Yuána 3 - Fayam Midhab Yiesu Kiristoká He Hol Af Iđiny Kaanaká

Nikoˈdémos ubaa Yíésu hol gééychollé

¹ Ál kinaallá hé máá Farisaay-, gál Yuuˈdi-, gállé arra-, máállé gaalí Nikoˈdémos yegieká hé hí gaa ije.

² Mu chúúre tikiˈd Yíésu ˈdu gáá yimie, kieye, Máá gáál he oonisúóllo, kuun hát Waag gáá chimie-, gálaat he oonisichoká, nyáá nyí óg. Hé máá níínní Waag hí gaa líítaka, hé ke af ˈdaˈdabo-, kuun hí ekemeychóóllá ekemeyoká mán, yie.

³ Aalé Yíésu mú ˈdéé hol ˈdú nie, kieye, Yú ko ˈdúúw geeye, máádhat ˈdaab geđi ma ka ˈdaláanká hé hát níínní Guch Waaˈgiet aargiroká mán, yie.

⁴ Aalé Nikoˈdémos mú yiete, kieye, Máá guđandheká háteeye geđi kí ˈdalmidha? Máádhat hé hát níínní ˈjielle geer higilo-, tá geđi kí ˈdalmaatká mán, yie.

⁵ Yíésu mú ˈdéé hol ˈdú nie, kieye, Yú ko hé ˈdúwaká geeye, máádhat ˈdaab bie ubaa Hím Naasan Waaˈgiet ma kí ˈdaláanká hé hát níínní Guch Waaˈgiet higiloká mán.

⁶ Máádhat íín máádháto hí ˈdale. Máá veel Waaˈgiet yieká íín Hím Naasan Waaˈgieto hí ˈdalle.

⁷ Aaléka, hát yú ko geey-, yú kieye, geđi kí ˈdalidhíe, yú ko yíéllá, ha af ˈdábiny.

⁸ Waanich állé fedoká he ˈdú ˈdarama, ka ˈdaraanká kó maallo, kor ál he gáá ˈdoyká ubaa ál mé nannuoká kó muog. Hát tikiˈdééllá in kuun máádhat hát Hím Naasan Waaˈgiet kí ˈdalmaatká muog, Yíésu hí mú yie.

⁹ Aalé Nikoˈdémos mú yiete, kieye, Héél kor háteeye? yie.

¹⁰ Yíésu mú ˈdéé hol ˈdú nie, kieye, Kuun in máá gál Yisirayel he oonisuoká háluke, tá háteeye héél eiy ma nannasan?

¹¹ Yú ko ˈdúúw geeye, nyiin hé nyí ógká in nyí hogoto, hé nyí ˈdúúw ˈdú ˈdiiyyeká in fayamle ki hí geđia, kor it hé ki hí geđuoká iiy ma chegen.

¹² Yaalmit lesalloká yú hí geeyká in hí iiy má cheen háluke, tá háteeye, yaalmit uriet-, yú hí ka geđuoká hí iiy chegedhe?

¹³ Hé máá níínní úr mé nieká mán, Máá úr gáá leedheká tákáma. Máá kinaallá he Iny Máádhát.

¹⁴ Hát tikiˈde Móshe gibit chár tág gaa nieká ˈgór ˈdú ˈdoy-, ˈbakat álle úr ki eeyká, in Iny Máádhat úba gaalí hát kinaal úr ki egee,

¹⁵ giri ameeny gál mú iiy yeetká luolmit biiyoká aargiroká, Yíésu hí Nikoˈdémos yie.

¹⁶ ˈDaa giri Waag gálaat lullé les gaa ijoká súm gielká in gáál Inylé ali ka takachká ká shiiche. Máá Íny iiy yeetká sídhle hé ma baađany, taalle luolmit biiyoká hai gaa yíéđima.

¹⁷ Waag Inyle ali gáá kaayyééllá hé gálaat ˈdeđensetoká ma ka múriny, Íny ˈdaalle gálaat rubach ki shigichoká he feˈde.

