Yuána Erká 1 - Fayam Midhab Yiesu Kiristoká He Hol Af Iđiny Kaanaká

Yíésu he ˈDeeny Luolmiti

¹ Nyiin Máá erkob-, Waag hátlé hé níínní ka kuonne mánká ali ije-, nyí ageerle nee kokoyye-, ubaa nyí il ki argiyyeká fayamle ke hí ki ˈdiyime. Máá ˈDeeny Luolmiti lééllá nyáá nyí argiyye, nyí gilkínyo ki chiichirate.

² Máá gáál luolmít shigúóllá hé Waag hí nyí yé ˈdu gáá ˈdeeyche, nyáá nyí mú argiyye. In aalé mu íín hát luolmit biiyo-, ˈJaa kúnnaa Waag hol af ije-, ˈJaa kúnnaa kinaal hí nyí yé ˈdu gáá ˈdeeyká ke hí ˈduuwle geđia, ke hí ki ˈdiyime.

³ Hé nyí argiyye-, ubaa nyí maalleká ke hí ki ˈdiyime, giri itín ubaa nyiin ke hol ˈdú faan-, ke tikiˈd yegetká. Aalé hát káána nyiin nyí ˈJaa kúnnaa Waag ubaa Inylé Yiesu Kirísto hol ˈdú faannééllá, hol ˈdú famit kúnnaa kinaallá hé ˈJaa kúnnaa Waag ubaa Inylé Yiesu Kirísto hí gaa ijo.

⁴ Hééllá nyí verennóóllá he giri múún ger gáál hát ˈdabaanká gaa memeetká.

Édhúm Waaˈgiet gaa iđiny

⁵ Fayam nyí Kirísto gaa maalle-, ke hí ki ˈdiyeenallá he fayam kieye, Waag he édhum, Waag dhúrle hé hé níínní gaa nyakarich hí gaa ijoká mán.

⁶ Har ki kieye, hé ke Waag hol ˈdú fame, ke yeget-, kor ke bííy gaa ongʼoˈdeká gaa seseenka, af kinaalka hódho ke hogodho, hé ke hé ˈdúwaká ma ekemeny.

⁷ Tá har hát mu íín édhum gaa ijóóllá muun úba ki édhum gaa seseenka, af kinaalka hé ke mú hol ˈdú fame, ke tikiˈd yie, tá mú Inylé Yíésu fásle nyuogimkúnno ubaa ađaabanokúnno lulle hai gáál gaa dhiira.

⁸ Har ki kieye, hé ke nyuogim ubaa ađaabano mán ki yieka, af kinaalka hollo ki hol nyimite, ˈdeeny ˈdúwa-, Kiristóóllá hé gáál ma gaa iđiny.

⁹ Tá ke Waag makan fame-, hát ke he ˈdeeneyká ke Waag geeyka, Waag he Máá ˈdúwa-, taglé-, nyuogimkúnno ubaa ađaabanokúnno ˈdaalleka, gáál ˈdú ˈjeˈjeen-, gáál nyuogim ubaa ađaabano lulle gaa dhidhiroká.

¹⁰ Har ki kieye, hé ke nyuogim ubaa ađaabano ma híliny, ki yieka, af kinaalka Waago ke máá hódholléká hoy, mú ˈdeenyle hé gáál ma gaa iđiny.