Yuána 19 - Fayam Midhab Yiesu Kiristoká He Hol Af Iđiny Kaanaká

Bilááto Yíésu oosle iiy yie

¹ Aalé Bilááto yuoy ˈdéé ki mure, giri gaal Yíésu egeet-, mú anakoto ki tuunoká.

² Yuoy đo shóte híí tág gaa niiyye, mú mé kaayye. Gaal mú đafar gielle-, búr korbiso mare kaay.

³ Gaal mú bala ˈdiiđime, kieye, Kó ˈdúwa-, Kánsích Yuuˈdííllo! yiegie. Gaal úba mú tune.

⁴ Bilááto geđi gál guguđo-, Yuuˈdiká yé ˈdú ˈdie, kieye, Bá dhaayyíe, yú hí mú yé ˈdu gáá ˈdeđúóllá, he giri itín hé muí ˈdeeneyká hát yú mú ma gaa árginyká hí kiimisatoká, gáál yie.

⁵ Aalé Yíésu đafar gielle-, korbidheká ubaa hiiny gaalí sháásha tág gaa nie-, gaalí fieká yé kí ˈdie. Bilááto đo gáál geey, Bá dhaayyíe, mu hállá! yie.

⁶ Gál guguđo-, suoryoká ubaa gállé kaansúoká tikiˈde mú aargiróóllá, kúóˈd ˈdoy, kieye, Mú ˈgór đarám yaalká ˈdug ˈdú yiesíe! Mú ˈgór đarám yaalká ˈdug ˈdú yiesíe! yie. Aalé Bilááto gáál ˈdéé hol ˈdú nie, kieye, Itín dhúrkícho mú eedhdhíe, mú ˈgór đarám yaalká ˈdug ˈdú yiesíe! Yú yáá hé muí ˈdeeney-, mú gaa argeká mán, yie.

⁷ Aalé gál Yuuˈdiká điidhe, kieye, Nyíín nyáá nyí hemurít ˈgayya, ˈdaa giri mu hol Iny Waaˈgiet yegetká, mu gon hai kufe, gaalí yie.

⁸ Bilááto héél maaleká đo geđi súm seerey,

⁹ ˈbíl kansimoká geđi hol ˈdú nadhe. Mu Yíésu yiete, kieye, Kúún máá aleeye? yie. Tá Yíésu hé ˈdeeny níínní mú hol ˈdú nieká mán.

¹⁰ Aalé Bilááto kieye, Kúún kó ye ma ká geđîny? Yú hát fargogint kuun ko ki fufuroká ubaa ko ˈgór đarám yaalká ˈdug ˈdú yegeská ˈguoká kó múog? mú yie.

¹¹ Yíésu mú ˈdéé hol ˈdú nie, kieye, Kúún Waag ko fargogínt úr ma gáá shiinyka, kó fargogint ˈgayyo-, ye he ki mumuˈdoká mán. Tá máá kúún ko ye ali ˈdu gáá kaay-, kuun ye chegesoká nyúógíchle hé nyúógíchkú ˈdú guđo, yie.

¹² Bilááto af kinaallá đo ˈgíérích he Yíésu ki fufuroká hol gaa ˈgeˈgedhe, kor gál Yuuˈdi warchane, kieye, Har máállá hayche-, mu sedheka, kuun af kinaalka, kó máá Kaisar muuniny. Ameeny máá hol kansich yegetká Káísarro kansimle egesheye! gaalí Bilááto yie.

¹³ Bilááto héél maaleká Yíésu baaˈd yé ki ˈdeey, karallé hemuriti-, kansimo-, álle gaalí Shíígiant Waariet yeget mare yielká ˈdú yíéđie. Ál kinaallá af Heberewka, Gabádha, gaalí yegedhe.

¹⁴ Hé kinaallá he aadh ˈgas tomon a naama burroká ˈjobínti. Kúlích kinaallá he kúlích gaalí Kúlích Hef ˈGisanká met les ˈdiđianká. Kúlích kinaallá úba he kúlích ˈjila Waag máállé ˈgasso-, urruká hí gáál ˈdug gaa nadheká. Aalé Bilááto gál guguđo-, Yuuˈdiká geey, kieye, Bá dhaayyíe! Kánsíchkícho hállá! gáál yie.

