1 Dimotteo 1 - NEAJEEDA EESH BEA BUUNEESSEAN

¹ Aniini Baulo geawoschi gijasoocheanda Yeesu Gristo aba digheanda Aseetta was lealnoocheandeanya ea Yeesu Gristoyda was ghusoodeanya.

² Ea Dimotteo balleandeanyu bea huumwa aba naweeda masaweega. Nyasa dagheerjeandumeeda ea baydeayda ea hoyyooyda leabu heeda Aseetta was Bwaabwa ea Yeesu Gristo was Ng'uttamiideanya.

Rekusiinda appadayda ginealshooda ng'uyyeega

³ Damanda ghayi eaweewi Makkedoniya geamuscheeyi gideaba abiidana Efeso. Ak eara ghamneawa geamuscheey aba gideaba gwanda fiisu anaal ginealshooda ng'uyyeega aghuuma fiisu.

⁴ Ak ea adagang'ulla ng'asheega ghwasildeanga ea iitooda gheambaghweaniga mamudeana jea gweadu sheangnyeeda ak ea mwalooda gil nea mii gheambalmeeda Aseetta mida jeeda masaweega, asi sindunu.

⁵ Gidasibaysiina digheanji ea bariinyeega leabu jeedeesh ea ng'asheega rinna ghuuta miy gil ea masaweega manda gimitunoodabwageaw.

⁶ Buneesuurja iimwanyasa naweeda miy ak gwayamsa geat ng'asheega mwadaagha,

⁷ Saawa gagasa gideaba gayghoaw ginealshoodiga deaweedeeda, ak ea mwanala ng'asheeka baloolean, nea eara ng'asheega baloola nea goomajeeksea ghanyeamwanala.

⁸ Ak geanalli gideaba deaweeda amiy, siida i gadiyeatta aba naweeda hit,

⁹ gagasa eanala ng'asheanji gideaba deaweeda mamiisiina siida doobiiwaat, gamiisa fuga munyas, ea gea mwada geeshta deaweeda, ea fuga mwamwasa Aseetta, ea fuga ring'eega, ea gea sina ng'asheega munyas, ea fuga mabatta Aseetta, ea fuga bara ghweaniga nyaawa, ea inyeesa bara gheamadiga nyaawa, ea fuga nuusa buuneeda,

¹⁰ ea fuga mealuuli, ea ng'eedeeda mealuuli sea niirja, ghana fuga jagwadi suurja, ea gea ng'uyeega, ea fuga akka habeawooda ng'uyeega, ea imiida ng'asheanda wassean maweapchi sea ginealshooda bea huumwaani.

¹¹ Ak gineashooni ea diitta ghayi sigoonan darukwiida Gijasta Miy bea badayda gigheambiita Aseetta diitta mideawa ghawoodean.

Badischeesinda Aseetta aba baydaydaannyi

¹² Aniini geabadischeesi Yeesu Gristoyda was Ng'uttamiideanya goonan uurda aba gideaba ghwadaa geawoschi doobiiwaat, ak ghwayiinan jeeda gadiyeedaanyi.

¹³ Abeeda aniini ghayi amwali nyeesa geanyareesay buuneeda nea geang'eaway, nea geasawanyi ak ghanyaschi baydeayda aba gideaba geasinyi ng'asheesu aba leendeeda, aba gideaba meandeawani masaweega.

¹⁴ Ak ghanyaschi muuchi dagheerjeandumeeda Ng'uttamiideanya, ea masaweega ea barinyeega mida jeeda Gristo Yeesu.

¹⁵ Ng'asheanji huumwa gil, ak gamiisa masooda muuchi gideaba Gristo Yeesu ghwahidu munda ng'eanyiida gwalealu fuga ring'eega, ak siida madeeda aba jeedeaba fiisu ea aniini.

¹⁶ Ak aba seareeni ea naanyaschi baydeada aba gideaba aniineani bea madeedean, ghoadaajiit Yeesu Gristo milightaydaanyi sean, aba heedeanyu, nea ghaahuyi siida iiduw jea etteaschi ak aba heeda fuga jea ghamwas ak ghwanyas eaweega manda mudeanooda.

¹⁷ Mureeda ea gheambiida daba sugoocheanda eaweega manda mudeanooda was dea maygamutmudan, ak ea midachi ninyi Aseetta gil ak ghwahit ea ghwoow eaweega manda mudeanooda. Amin.

¹⁸ Ea balleandeanyu Dimotteo, geagoonyeey digheanji ghoow gidiwshooda appadayda ng'asheega was ramooranga ghayi ashoohu appadaydang'u, ak appadaydeaba suuh gung'uchi muuchi ng'ucheedida.

¹⁹ Ak guhuwi siida masaweega bissa amiy fughara aba gideaba gwanda fuga ninung'waada miyinda fughareeda, hea ghwadatas masaweega nyaawa.

²⁰ Aba jeedeaba fiisu gwanda geaba Himenayo ea Iskanda, ak fiisu eaneasachsi Shattaan aba gideaba gideaba eannaal ak ea mong'eawa Aseetta.