Yuána 9 - Fayam Midhab Yiesu Kiristoká He Hol Af Iđiny Kaanaká

Yíésu máá in mannayká in kaay

¹ Aaléka, Yíésu sienylé he gaa igireká, máá in mánt kí ˈdalidheká arge.

² Yíésu lalille hí heete, gaal kieye, Máá gáál he oonisúóllo, máállá in mánt kí ˈdalidhééllá ííni ađaabano híléê, ebá gál hí ˈdaleká ađaabano hile, mú in mánt kí ˈdale? gaalí yie.

³ Yíésu gáál geey, kieye, Máállá hatallá ka ˈdalidhééllá, hé kieye, mu íín ubaa gál hí ˈdaleká ađaabano hile muuniny. Hééllá he ˈdaa giri Waag fargogintle mú hujich gaa nanniyyo-, gálaat hí aargiroká.

⁴ Biiy hátlé kulichká taalle Máá ye ali gáá kaayká kí hújíchle naannuo. Chúúré gálaat hí hujich ma gaa nanninyká ali hai kí ˈdeenne.

⁵ ˈDaab yú lésallá gaa ijóóllá yú he les édhúmlé, Yíésu hí gáál yie.

⁶ Aalé mu hatal yieká, đo abarany les ki lay, abarany eeˈd hol ki ˈdaaˈdie, sháˈd hoy, máá giri in mánká in gaa liilie,

⁷ mú geey, kieye, Sí, naˈbual Siloom in gaa ˈjío, yie. (Síloom hélle kieye, Ali gaa kaany.) Aalé máá giriká sedhe, ˈjidhdhe, gagalóóllá hé biiy gaa argoká.

⁸ Mú olle ubaa gál urgúaka mu rogonmeká mú aargireká hol yiete, kieye, Hééllá hé máá tikiˈde-, les ije-, rogonmeká muunîny? hol yie.

⁹ Gáál ˈdáá tikiˈd kieye, He mu ííni, yie. Gáál ˈbaal kieye, Hé mu íín muuniny, mu taalle mú hollo hol ki egínta, yie. Máá giriká dhúrle kieye, Yú he máá kinaallá, yie.

¹⁰ Gaal mú yiete, kieye, Tá háteeye in kaate? gaalí mú yie.

¹¹ Mu gáál geey, kieye, Máá gaalí Yíésu yegetká sháˈd tág koy, ye sháˈd in gaa liilie, kieye, Sí, naˈbual Siloom in gaa ˈjío, ye yie, in yú đo sedhe, ˈjidhdheká đo biiy gaa arge, muí gáál yie.

¹² Gaal mú yiete, kieye, Mu káána ále gaa ija? yie. Aalé mu kieye, Mu ál gaa ijoká yáá muog, yie.

¹³ Aalé gaal máá biiy gaa arge kinaal gál Farisaay ˈdú eedhdhe.

¹⁴ Kúlích giri Yíésu hí sháˈd tág gaa koy-, mú in yé ka ˈdeeyká he Kúlích Hef ˈGisanká.

¹⁵ Aalé gál Farisaay mu hátlé biiy gaa argeká úba mú yiete. Máá giriká kieye, Mu sháˈdo ye in gaa liilie, aalé yú ˈjidhdheká đo káána biiy gaa arga hállá, yie.

¹⁶ Gál Farisaay ˈbáál kieye, Máállá ˈdaa giri Kúlích Hef ˈGisanká nyátálle ma ki yaalinyká, hé gon Waag ma gáá yímen, yie. Gáál ˈbaal hí kieye, Mu har máá ađááb ˈguoká kátaka, mu háteeye hé gálaat af ˈdaˈdabsúóllá ekemeye? yie. Gaal đo hol af ká điidhe, eiy ˈgite.

¹⁷ Gaal geđi máá biiy gaa argeká yiete, kieye, Mu in ko in yé ká ˈdeey háluke, kó mú héllé nyí ká geđichoká mán? gaalí mú yie. Mu gáál ˈdéé hol ˈdú nie, kieye, Mu he máá Waag hí ˈdeem ká shigichoká, yie.

¹⁸ Gál Yuuˈdi kinaal hát mu kis in mannay-, tá káána in kaadhdheká hé hátle hí mé ma ki síen, gaal đo gál mú ˈdaloká gálaat ali ˈdú fie.

¹⁹ Aalé gaal gál mú ˈdaleká yiete, kieye, Hééllá iny kíchia-, hí hogote-, in mánt kí ˈdalidheká? Tá mu háteeye biiy gaa arge? gaalí gáál yie.

