1 Betro 2 - NEAJEEDA EESH BEA BUUNEESSEAN

Lagheaneeda mideawa eaweega ea Emeeda ghaydit

¹ Asi ageandeawana geat munyinda sean ea milmilanda sean ea nyootta doobiiwnatta ea shidoodeaba ghaang' ea beeshta sean.

² Gawuurji diibiga manang'i siji ghamneawa, agassa eanooga miyaas bea gurorooda, ak abeeda goohissiini heeda lealeanooda;

³ ak ea noosamu gideaba Ng'uttamiida gwandeawa alooheeda.

⁴ Beenni headaannyi, ninyeeda was lagheaneeda mideawa eaweega, ghayi heawa buuneeda ak aba heeda Aseetta ea siloat ak gaba sheayeeda haw;

⁵ ak goowuurjeewi lagheanga mideawa eaweega, ak geadeaseagwa awosa gheeda gurorooda, ak ghoaw ashoohoochcheandumeeda ghaydit, jea ghoadayda haleanjeeda gurorooda sisappa geadi bea ghadoweeda was gea jea ghamwas Aseetta aba naweeda Yeesu Gristo.

⁶ Geang'waar aba jeeda ng'ooruutka gideaba: “Ng'ulla, ghayiinyi uhuuda Sayuuni lagheaneeda, lagheaneeda washiini, siloat, haw sheayeat, ak gilinyoo ghamwas niny ea mwajeapwaaspwaas.”

⁷ Asi agoogeeda mideawa masawaweega, gaba sheayeeda haw, nea aba heeda fuga mwamwasaan, “Lagheaneeda fool fuga deekshi aniiw lagheaneeda haw washiini.”

⁸ Nea “Lagheaneeda jea gwaruusa buuneeda, lagheaneeda jea ghwanung' goobeedeayi;” ak goobeedeayi aba gideaba masissiina mureeda ng'asheanda, was gissunung' gaweay gwasin.

⁹ Nea agooga goowoschi emeeda siloat, ashoohoochcheandumeeda ambaliischi, emeeda ghaydidi, was fuga Aseetta, ak abeeda goorukkwiidi sinaweagaaschi deamdeameadi was dea guurneegwa arinnana jeeda misaneeda ak gooweayi jeeda weeshindaannyi haw.

¹⁰ Ammadeeda ghayi moowosi buuneeda ak ghamneawa eanoowoschi fuga Aseetta; ammwadi ghayi miyanyasa baydeayda ak ghamneawa eanoanyaschi baydeayda.

Ging'ng'oonyanga Aseetta

¹¹ Fugabwariinyi, geamuscheegwa nea goowuurjeewi rabasta ea fuga mang'aw mulsa haleanjeeda gasa saseeda ng'uchchi sea guroruunatkeagwa.

¹² Andeawana searoojiga miyaas aba jeeda Emoojiga, aba gideaba iisinapsa badahuukkeang'wa ng'uyyeega gideaba goosinnyi ng'asheega munyas, hean iing'ula sinaweegeagwa miyaas ghoaghaambiit Aseetta eaweeda jea ghwahinna.

¹³ Sissiina Ng'uttamiida gadiyeeda aba madeeda buuneeda earea heeda sugoochcheanda haw ambaliischi gil,

¹⁴ ghanea heeda sugoochcheanda haw sichcheagu ak ghwaaga ghoorjooda fuga sina ng'asheega munyasiini ak gwaduumsheesa fukka sina ng'asheega doabiiwiin.

¹⁵ Aba gideaba nii gidagassiida Aseetta gil, gideaba aba sunooda ng'asheega miyaas abeeda geanung' ghwasiinda leendeeda fuga dasheahi.

¹⁶ Oppiideatta fuga abal geat, ak ea mogadiyeattani gibaldeaba geat aba funyooda ng'asheega munyas, asi oppiideatta soomjooga Aseetta.

¹⁷ Asissiina mureeda buuneessean. Abwariinnya fugeagwa. Owwala gheang'da Aseetta. Ottawa sugoochcheanda haw mureeda.

Gissigala sawanadeeda Gristo

¹⁸ Soomjooga, asissiina fugeagwa hees mureeda aba mureeda sean, ea gea miyaas eara heeda fuga jooriischi,

¹⁹ Aba gideaba iissa siida geesikteawa iyapkaat Aseetta, nea ghamilikghta sawanadeeda nea geesawan nea mwadoabiiwa.

²⁰ Aba gideaba gajea alooheemba naaha iyoosinnyi gidamuy nea geabwar nea ghoajeang'di, abeeda noanyaschi alooheeda aba madeeda Aseetta?

²¹ Nea aba nii easuguurnaneegwa, aba gideaba eara Gristo gwasawana appadahuukkeang'wa, ak gagooneegwa gichchea agalana, gideaba gajayaada geeshtaannyi.

²² Niny mii gwasin ring'eeda; ak eara ng'asheanda milmilanda ea miiyeeyiing'sa ghuuytaannyi.

²³ Niny ghayi iisiing'ng'eawi ea miighoodeelda ging'weakka; nea eara iisawana ea miigoomuuw sih; ghaghus ninyeeda laja girgweageeda nea ghoadoabiiw.

²⁴ Niny ghwasar ring'eagaasa aba saseadaannyi aba uhuuda geetta, ak abeeda geemeewayi aba ring'eeda, ak geewoschi majeekcheewi aba doabiiwnatta, aba deanneaduutkaaschi ea siihabeasa.

²⁵ Aba gideaba ghayi nooroottidi gisilga, ak ghamneawa ea noobiiksi Jeagiischoochcheanda was dea fur guroruunatkeagwa.