1 Desaloniikke 4 - NEAJEEDA EESH BEA BUUNEESSEAN

Eaweega bwariiy Aseetta

¹ Aba huuydeayda, fuga eaduupcheewi, geemuscheegwa nea geamiinnyi gheang'deang'wa aba jeeda Ng'uttamiida was Yeesu, ak gawuurji gissinnaaldaneagwa aba heedeanya gidanisiindaneegwa oppiideatta nea gohhoosannyi Aseetta, ak gawuurji gidoosindi agooga, ak gagasa agooga asna muuchchi ea ghwanaawa.

² Nea ghoanalli gideaba ana ng'asha gil ghayi sugoonnyeegwa leabu heeda Ng'uttamiida was Yeesu.

³ Aba gideaba ng'asheesu gea bwariiy Aseetta gil was gimmiinnoodeang'wa, ak gohhelleewi geat hiseadayeandumeeda;

⁴ ak ea daba siisi nal gichchea ghagheanda niny gatmooda aba ghaydidanda ea mureeda,

⁵ nea mii aba geawunda gheang'da muyi, ak gowuurjeewi fuga Emoojiga mwanala Aseetta;

⁶ ak ea manda siida adiiy, ghana godiiysa oorjeeda ghaamwat aba ng'asheanji, aba gideaba Ng'uttamiida dea jea ghawalda mureandoodeaba haleanjeeni seaniini, gawuurji gissibeani eamiinda gheang'deang'wa aba mureeda.

⁷ Aba gideaba Aseetta maguurneasa eppiidana jeeda ririnnyeanda was ng'asheega munyas, gagasa eppiidana jeeda ghaydidanda.

⁸ Nea siida heawa ng'asheesu, ea mwaheawa siida ghaheawa Aseetta, goneegwa agooga Guroroodaannyi Ghaydit.

⁹ Aba iitta bariinyeega oorjooga giyeanya moogassi gideaba gaygang'oorneegwa sii, aba gideaba agooga ninaleagwa Aseetta bariinyeegeaba geat;

¹⁰ ak aba huumwa ghoabwariinyi oorjookkiyeanya sean mida ng'eanyiida Makkedoniya ayda. Asi geemucheegwa fuga eaduupcheewi, gideaba asna ea ghwanaawa nii muuchchi,

¹¹ nea geagasayi goobiitpiit nea ghwasiinda, ak gang'ula ng'asheegeagwa, ak googadiyi aba geatting'eagwa, gawuurji gissurukuteaydi;

¹² ak abeeda gajanyasa mureeda aba heeda fuga emoojiga, ak ea adooghuschi buuneeda aba haleanjeeda.

Hinnooda Ng'uttamiida

¹³ Fuga eaduupcheewi asi aseasa meegassi amoanali gil, aba iitteaba fukka nimeewean, ak abeeda ea mogiisandani fuga mandeawana rarooda.

¹⁴ Ghang'eada dea sumwaseewi gideaba Yeesu ghami ak gwaduudu gichcha, earagwasa, aba naweeda Yeesu, gaygweadu Aseetta sea niny fukka nililiin.

¹⁵ Aba nii geerukuneegwa aba ng'asheanda Ng'uttamiida, bea gideaba aseaseeda suwoschi majeekcheewi, sunung'waneasa heeda ea ghwahidu damanda jea ghwahinna Ng'uttamiidean, majeshsheedeawana fukka ghayi nilil aba jeeda miyeedean.

¹⁶ Aba gideaba Ng'uttamiida gaygwashuubean niny nea gwaleabu humng'eeda ea shookcheanda haw mideawa digheanda, ea nyeashta malaykajeanda haw, sea nyeashta durumbeatteeda Aseetta. Ak abeeda fukka ghayi meewwiisa jeeda Gristohiin gajeshsheeda ettuuttu;

¹⁷ hean abeeda aseaseeda suwoschi majeekcheewiin, suhuuydeannyiin, gajeassealdaneasa sea saawa aba jeeda shamoghuutka, ak geadeapti Ng'uttamiida aba heettiyeada; ak abeeda gajendeawana Ng'uttamiida galeagasean.

¹⁸ Asi ageandeawana geat salgheang'da aba ng'asheesu.