²⁰ Gál mú ˈdaloká gáál ˈdéé hol ˈdú nie, kieye, Máállá hát he inykínyo-, tá in mánt kí ˈdalidheká nyáá nyí óg.

²¹ Tá mú biiy gaa arginyle ubaa máá mú in eiy ˈdeeyká nyáá nyí muog. Mu íín hé guđo, yietíe, hí ká geeyo, gál mú ˈdaloká hí gáál yie.

²² Gál mú ˈdaloká hatallá yíéllá, gaal gál guguđo-, Yuuˈdiká he kiadhe. Hééllá he ˈdaa giri gál Yuuˈdi kis ˈdéé muˈde-, kieye, Máá kieye, Yíésu he Messíya, yeetká, ˈbíl ˈdiiyiminyká ha gaalí gaa aruma, yieká.

²³ ˈDaa kinaallá ˈdugaka in gál mú ˈdaloká kieye, Mu hé guđo, mú itle hí yietíe, gáál yie.

²⁴ Aalé gaal geđi máá biiy gaa argeká ká vie, geey, kieye, Ebá Waag ˈdúo, hé ˈdúwaká húógot. Nyiin íín máá kinaallá hát ađaabano ˈguoká nyáá nyí óg, gaalí mú yie.

²⁵ Aalé máá giriká kieye, Mu ađaabano ˈgaakaʼ, mánkaʼ, yáá muog. Tá hé yú ógká íín tikiˈde, yú érléká yáá in mannay, kor káána yáá biiy gaa arge, gáál yie.

²⁶ Gaal đo kieye, Mu meete ko ki ekey? Mu háteeye ko in yé ká ˈdeey? gaalí mú yie.

²⁷ Aalé mu kieye, Yáá hí kis geey, kor it ye af nee ma kôny. Tá háteka geđi hí mamalloká hí feˈdéel? Itín úba hí mú lalille chegetoká hí féˈde? yie.

²⁸ Aalé gaal đo mú chaarim ˈdú mure, kor kieye, Kúúni mú máá lalillé. Nyiin íín, nyí lali Moshe.

²⁹ Móshe hát Waag hol geđieká nyáá nyí óg, tá máállá ál he gáá yimieká nyáá nyí muog, gaalí mú yie.

³⁰ Máá giriká kieye, Hééllá he hé ki af ˈdaˈdaboká! It ál muí gáá yimieká muog, kor mu hé ye in yé ká ˈdeey.

³¹ Waag hát gál ađaabano ˈguoká af nee ma kokonyká hé ki óg. Waag máá hí kikiat-, Waag hát feˈdoká el gaa igiroká he af nee kokoyyo.

³² Máá in mánt kí ˈdalidhe-, kor gaalí in kaayká hé kálta máá hí maaleká mán.

³³ Máállá Waag ma gáá yimenka, hé onnônyka hééllá ma ekemêny, muí gáál yie.

³⁴ Gál guguđo Yuuˈdiká hatal muí yieká kieye, Kúún in ađaabano guđoká kí ˈdalaate háluke, tá har nyí ki ˈdiyeenne! gaalí mú yie. Gaal đo mú ˈbíl ˈdiiyiminyká gaa arie.

In mant gálle Waag ˈduuwle ma kiimisanká

³⁵ Aalé Yíésu máá in kaayká hát gaalí ˈbíl ˈdiiyiminyká gaa arieká maale. Yíésu mú bííyle mé nie, mú yiete, kieye, Kó Iny Máádhat iiy chie? yie.

³⁶ Aalé mu kieye, Máá Guđo, máá kinaallá mááya? Mú ye ka géesh, mú iiy yeedhe, yie.

³⁷ Yíésu mú geey, kieye, Kó mú argiyyo, mu he Máá hí hol geđicháállá, yie.

³⁸ Aalé máá giriká kieye, Máá Guđo, yáá ko iiy yie, yie, đo mú ˈgas met les kurram gaa ˈdoy.

³⁹ Aaléka, Yíésu kieye, Yú gálaat ˈdéé eiy ki ními ˈdaalle ˈdugaka in lésallá ká yimie, giri gál in mánká in hí yiem ká ˈdeˈdeen-, gál in ˈguoká in ˈdaˈdaboká, yie.

⁴⁰ Gál Farisaay Yíésu hol ˈgieká ˈbaal ˈdeenyéél Yíésu hí hodhe-, maaleká kieye, Héél kor háteeye? Nyiin úba inno nyí maníta? mú yie.

⁴¹ Yíésu kieye, Itín hí in mannânyka it onnônyka ađááb mán, kor káána hí kieye, Nyáá nyí biiy gaa argiyya, hí chegedhe háluke, ađaabanokícho hé itle hí gaa iđo, Yíésu hí gáál yie.