1 Desaloniikke 5 - NEAJEEDA EESH BEA BUUNEESSEAN

Awosa hidaat aba hinnooda Ng'uttamiida

¹ Fuga eaduupcheewi, aba ng'asheega iitta damanda ghana eaweetta jea gawas, moogassi gideaba gaydang'oorneegwa.

² Aba gideaba agooga ghoanalli beadi eaweetta Ng'uttamiida gayghwaanda gidawunniida mareanghweanda eawa.

³ Hean iyayi buuneeda, “Gebeayi weayda nea gebeayi seayu,” deagheatta ghwahidu nyariida badahuukka nyaawa gawuurji gidanyassiida gatmooda lajooda aba jeatta jeepta, ak ea manda gichchea gamulsiinda.

⁴ Ak ea moondani jeeda misaneeda, fuga eaduupcheewi, ea ghwanung' eaweettida ghahameegwa ng'eanyi gawuurji mareanghweanda.

⁵ Aba gideaba agooga oagasean noahuuyi balloojiga weeshinda, ea balloojiga askweari; aseasa mebeahi eaweeda ghana misaneeda.

⁶ Asi adeelilli ruweanga, ea ewuurjeewana buuneeda mwaatkwa, asi eang'ng'weerna, nea geetteennyi.

⁷ Aba gideaba fuga rooji gwarooji eawa, nea eara fuga boogidi iissa gaboogidi eawa.

⁸ Duukku, aseasa deesuwooseewi fuga askwearda, gagasa endeawana gheadeenda, nea geediinyi daghanuunatkaasa igeambooda masaweega ea bariinyeega, nea nngoofanjeandeanya bea gharinyeanda gagasa eanung' ghoaw rarooda jea gweadu lealeanooda.

⁹ Nea Aseetta ghayi masneasa ak abeeda ghwalas uhuudeanya, gagasa eanyasa lealeanooda appadayda Ng'uttamiideanya was Yeesu Gristo,

¹⁰ dea ghayi meah appadahuukkaasa aba ising'eatng'eachchi ghana eella abeeda geendeayi sea niny.

¹¹ Asi daba siisi amajeek nuut ak ea daba siisi adiing'u nuut gageawiit, gawuurji gidoosindi.

Gichchea eabeada aba huydean ea giighatta

¹² Fuga eaduupcheewi, geemuscheegwa gideaba, asissiina mureeda fuga sin gadiyeeda aba jeedeang'wa ak gabiissa gwanda madeedeang'wa aba jeeda Ng'uttamiida nea geewwoowseegwa,

¹³ asissiina mureeda nea ghoawwalli gheang'da aba bariinyeega aba gadiyoojiga nyaawa. Gagasa abeaha weayda nea gobeayi geat.

¹⁴ Ak geemuscheegwa, fuga eaduupcheewi, owwoowsiina gheanyanga fuga ghaleehooda, ommajeega fuga giyoonnyi, aweada fuga ng'arng'ari, ak gimilikghti sea buuneessean.

¹⁵ Ang'ulla siida wassean adaghwawaldaawa ng'asheanda muy dea muy, iissa ghoayaachchi geeshta ng'asheanda miy galeagaseab, agooga nea goobeayi geat ea biissa aba heeda buuneessean.

¹⁶ Ahoosana galeagasean,

¹⁷ amwaasha Aseetta damannyoojiga sean,

¹⁸ abadiischeena aba giliwas gil; aba gideaba nii gidabwariiyda Aseetta aba heedeang'wa aba jeeda Gristo Yeesu.

¹⁹ Adoottealli Gurorooda,

²⁰ adofoolli ramooranga,

²¹ asimsima haleanjeessean; ak ghoang'ng'waanyi ng'asheanda miy,

²² ohhelleewana geat munyinda wassean.

²³ Gagasa ghoammiidu Aseetta mideawa weayda sasanuukkeagwa sean, nea gaba geaw; ak gagasa gahamiyaasiit gamiyeasiidi guroruunatkeagwa ea jeesingeagwa ak geemmajeek nea meerukunana badayda ng'asheega munyas aba damanda hinnooda Ng'uttamiideanya was Yeesu Gristo.

²⁴ Ninyeeda guurneegwa adoabiiwaat, ak gayghoammiineegwa.

²⁵ Fuga eaduupcheewi, amusiischoaweasa.

²⁶ Oakghada fuga siduupcheewi sean aba samooda ghaydit.

²⁷ Geamuscheegwa appadayda Ng'uttamiida, ossomassiina fuga eaduupcheewi sean barawajeanji.

²⁸ Gagasa anyasa dagheerjeandumeeda Ng'uttamiideanya was Yeesu Gristo oogasean.