1 Desaloniikke 1 - NEAJEEDA EESH BEA BUUNEESSEAN

¹ Baulo, ea Silwaano, ea Dimotteo, Heeda ganiiseeda Desaloniikke mida heeda Aseetta was Bwaabwa ea heeda Ng'uttamiida was Yeesu Gristo: Gagasa anyasa dagheerjeandumeeda ea hoyyoo.

Eaweega ea masaweega fuga Desaloniikke

² Geabadiischeesi Aseetta galeagasean appadahuukkeagwa oagasean, nea geapkachcheagwa aba jeeda mooshteanya bea Aseetta,

³ nea ghapkachcheegwa aba madeeda Aseetteanya was Ghweanda, gadiyeedeang'wa bea masaweega ea bariinyeegeagwa gadiiyi ea milikghteaydeang'wa bea rarooda aba jeeda Ng'uttamiideanya was Yeesu Gristo.

⁴ Aba gideaba geanalli, fuga eaduupcheewi bwayiiy Aseetta, gideaba niny niloadeagwa;

⁵ bea gideaba giijasteanya miy mwahinna heedeang'wa nea geaghus ng'asheanda akghwahit, ghabwada gwandeawa uurda, ea Gurorooda Ghaydit nea geesikteawi muuchchi. Ak ghoanalli siisi sirguun giduurji jea goobiida heedeang'wa, appadahuukkeagwa.

⁶ Ak ghoahuuyi fuga adeascheeweasa geat ea geeshta Ng'uttamiida, iing'atta nea noang'ng'waannyi ng'asheanda aba sawanadeeda haw, sea hooseaneega Gurorooda Ghaydit;

⁷ hean ghoahuuyi gichchea eegala aba heeda buuneessean mideawa masaweega aba ng'eanyiida Makkedooniya, ea ng'eanyiida Akkaya.

⁸ Ea meakghusa gideaba ghwadambiir ng'asheanda Ng'uttamiida aba heedeang'wa aba Makkedoniya ea Akkaya, iiduw masaweegeagwa aba heeda Aseetta ea niwa mwadi aba daroorakka sean, ea eeyi bwak ea eamudeammuusa eerukuna gil.

⁹ Aba gideaba saawa nea gaba geat gwarukkwiida iitteanya gidaoadeaptaydaneasa aba jeedeang'wa, ea gidooyamsiindi geat Aseetta nea ghoanung'waadi haleanjeeda mawosa Aseetta ak googadiyeesi dea mideawa eaweega ea Aseetta huumwa,

¹⁰ nea ghoammuughu Balleandaannyi jea gwaleabu humng'eeda, ghayi aduunna miyeeda, nea Yeesu gil, lealnaneasa nyarasta jea ghwahidu.