil, nea doobiiweadi aba haleanjeesean.

¹² Weedanga Ganiisa gamiisa gideaba gaygaba ng'eedeeni bea gatmoonagi, nea ghoanaal muuchchi diibiga nyaawa naweeda miy, ak ghoomu goobal gealga nyaawa.

¹³ Aba gideaba fuga sin muuchchi gadiyeeda weedanga Ganiisa gajeewal gheangda, ak gay gooleeysiit Buuneeda ak ea may ghoawal gil aba masaweega nyaawa mida jeeda Gristo Yeesu.

Makcheameeda haw

¹⁴ Geang'oorneey baruwajeanji nea geabaday hinnooda heedaang'u eawoojusu duwaawiin.

¹⁵ Ama deeppa dashingda ginali gidamiisa gibinda fuga gheeda Aseetta was Ganiiseeda Aseetta majeek, wa sindeetta ea Lagheaneeda akar gheeda bea huumwa.

¹⁶ Ak ea huumwa gil gideaba makcheameeda baditta Aseetta ahaw. Aseetta geetaajiiti aba saseeda Ak doobiiwnataanyi ghoohiimu Guroorooda Ak ghwadaa giijasoochcheanda humng'eeda Ak geerukwiida iitaanyi aba jeeda emoojiga, Ak geamwas aba jeeda ng'eanyiida, Ak geeyaat humng'eeda heeda ghambiidaat.