¹⁸ Máá Íny iiy yeetká hé Waag hí ma ˈdeđensen, tá máá Íny iiy ma yéenká hé hátle Waag hí ˈdeđenseto, ˈdaa giri mu Waag Inylé ali ka takachká iiy ma yéenká.

¹⁹ Waag gálaat ˈdeensenle hé igiˈdoká hééllá: Waag édhúmlé ˈdúwaká íín hé les ká hile, kor ˈdaa giri gálaat héllé ekemeyoká lúl gaa nyakarichká, gaal hé édhum ma géélnen, gaal bííy gaa ongʼoˈdeká he geelney.

²⁰ Máá hé ˈdeđewká gaa seseenká hé édhum néb, hé édhum álle yé ma kí ˈdeˈdeminy. Hééllá he ˈdaa giri mu héllé ˈdeđew-, he ekemeyoká ka eedhdhewká ma fedinyká.

²¹ Tá máá hé ˈdúwaká el gaa igiroká in édhum álle yé ˈdú ˈdeˈdeme, giri héllé eekemeyká ˈduuwle hát ˈdaa Waaˈgiet ki ekeyká gálaat hí kiimisatká.

Yuána fayam Yiesu gálaat geey

²² Hééllá lulle el ˈdaal Yíésu ubaa lalille kie, lés Yuuˈdia geerlé kinaallá ˈjienlé mare ki fame, ál kinaal ram ki kaadhdhe, gálaat bie gim naannie.

²³ Yuána íín ál gaalí Áíynon yeget-, Sálim kí ˈjób-, bie hí burnay mare he gálaat bie gim gaa nannie. Aalé gálaat Yuána ˈdú seeseme, muí bie gim naannie.

²⁴ Af kinaallá Yuána hátle hé máá hí hiigidheká mán.

²⁵ Aalé Yuána lalille ˈbaal ubaa máá Yuuˈdi mare hol ki fáláám dhiiritiká hí yé gáá ˈdiiyye,

²⁶ gaal đo Yuána hol ˈdú eedhdhe, mú geey, kieye, Máá gáál he oonisúóllo, máá giri hí hol wár Yorˈdan in ˈdaatí hol gaa ˈgayye-, fayamle kuuní gálaat shigicheká, gálaat lulle hí ˈdú seeseme, gáál bie gim nannáat! gaalí mú yie.

²⁷ Aaléka Yuána gáál ˈdéé hol ˈdú nie, kieye, Máádhat hé hé ˈguoká mán, ˈdaab Waag hí he úr ma gáá shíinyká.

²⁸ Itín dhúrkícho hát yú gálaat geey-, yú kieye, Yú yáá Messíya muuniny, Waago ye máá kinaallá met ká niiyye, yú yieká, it óg.

²⁹ Máádhat ini egeetka, shééléchlé hí met egesse, hí af nee kokodhdho. Máá egeetká shééléchle hí af maaleka, shééléchle đo geer súm haí gaa meedhe. Yú úba yáá tág geer ye gaa meedhe.

³⁰ Messíya mee hí ˈdeernet-, yú mee ye gaanatká kalat, Yuána hí yie.

³¹ Máá úr gáá yimieká he lullé met ija. Máá lesalloká he máá lesallá, ˈdéé hótle ˈdaa lesieto ki taalla. Máá Waag gáá yimieká íín he lullé met ija.

³² Máá kinaallá hé argeká ubaa hé maaleká ˈduuwlé he hogodho, kor mu hé ˈdúwa hogodhoká hé máá hí iiy yegetká mán.

³³ Tá máá mú ˈdeenyle iiy yieká Waag ˈduuwlé gálaat argisie.

³⁴ Máá Waag hí ali gáá kaayyeká ˈdeeny Waaˈgieto ˈdiyime. Waag Hím Naasanle hé mú ˈdú ookodmiche.

³⁵ Íny hé ˈJaallé Waag hí geelnedhe, ˈJaalle hí he met lulle gíl geer fie.

³⁶ Máá Íny iiy yeetká taalle luolmit biiyoká hai gaa yíéđima, tá máá Íny điidhoká hé idho Waaˈgiet hí ˈdú iđo, mu hé luolmít ma aargiriny.