1 Betro 3 - NEAJEEDA EESH BEA BUUNEESSEAN

Gadeemga ea Siyeedinga

¹ Asi eara agooga gadeemga, asissiina siyeendingeagwa mureeda, aba gideaba, iimiida gea masissiina mureeda ng'asheega, geeksu nea manda ng'asheanda geaghus searoojiga gadeemga nyaawa,

² iing'ula mureedeang'wa ea searoojiga miyaas.

³ Suulgeagwa adagabeachchi suulgeapwadaw bea giireetta buudeega ea giishuupta haleanjeeda meang'meang'i ea giishuupta hang'weakka miyaas,

⁴ gammiisa gawos siida funyaat aba gurorooda bea suulga mayghwadattasa ak gabiissa ea ng'eeni nea siindeawoot guroaru, nea aba madeeda Aseetta ea haw sheayeat.

⁵ Nii gidasinniida gadeemga rar Aseetta gil ak gwasin suulga nyaawa nea gwasissa siyeendiga nyaawa mureeda,

⁶ ak gawuurji gidaghayi sissiinda Saara mureeda Abrahaamu, ak gaguura niny ng'uttamiida. Ak ghamneawa goowoschi diibigaaschi iyoosinnyi ng'asheega doabiiw nea moanung' ghoabealeagwa gil.

⁷ Ak gwasnu eara agooga siyeendiga, anala gichchea andeayeena sea gadeemgeagwa aba fughareeda, nea ghoottawji gatmooda mureeda, aba gideaba niny siida mandeawana uurda gil, aba gideaba saawa ea agooga gajahearana dagheerjeandumeeda eaweega, ak abeeda ameateala mooshteang'wa bea Asseetta.

Sawanadeeda aba sinooda ng'asheega doobiiweadi

⁸ Ng'asheanda huydean nii gil, awoosa gilagi, ak goobayiidi geat nea ghoabwariiydi geat oorjoospwa ghaamwadagi, nea goowoschi ng'eeni ak gooyeadayi geat ng'eanyi.

⁹ Adowalliideawi ng'asheanda muy dea muy ghana ging'weakka ea ging'weakka; ghang'wana gidawi ghawooda, aba gideaba geeguurneey appadaydeaba ng'asheanji, ak abeeda ginyasi ghawooda.

¹⁰ Aba gideaba “Gili was sih bwariiy eaweega ak gwadaa askwearjoojiga miyaas, dadeala ng'ushaptaannyi adagwargu ng'asheanda muy ak eara ghuuttaannyi adagwargu milmilanda;

¹¹ ak ea danung'waada ng'asheega munyas ak gwasin gea doabiiw; ak ea dagassa weayda, ak ghwaat geeshta muuchchi,

¹² aba gideaba gheanyanga Ng'uttamiida gang'ula fuga doabiiweadi, nea iidigaaschi ea jaadaat ghwayiiy mooshta Aseetta. Ak gheamamda Ng'uttamiida gwanda badayda fuga sina ng'asheega munyas.”

¹³ Ak ghamneawa gaygwasawaneegwa ng'eaha iyoomilmiliidayi aba sinooda ng'asheega doobiiweadi?

¹⁴ Eara gwasa asawanana appadayda doabiiwnatta, gajeegooneegwa ghawooda. Adoawalli saawa, nea adaghang'udeegwa muuwda,

¹⁵ aba jeesinga guroruunatkeagwa asissiina Gristo mureeda gawuurji Ng'uttamiida. Nea galagasean gowoschi hideadi nea goofurji giliwas sih guurneegwa aba rarooda mida jeedeagwean, ak goosinnyi aba garbabanda ea mureeda;

¹⁶ nea ghoanung' gamiyeasiidi fughareengeagwa, ak abeeda isippwaspwaseagwa, abeeda fukka ang'eawwi alooheedeang'wa aba jeeda Gristoohiin abeeda geanung' ghabwaspwas,

¹⁷ aba gideaba ghang'wana sawanadeeda inyasi aba sinooda ng'asheega miyaas iigidagassiida Aseetta gil, mwasamwa sinooda ng'asheega munyas.

¹⁸ Aba gideaba Gristo eara niny ghami nibwagi appadayda ring'eeda, ninnyeeda doabiiwaat appadayda gea mii doobiiweadi, aba gideaba gweanneassa heeda Aseetta ak geenuus saseadaannyi nea guroroodaannyi geettuudu;

¹⁹ Ak iiduw gawa ak gwaruksa giijasta fukka mida ghealoonigean,

²⁰ suu ammwadi masna mureeda, aba damanda milikghtaawa Aseetta ak gafurda aba damanda Nuuhu, damanda sisna bearakcheanda, nea abeeda fuga ng'ay assis gwaleala aba jeeda beega.

²¹ Gibattiisanda deaschi sea ng'asheesu ghamneawa gwalealneegwa, nea mii gideaba gageandeawa saseeda ririnnyeanda gil geemus Aseetta aba fughareeda miy, aba duunnooda Yeesu Gristo,

²² nea niny eanuwa humng'eeda ak gwanda meatkweeda geattinda dugwa bea Aseetta, sea malaykajeega, ea gheambalmeeda, ea uurda ak gagadiyeesa niny.