1 Desaloniikke 2 - NEAJEEDA EESH BEA BUUNEESSEAN

Gadiyeeda Baulo aba Desaloniikke

¹ Aba gideaba fuga eaduupcheewi ghoanalli, gideaba gidasupkaandi heedeang'wa mii mwadaagha gil;

² eara gwasa ning'atta sawanadeedeanya nea geappwaaspwaseasa aba Filippi, aba gidoanaldi, hean goomajeegeasa Aseetteanya ak gearukuneegwa giijasta miy bea Aseetta aba madeeda fuga eang'alealleewi.

³ Aba gideaba gissumuschi maleapna heeda ramaseanda ghana ririnyeanda, ghana eesin aba milmilanda;

⁴ gawuurji gidaghayi goondaneasa Aseetta gheatta Giijasta miy, ea gidasurukkwiidi, nea mewuurjeewani fuga ahoosani buuneeda, geewoschi fuga ahoosan Aseetta nal guroruunatkaasa.

⁵ Aba gideaba moang'ng'waa eerukuna ng'asheega ghwarooodeaba geat, aba gidoanaldi, ghana shidoodeaba ghaang', nea Aseetta ea muushoochcheanda gil;

⁶ nea ghanyea miyeegassa gharbeeda aba heeda buuneeda, ghana heedeang'wa ghana hichpa fii suuk, ghana gwadeeppa ea sigasayi aba gideaba gewoschi giijasoodiga Gristo.

⁷ Iissa gewoschi ng'eeni aba jeedeang'wa, gawuurji gidang'ulliida gheamatta diibigaaschi.

⁸ Gwasnu earaseasa geaghuscheegwa aba bariinyeega muuchchi, ak gehoosannyi nea meakghusa goonda giijasta miy bea Aseetta akghwahit, gegonnyeegwa eara guroruunatkaasa, aba gideaba nowoschi fugaasa subwariinyi.

⁹ Ak ghoapkaachchi gissuburdi ea gissisawaneatti, fuga eaduupcheewi; aba gideaba iissa geegadiyi eawa ea askweari, ak ea meesawani siida wassean aba jeedeang'wa, nea geerukkuneegwa giijasta miy bea Aseetta.

¹⁰ Agooga gowoschi muushoodiga, ak gwasnu eara Aseetta, ea gidaghayditta ea gidadoabiiwatta ak gabiissa ea meeyeatteana ghuut searoojigaasa aba heeda fugeagwa mideawa masaweega;

¹¹ aba gideaba agooga ghoanalli, gawuurji ghweanda ea diibigaaschi, iissa geamiinnyi gheang'ba giliwas sih nea geemmajeegiideegwa nea gerekuseegwa

¹² ak ghoabeadi gidahaguuwdaneegwa aba madeeda Aseetta, ghayi guurneegwa agooga ak abeeda goweayi jeeda sugoochcheandumeadaannyi ea gigheambiittaannyi.

¹³ Nea iissa geebadiischeesi Aseetta galeagasean appadaydeaba ng'asheanji, gideaba deanoang'ng'waanyi ng'asheanda Aseetta ghayi oyiing'si heedeanya, ea moang'ng'waaydani ng'asheanda buuneeda ghoanung' gawuurji ng'asheanda Aseetta, biissa gagadiyi aba jeedeang'wa agoogeeda mideawa masaweega.

¹⁴ Aba gideaba agooga, fuga eaduupcheewi, ahuuwa fuga jea godeascheweawa geat ganiisajeega Aseetta aba jeeda Gristo Yeesu mida ng'eanyiida Yudeeya; aba gideaba noanyaschi sawanadeeda uurji diitta aba heeda fuga ng'eang'deang'wa gawuurji gidasissiinda fuga Yahuudi,

¹⁵ dea ghayi nuus sean Ng'uttamiida was Yeesu ea sibanga, ak gooruuttaneasa jarooda, ak ghoanyareas Aseetta nea ghaheawa buuneessean

¹⁶ nea ghoadealeasa aseasa ea meerukusiini fuga Emoojiga gideaba gajeelealu ak gawuurji gili sinnyiit gideenda ring'eega nyaawa. Iiduw ea nihidu nyarasta Aseetta badahuukka nyaawa aba huydeanda.

¹⁷ Hean nea geegeandeawaneasa heedeang'wa, fuga eaduupcheewi, aba gheadi nuwaas, aba saseeda nea mii aba gurorooda gil, geamilikghti nea geegasayi muuchchi aba gassooda haw bea huumwa deakta gheanyangeagwa;

¹⁸ asi geegasayi eepkaana heedeang'wa aniini Baulo, gichcha ea gichcha ghoadealeasa Shattaani.

¹⁹ Neada raroodeanya ea naaha ghana hooseaneega ghana shiipka jea daghwara geaw aba madeeda Ng'uttamiideanya was Yeesu aba hinnoadaannyi? Neada ea mii agoogea?

²⁰ Aba gideaba agooga gowoschi gharbeedeanya ea hooseaneagaasa.