Yuána 4 - Fayam Midhab Yiesu Kiristoká He Hol Af Iđiny Kaanaká

Yíésu ubaa min Samaria hol geey

¹ Yíésu hát lali ilishká Yuána ˈdú arge-, bie gim nannieká fayamle gál Farisaay hí maale.

² Tá Yíésu dhúrle íín hé gál bie gim nannieká mán, mú lalille tákáma gálaat bie gim nanniyye.

³ Aalé mu hát gál Farisaay fayam kinaal maaleká onnoyká đo lés Yuuˈdia gaa kie, lés Galilaaya geđi hol ˈdú nadhe.

⁴ Mu lés gaa nanadheká he lés Samaria.

⁵ Aalé lés Samariaka, mu ény gaalí Súkar yeget-, lés héle Yákob hí inylé Yúósef shieká kí ˈjób mare álle nyuore.

⁶ Ál kinaallá hé él Yakob hí gaa yiel. Aalé ˈdaa giri Yíésu sieny mé ˈdéral hí ˈgorosieká đo él kinaal af yíéđie. Hé kinaallá he aadh ˈgas tomon a naama gelgaká ˈjobínti.

⁷ Aalé min Samaria mare éél ká helle, Yíésu min yiete, kieye, Minnééllo, ye bie shíish, yie.

⁸ Af kinaallá lali Yiesu íín ˈjienno siete, ˈguomo ˈdú maˈde.

⁹ Aalé min kieye, Kúún he máá Yuuˈdi, yú he min Samaria, tá háteeye ye bie hegesetóol? chie. Min hatallá chíéllá he ˈdaa giri gál Yuuˈdi gál Samaria egesheyo-, gáál gil geerle he ma gaa igiminy-, ubaa he ma gaa kokonyká.

¹⁰ Yíésu min ˈdéé hol ˈdú nie, kieye, Kuun har hé shiicho Waag hí gálaat shigichoká ubaa máá ko geđuo-, ye bie shíish yíéllá onnônyka, kó onnônyka mú heesete, mu ko bíé gálaat luolmít shiguoká shie, Yíésu hí yie.

¹¹ Aalé min mú heesete, kieye, Máá Guđo, eel in gaa ˈder, kuun hé bie kí armisatoká in man háluke, tá bíé gálaat luolmít shiguoká ále gáá egeyye?

¹² Kuun eshi eshim kínyaa Yákob giri nyí élallá ka shie-, íín ubaa umle tá aanyle élallá igimeká ha ˈdú guđínta? chie.

¹³ Yíésu min ˈdéé hol ˈdú nie, kieye, Máá bíéllá ˈjioká geđi báre haí cheese,

¹⁴ tá máá bíé yú shuoká ˈjioká hé geđ báre hí ma chiesiny. Bíé yú mú shuoká hát haˈd fefeennokáka, mú hai gaa ija, mú luolmit biiyoká hai shigia, yie.

¹⁵ Aalé min Yíésu geeyche, kieye, Máá Guđo, bíé hogotóóllá ye shíish, báre geđi hai ye chíésiny, yú élallá ka héliny, chie.

¹⁶ Yíésu min geey, kieye, Sí, bélkú ká veʼ, hol ka eedhdhíe, yie.

¹⁷ Min Yíésu geeyche, kieye, Yáá béél mán, chie. Yíésu kieye, Yáá béél mán chíélláka, hé ˈdúwaká hote.

¹⁸ Kúún gál ko shuunneká chen, tá máá káána ko ˈgúóllá hé bélkú muuniny. Ál kinaalláka, kó ˈdúúw hote, Yíésu hí min yie.

¹⁹ Aalé min kieye, Máá Guđo, kuun yú ko dhaayká gon máá Waag hí ˈdéé ka shigichoká.

²⁰ Eshim eshimkínyo gúmallá ˈdugo he Waag gaa vivite, kor it Yuuˈdiká hí kieye, ál gálaat hí Waag gaa vivisatká Yerúsalemo hí chie, min hí Yíésu chie.

