1 Dimotteo 2 - NEAJEEDA EESH BEA BUUNEESSEAN

Iita mwashta ghawooda

¹ Gidamadeeda jea deamajeek geagasayi musiischooda ea baditta Aseetta ea mooshta ghawooda nea goobadischeesi, ak ng'asheesu geesin appadahuuka buneasean.

² Amooriisiina sugoodiga ghawooda ea fuga hees sean mideawa gheambalmeeda, ak geanyaschi gibinda siippiit ng'eanyi ea hoyyooyda, ak geabwachchi Aseetta nea geepiidi naweeda miy.

³ Ng'asheanji amiy, ak ea mwasaati aba madeeda Aseetta was lealnoocheandeanya,

⁴ nea gasa gideaba gay ghwalolon buuneesseaniin, ak ghwanal gitta was humeandean.

⁵ Aba gideaba Aseetta aagi, ak eara dea aaduupchi buuneeda ea Aseetta aagi, ninyi siida was Gristo Yeesu;

⁶ nini gabeagu eaweegaaschi nea gabwageaw ak ghoaw siida jea goottin buuneessean, ak gajeemuuwwu aba damandaanyi.

⁷ Ak aniini appadaydeaba nii geayiinan doow gijasoocheanda ak gearukwiidi giijasta nea ghawaschi gineashoocheanda fuga eemoojiga danal masaweega ea huumeanda. (geargu huumwa mearukni ng'uyeega).

⁸ Asi geagasayi gwandeawa headiga geattinga miyaas, biissa ea manyareessa, biisa ea masheangdooschi. Abeeda headiga sunu ea dagatgada geattinga nyaawa googeal humng'eeda galeagasean damanda mooshta ghawooda.

⁹ Ak gwasnu eara gadeemga ea dasna suulga aba eagweega miyaas, ak gwandeawa mureeda miy gheedeenda ak ea adagwasin suulga aba buudeega sireedi ghana lagheanga meangmeangi ea boshcheanda, ghana eagweega hees sheayat.

¹⁰ Ak suulga nyaawa gidabal ea gibinda nyaawa miy gil aba gideaba nii gidamiisa gadeemga awali Aseetta.

¹¹ Gatmooda gamiisa gideaba gayghwasinda aba damani gassa nalooda gidean, nea ghamwas aba naweadinga sean.

¹² Aniini measiksiini gatmooda goonealshi ghana gideaba gaygoombali ng'eedeeda, gamiisa gideaba gayghwasiinda.

¹³ Aba gideaba siida sisin bea madeeda Adam gil, ak gabassa Hawa.

¹⁴ Ak Adam ea miyerengani geereengani gatmooda muuchi ak ghwabitta jeeda ramaseanda.

¹⁵ Ak gay ghwalalaan aba jeetaanyi iimajeegiit appadayda masaweega ea bariinyeega ea giminooda ea jeeda mida gheadeenda.