¹⁵ Gaal đo kúóˈd ˈdoy, kieye, Mú állá gaa ée! Mú állá gaa ée! Mú ˈgór đarám yaalká ˈdug ˈdú yiesíe! gaalí yie. Aalé Bilááto gáál heete, kieye, Kánsích kíchia yú ˈgór đarám yaalká ˈdug ˈdú yegese? gáál yie. Gál guguđo-, suoryoká kieye, Kánsíchkínyo he Káísar, nyáá nyí kánsích éíy taaka mán, gaalí mú yie.

¹⁶ Aalé el ˈdaal, Bilááto mú gáál shie, giri mú gaalí ˈgór đarám yaalká ˈdug ˈdú yegeská. Aalé yuoy Yíésu eete.

Yíésu hát gaalí ˈgór đarám yaalká ˈdug ˈdú ˈdoyká

¹⁷ Yíésu ˈgórlé đarám yaalká eedhdhe, gaal sedhe, ál gaalí Ál Me ˈGonte yegetká mé nie. Ál kinaallá af Heberewka, Golgóta, gaalí yegedhe.

¹⁸ Yíésu ál kinaallá gaalí ˈgórlé đarám yaal kinaal ˈdug ˈdú ˈdoy, ˈgór gaalí les gaa eey, gaalí ˈdisse. Gál eiy naam úba gaalí ˈguor đarám ˈgieká eiy ˈdug ˈdú ˈdane, gaalí Yíésu ˈdinnam eiy koy.

¹⁹ Bilááto ˈgór ˈbassoká đađáb gaa veere, ˈgór đarám yaal-, gaalí Yíésu ˈdug ˈdú ˈdoyká mé shurt ki ˈdoy. ˈGór ˈbasso kinaal héllé muí gaa veereká kieye,yíésu nasaretká, kánsích yuuˈdi, he chie.

²⁰ ˈDaa giri ál gaalí Yíésu ˈgór đarám yaalká ˈdug ˈdú ˈdoyká ˈjien Yerusalem kí ˈjobonoyyeká gál Yuuˈdi gúch he veerit kinaallá tuoy. He veerit kinaallá af Heberew, ubaa af Rooma, tá af Hellenno gaalí ki veere.

²¹ Aalé gál guguđo-, Yuuˈdi-, suoryoká Bilááto geey, kieye, Ha Kánsích Yuuˈdi véériny. Máá hol Kánsích Yuuˈdi yegetká, véer, gaalí yie.

²² Bilááto ˈdéé hol nie, kieye, Hé yú veereká ha yú veere, gáál yie.

²³ Aalé yuoy Yíésu ˈgór đarám yaalká ˈdug ˈdú ˈdoyyeká mú đafaraamle shuunnate, đafaraam kinaal met afur eiy ká fiiyye, tá eiy taat shuunnate. Aalé giel biiy geereká ká ˈgisate. Giel kinaallá is hí tikiˈde, hé dhaay hí toom iiyyeká mán.

²⁴ Gaal kieye, Giel ha ki eiy ˈdániny, kí hol koiy ki ˈduo, máá kot hí ˈdú ˈdoyyoká hí lilew, gaalí hol yie. Hééllá hatallá ˈdíéllá he ˈdeeny Waaˈgiet giri kieye, Gaal đafaraamchú hol gise, gielchú koiy ki ˈdodhdhe, yieká ˈduway. Yuoy hé kinaallá ekeyche.

²⁵ Yíésu ˈgórlé đarám yaalká ˈjobintle hé ˈjielle ubaa ˈjielle nyaarle, héétí María giri min Kilobaká, tá María Magaˈdalaká hé hí ˈgie.

²⁶ Yíésu ˈjielle ubaa máá láli-, muí gielká ál kinaal ˈgie-, muí argeká, Yíésu ˈjielle vie, kieye, ˈJie, máá hí hol af ˈgiiyyáállá aalé he inykú, yie.

²⁷ Aalé mu máá giri láliká geey, kieye, Bá dháash, máállá aalé he ˈjiekú, yie. Ameeny kinaallá in máá lálííllá Yíésu ˈjielle máá ˈbíl geerle hote.