²¹ Yíésu kieye, Minnééllo, hé yú ko geđúóllá ˈdúúw hósso, bár gúmallá ˈdug ubaa Yerúsalem hí ˈJaa kúnnaa Waag ma gaa viisanká ali hai kí ˈdeenne.

²² It Samaríállá hé hí muogká hí vivisata, nyiin íín hé nyí ógká nyí vivisata, ˈdaa giri rubach gál Yuuˈdi yé gáá ˈdeˈdeenká.

²³ Bar ali hai kí ˈdeenne, kor úba káána hé ali kí ˈdiiyye, giri gál Waag visan hí ˈdúwaká ˈdaa Hím Naasan Waaˈgiet-, gáál Waag ˈduuwle kí eedhesichoká ˈJaa kúnnaa Waag ki vivisatká. Gál hatallóóllá in ˈJaa kúnnaa Waag hí hol gaa ˈgeˈgedhe, giri gaal mú vivisatká.

²⁴ Waag he Hím Naasan gálaat luolmít shigichoká. Aalé gál mú vivisatká hí ˈdaa Hím Naasan Waaˈgiet-, gáál Waag ˈduuwle kí eedhesichóólláka hí gerle Waag ki vivisat, Yíésu hí min yie.

²⁵ Aaléka, min Yíésu geeyche, kieye, Máá gáál ririan-, Messíya Kirísto léká, hát ka yiimetká yáá óg. Mu ká ˈjieka, he met lulle eiy ha nyí kí nannaa, min hí chie.

²⁶ Aalé Yíésu min geey, kieye, Yáá ko geđúóllá, he mu ííni, yie.

²⁷ ˈDeenyéél hátle Yíésu hí af ká ˈgaa, gál láliká đo ali kí ˈdie. Gaal Yíésu min hol geđia-, argeká gil hí af fame. Tá gaal hé máá níínní Yíésu yiete-, kieye, Min meete hí hol ká ˈgayya, muuninyka, meete hí min hol geđicha? mú yieká mán.

²⁸ Aalé min ibillé bieká ál kinaal ki hayche, ˈjien hol ˈdú naate, gálaat geeyche, kieye,

²⁹ Ka kée, máá hé yú eekemeteká lulle el gáá huogodhéél argáa. Messíya taalle héél máámaʼ? chie.

³⁰ Gálaat ˈjien gaa kie, Yíésu bííyle mé nie.

³¹ Min hátle biiy ki laʼ, Yíésu lalille hí geey, gaal kieye, Máá gáál he oonisúóllo, hé geere kom, gaalí mú yie.

³² Yíésu gáál geey, kieye, Yú yáá ˈguom itín hí muog-, kokuoká ˈguo, yie.

³³ Aalé gál láliká hol yiete, kieye, Mú kor máádhato hí ˈguom ˈdú gáá sidhe? hol yie.

³⁴ Yíésu kieye, Hújích Máá ye ali gáá kaayká hí ye gaa fedo-, yú nannuo-, yú beđisatká in ˈguomchú.

³⁵ ˈGuom fímle tá ˈjíig ˈguom mé ˈdonyle ˈguiyam hí afur, hí chegedhe, muunîny? Tá yú hí geeye, in eiy ˈdeeyyíe, lesam dhaayyíe, ˈguom mé ˈdonyle aleđuđugulle hé ali kí ˈdiiyye.

³⁶ Máá ˈguom mé ˈdaraanká hé símísle he gaa arge, ˈguom ˈdaa luolmit biiyoká ki đuorie. Hatallá in máá ˈguom fafuoká ubaa máá ˈguom mé ˈdaraanká hol ˈgar geyyime.

³⁷ Aalé ˈdéé hót kieye, ˈGuom mú tikiˈde hí fafaa, máá hí mumuro-, hí đođoruoká taaka, chieká, hé ˈdúwa.

³⁸ Yáá hí alb fie, giri ˈguom símísle hí ma dhíírinyká, hí mumuˈda-, hí đođorichoká. It hújích gál éíy taaka hí nannieká hurt hille, Yíésu hí lalille yie.

