Yuána Erká 4 - Fayam Midhab Yiesu Kiristoká He Hol Af Iđiny Kaanaká

Gál ˈdéé hótle Hím Naasan Waaˈgiet yé gáá ˈdeˈdeenká hát ke eiy nannasatká

¹ Sheel chia yú gielallo, af giri gálaat hí ˈdéé hót geđuoká haí đo kieye, gaal Hím Naasan Waaˈgieto he ˈdéé ki hogodho, hí chégen. Ebá gáál ˈdéé hótle he af kí dhaayyíe, har gáál ˈdéé hótle ˈdéé hót Hím Naasan Waaˈgiet yé gáá ˈdiiyyeká kátaka. Hééllá he ˈdaa giri gál burnay-, hođomlé-, hol gál Waag hí ˈdeem ká shigicheká hoyká biiy gaa ijoká.

² Gaal har gál Hím Naasan Waaˈgiet ˈdéé ki hogodhoká kátaka, hát ke eiy naasatká hééllá: Ameeny máá hééllá ˈdúúw hođisat-, kieye, Yiesu Kirísto hé gon kaadhdhe, lésallá gaa ˈdalidhe, yegetká, máá kinaallá Hím Naasan Waaˈgieto he ˈdéé ki hogodho.

³ Tá ameeny gál Yíésu ˈduuwlééllá điidhoká, hé Hím Naasan Waaˈgiet ˈdéé ma ki hogon. ˈDéé hót gaalí hogodhóóllá Yíésu kídhíchlé he yé gáá ˈdiiyye. Kídhíchallá he máá ˈdeenyle hí maalle-, ká yiimet-, tá káána úba hátle les gaa ijoká.

⁴ Umééllo, itín hí gál Waaˈgiet, ití gál mú ka kídhallá ká adhate. Hééllá he ˈdaa giri Máá hí geer gaa ijóóllá kídhíchlé les gaa ijoká far ˈdú gogoká.

⁵ Gálallá íín lésallá ˈdaallé he ki ˈgee, in hé lesalloká hogodho, les hí af nee kokoyyo.

⁶ Múún ke um Waaˈgiet, máá Waag ógká af nee gáál kokoo. Tá máá veel Waaˈgiet muuninyká hé gáál af nee ma kokony. Hatallá in máádhat ˈdeenylé he hogodhoká har Hím Naasan Waaˈgiet ˈdúwáállá yé gáá ˈdiiyyeka, héétí har mú ˈdeenyle máá kídhích Waaˈgiet hódho lééllá yé gáá ˈdieka, in ke hol eiy gaa nannata.

Gielmit Waaˈgiet

⁷ Sheel chia yú gielallo, ˈdaa giri gielmít Waag yé gáá ˈdeˈdeenká, kí hol geelnet. Ameeny máá gielmít ˈguoká he máá ˈdalmaat Waag yé gáá ˈdiiyyééllá ˈdalidhe-, Waag ógká.

⁸ ˈDaa giri Waag íín he gielmítiká, máá gielmít mánká hé Waag muog.

⁹ Waag hát muun gáál gielmít argisicheká hééllá, giri kieye, Waag Inylé ali ka takachká lésallá ali ˈdu gáá kaayye, giri ke mú ˈdaalle ki ijo-, ke luolmit biiyoká ˈguoká.

¹⁰ Waag gielmitle he hatallá, hé muun erro ke Waag geelnedhe muuniny, Waago muun gáál er geelnete, Inyle ali gáá kaayye, giri mu suor yeget-, mu ađaabanokúnno ubaa nyuogimkúnno ewle higidhoká.

¹¹ Sheel chia yú gielallo, ˈdaa giri Waag gáál hatal gielká, muun úba kí hol geelnet.

¹² Hé máá níínní kálta Waag il ki argeká mán. Tá muun har ki hol gielnítaka, Waag hé gáál gaa iđo, gielmitle muun gáál hidh ki ariyye.

¹³ ˈDaa giri Waag Hím Naasanle gáál ka shiichééllá, in ke hát ki mú gaa ijo-, mu íín úba gáál gaa ijoká ke og.

¹⁴ Hát ˈJaakúnno gáál Inyle ali ˈdu gáá kaay-, mu les Máállé Rubachietká yíéllá nyáá nyí ˈduuwle argiyye, nyí hogoto.

¹⁵ Ameeny máá Yíésu hát Iny Waaˈgietká ˈdúúw hođisatká, máá kinaallá íín Waago hí gaa iđa, íín úba Waago he gaa ija.

¹⁶ Gielmit Waag hí gáál ka ˈgayyóóllá hé ke óg, úba hé ke iiy yie. Waag he gielmíti. Ameeny máá gielmitééllá ˈguo-, ki ijoká, máá kinaallá Waago gaa ija, tá íín úba hé Waag hí gaa iđo.

¹⁷ Hatallá in gielmít muun gáál hidh ki ariyye, giri kúlích ˈdéé ki iđinyká ki sierm mánká. Hé kinaallá he ˈdaa giri muun hát Yíésu hí ijoká ke lésallá ki ijoká.

¹⁸ Gielmit hatallóóllá hé sierm mán. Gielmit ˈdúwáállá íín siermo he aruanna. Gálaat íín ˈdéé ki iđinyo he siermle ˈgaa. Aaléka, gál siermééllá ˈguoká hé gielmit ˈdúwáállá hí hát ˈdabaanká hidh ma ki arîny.

¹⁹ ˈDaa giri mu íín er gáál gielká in múún úba ke gielmít ˈgaa.

²⁰ Har máádhat kieye, Yáá Waag giel, yeget-, kor nyárle nebítaka, máá kinaallá he máá hódholléká. Máá nyárlé il ki argoká ma geelnenyká, hé hát níínní Waag he il ma ki árginyká gielká mán.

²¹ Aalé Waag hé gáál hemuritééllá ká shiiche, hemurit kieye, máá Waag gielká hí nyárle úba geelnew, chieká.