Kúfách Yiesu

²⁸ Aalé el ˈdaal, Yíésu hát he lulle đusieká ógká in kieye, Yú báre ˈgaa, yie. Mu hééllá hodhééllá he ˈdeeny Warˈgat Waaˈgiet hí hoteká ˈduway.

²⁹ Ál kinaallá hé óngʼólích ˈduuny bírigká hí gaa ijeká hí ije. Aalé gaal đafar gaa nyuro mare ˈgór mé ki hidhe, ˈduuny vinnaʼ kinaal ki tie, Yíésu af ki chiˈde.

³⁰ Yíésu ˈduuny kinaal ˈbuuteká kieye, He hé đue! yie, đo mé les ki ˈdoy, sidh hí yé gaa ˈdiiyye.

³¹ Kúlích kinaallá he kúlích gaalí Kúlích Hef ˈGisanká met les ˈdiđianká. Aalé ˈdaa giri Kúlích Hef ˈGisan kinaal súm ˈdúwaká, gál guguđo-, Yuuˈdiká hé gál gaalí ˈguor ˈdug ˈdú ˈdaneká alb ˈgieká ma fediny. Aalé gaal Bilááto heete, giri yuoy gáál ˈgas gaa ˈgieˈgicho-, gáál gaalí ˈguor gaa babuoká.

³² Aalé gál giri yuoyóká ká yimie, gál gaalí Yíésu hol ˈguor đarám ˈgieká eiy ˈdug ki ˈdaneká mú tikiˈd er ˈdú siete, ˈgas gaa ˈgieˈgiche, máátí úba ˈdú siete, ˈgas gaa ˈgieˈgiche.

³³ Gaal Yíésu ˈdu gáá yimie-, mu kuf argeká, hé mú ˈgas ma gaa ˈgieˈgîny.

³⁴ Aaléka, gál yuoyóká mú tikiˈd Yíésu naan beet gaa veere, Yíésu đo fas ubaa bie hí gáá hele.

³⁵ Máá hééllá argeká he ˈduuwlé hogodho. Hé muí argééllá hé ˈdúwa. Máá kinaallá hé hogodhóóllá hát ˈdúwaká hé óg. Hééllá muí hogodhóóllá he giri itín úba hí iiy chegetoká.

³⁶ Hééllá hatallá ˈdíéllá he giri hé Warˈgat Waaˈgiet hí hote-, kieye, Mú lafle hé lafit tikiˈde gaalí gaa ˈgieˈguoká mán, chieká, ˈduuwawká.

³⁷ Warˈgat Waaˈgiet ali tikiˈd úba kieye, Gaal máá beet gaa veereká hai dhaˈgama, he chie.

Yíésu galinylé

³⁸ Aalé héél el ˈdaal, Yúósef giri máá ˈjien Arimatayaká Bilááto heete, giri gón Yiesu egeetká. Yúósef he máá lali Yiesu, tá ˈdaa giri he gál Yuuˈdi kikiadheká íín ˈgerellé he yiel. Mú Bilááto hí ˈdéé met gaa eedhdheká, mu ká yimie, gón Yiesu eedhdhe.

³⁹ Máá Yúósef hol ˈgieká he Nikoˈdémos giri chuure tikiˈd Yíésu ˈdú sedheká. Nikoˈdémos henyit ubaa helb gaalí hol fie-, ilshám hí tomon seđ af ˈgayyoká nyuoˈdoká hé ˈgie.

⁴⁰ Aalé gaal gón Yiesu eedhdhe, gon đafaraam édh-, henyit ubaa helb ˈdú fafieká ki ˈdane. Hééllá he yaalmit gál Yuuˈdi hí hol gagaluoká.

⁴¹ Ál gaalí Yíésu ˈgór đarám yaalká ˈdug ˈdú yies kinaallá ˈjobintle, hé les hí gaa iđe. Lés kinaallá hurtle hé liish waariet-, gaalí geer gaa ˈgodhe-, káána-, kálta gaalí máádhat ma ki galînyká hé hí gaa iđe.

⁴² ˈDaa giri kúlích kinaallá he kúlích gál Yuuˈdi hí Kúlích Hef ˈGisanká met les gaa ˈdiđianká onnoyye-, tá ˈguoˈd liishó kinaal íín ka ˈjobonoyyeká gaal đo gón Yiesu ˈguoˈd liishó kinaal ki galie.