³⁹ Aaléka, gál Samaria burnay-, ˈjien kinaalloká min ˈdeenylé hote-, kieye, Mu he lullé yú eekemeteká he el gáá huogodhe, chieká, gaal đo min ˈdeenylé kinaal mé ki eedhdhe, Yíésu iiy yie.

⁴⁰ Aalé gál Samaria Yíésu ˈdú sedheká, mú gil ki efe, giri mú hol af yíéđianká. Yíésu đo gáál hol ram naam af rafe.

⁴¹ Yíésu ˈdeenylé hogodheká ˈdugaka, đo gál burnayká hí iiy yie.

⁴² Aalé gál Samaria min giriká geey, kieye, ˈDeeny kua nyí ka geeycheká úba kí hayo, káána mú ˈdéé hótle nyáá nyí nétkínyo ki maalle, máállá gon he Máá lésallá ririanká, gaalí min yie.

Yíésu máá kansich mare inyle bisie

⁴³ Aalé rám naama kinaal ˈgiteká Yíésu ál kinaal gaa kie, Galilááya mé nie.

⁴⁴ Aalé Yíésu dhúrle kíssóótí hé hodheká kieye, Máá Waag hí ˈdéé ka shigichoká ˈduuwle hé gál lésle hí muogo, he yie.

⁴⁵ Aalé mu Galilááya ki ˈjieká mú gál Galilaaya hí mé guđáan yie. Hééllá he ˈdaa giri gaal ˈjila gaalí Yerúsalem gaa nanateká álle gaa ije-, he lullé muí ál kinaal gaa eekemeyká argeká.

⁴⁶ Yíésu geđi ény Kanna giri lés Galilaaya-, álle bie hol gaa lay-, bie ˈdúú yieká hol ˈdú nadhe. Kafarnáum giri ény Kanna kí ˈjóbká álle hé máá kansich iny hí ki kulnadhe mare hé hí gaa ije.

⁴⁷ Máá kansich kinaal Yíésu hát Yuuˈdía gáá yimie-, lés Galilaaya kí ˈjieká maaleká đo Yíésu ˈdú sedhe, mú gil ki efe, giri Yíésu mú inylé mú gil ki ayaˈgeká bííyle mé nannuo-, biisuoká.

⁴⁸ Aalé Yíésu mú geey, kieye, Itín ˈdaab hé hí il ki aargiˈda-, hí af ˈdaˈdabsuoká hí ye ma gaa árginyká it ye iiy ma chegen, yie.

⁴⁹ Máá giri kansichká Yíésu geey, kieye, Máá Guđo, sí kí siet, inychú hátlé sidh hí ma ˈgînká el ˈdú hil, yie.

⁵⁰ Yíésu mú ˈdéé hol ˈdú nie, kieye, Sí, inykú hé hím nie, yie. Aaléka máá giri kansichká ˈdéé hót Yiesu kinaal iiy yie, kie, sedhe.

⁵¹ Máá giri kansichká hátlé ˈgierich gaa igireká gállé gédeká hol met kí ˈdoy, gaalí geey, gaal kieye, Inykú hé hím nie, gaalí yie.

⁵² Aalé máá giri kansichká aadh ˈgas inyle hí hím gaa nieká gáál yiete. Gaal mú geey, kieye, Inykú gefere aadh ˈgas tikiˈde gelgaká bólo hí ˈgey, gaalí mú yie.

⁵³ Íny ˈjaalle aadh ˈgás kinaal tuuˈdle hát Yíésu hí gaa geey-, mu kieye, Inykú hé hím nie, muí yieká, đo og. Mu íín ubaa ˈbíl geerle đo Yíésu iiy yie.

⁵⁴ Hééllá hé ki naama-, gálaat hí af ˈdabe-, Yíésu geđi lés Yuuˈdia hol gáá nadheká muí lés Galilaaya gaa ekey-, mu gálaat ˈduuwle argisieká.