Yuána 14 - Fayam Midhab Yiesu Kiristoká He Hol Af Iđiny Kaanaká

Yíésu he ˈgíérích ke Waag ki seseenká

¹ Aalé Yíésu lalille geey, Ha ger hí gaa ˈdéénen. Waag iiy yiedhíe, yú úba ye iiy yiedhíe.

² ˈBíl ˈJaachú hé ger hí burnayká. Onnônyka ger hí ma burnanyka, yáá hí geey. Yú ˈbíl kinaallá seeme, hí ali tág kí kokoo.

³ Yú sedhe-, hí ali tág kí koyka, hollo hol ká naadha, haí egedhdhe, giri itín úba ál yú ijoká hí yíéđiannoká.

⁴ Itín ál yú seseen kinaallá ˈgíéríchle it óg.

⁵ Aalé Tómas Yíésu yiete, kieye, Máá Guđo, ál seseennoká nyáá nyí muog, tá háteeye, nyí ˈgierich og? yie.

⁶ Yíésu mú geey, kieye, Yú ˈgierich, ˈduuw he yú, yú luolmíti. Hé máá níínní ye ma gáá naanka, Waag ˈdú seenká mán.

⁷ Itín har hí ye óíytaka, it ˈJaachú úba óg. Aalé káána ke gaa ijóóllá, tá biiy met ki suoyééllá, it mú óg, ubaa mú argiyye, muí gáál yie.

⁸ Aalé Fílib kieye, Máá Guđo, nyí ˈJaakú ka argísish, hé nyí faaˈgsuoká hé kinaallá, yie.

⁹ Aalé Yíésu mú geey, kieye, Fílib, bííy muun ke hol af gáá yíéđieká, kó hátle ye muog? Máá ye argeká, ˈJaa chia arge. Tá háteeye, kúún kieye, Nyí ˈJaakú ka argísish, chie?

¹⁰ Hát yú ˈJaachú gaa ijo-, ˈJaachú íín ye gaa ijoká, kó iiy ma chéen? ˈDeem yú hí geđúóllá hé hé meenychú muuniny. ˈJaa chia ye gaa ijoká in hújíchle nannaa.

¹¹ Hát yú ˈJaachú gaa ijo-, ˈJaachú íín ye gaa ijoká iiy yiedhíe. Har ˈdee hí iiy ma honyka, hé yú eekemey-, hí il ki argiyyeká, hí iiy hoyo.

¹² Yú hí hé ˈdúwaká geeye, Máá ye iiy yeetká hé yú eekemeyká hai ekemeye. Máá hat kinaalloká ˈdaa giri ˈJaachú yú bííyle mé nannuoká hé éíy taaka gálaat hí af ˈdaˈdabo-, hé yú eekemeyká a mé gíriká hai ekemeye.

¹³ Aalé hé hí meenychú ˈdaalle ki hegesetoká roogle met ha yú hí gaa egedhdhe, giri yáá Ínyííllá ˈJaachú ˈdúúw egeetká.

¹⁴ He lullé hí ˈdaa meenychú ki hegesetoká, roogle met ha yú hí gaa egedhdhe.

Yíésu Hím Naasan Waaˈgiet ˈjímle hodhe

¹⁵ Har hí ye gielnítaka, hé yú hí kí mureká el haí gaa verenne.

¹⁶ Tá ˈJaachú ha yú hegete, mu Máá éíy hí rangʼit yeget-, bííyyo hí hol af yíéđiannoká haí ká shigia.

¹⁷ Máá kinaallá he Hím Naasan hí ˈduuw Waaˈgiet af ki tatuoká. Gál lesalloká ˈdaa giri mú aargiroká điidhe-, ubaa mú muogká in mu gáál ma ˈdú ˈjeˈjeminy. Tá itín ˈdaa giri mu íín hí hol af iđa-, muí gaa ijoká it mú óg.

¹⁸ Yú yáá hí hiyesím ma ki haađiny. Yú geđi af haí kí ˈdeeme.

¹⁹ Aleđuđugul gálaat hí ye ma gaa aargirinyká hé ma faganany, tá itín geđi haí ye aargiˈda. ˈDaa giri yú ali ijoká itín úba taalle ali haí iđa.

²⁰ Kúlích kinaallá hát yú ˈJaachú gaa ijo-, itín hí ye gaa iđa-, tá yú hí gaa ijoká eiy haí naasata.

²¹ Máá hemuumuritchú ki yaal-, hemuumurít el gaa veeroká he máá ye gielká. Máá ye geelnetká ˈJaachú úba haí geelnedhe, yú úba máá kinaallá ha geelnedhe, mú hollo hol kí eedhesia, Yíésu hí gáál yie.

²² Aalé Yúúˈdas éíy taaka-, Iskáryot muuninyká, Yíésu heete, kieye, Máá Guđo, háteeye kúún nyí hol kí eedhesicha, les gálle hol ma kí eedhesiny? yie.

²³ Yíésu mú ˈdéé hol ˈdú nie, kieye, Máádhát ye geelnedheka, he onisinychú el hai gaa verene. ˈJaachú mú hai geelnedhe, mú ha nyí ˈdu gáá chiimedhe, afo nyí hol yíéđianna.

²⁴ Máá ye ma geelnenyká hé ˈdeenychú el ma gaa vereniny. ˈDeeny hí maallóóllá hé ˈdeenychú muuniny, he ˈJaa chia ye ali gáá kaayká ˈdeenylé.

²⁵ Hééllá lulle hátlé ke hol af ijo-, yú hí in ma ka kíinyallá, yáá hí ká geey.

²⁶ Tá Máá hí rangʼite-, Hím Naasan Waaˈgietlé-, ˈdaa meenychúka, ˈJaachú hí ali ˈdu gáá kakawká, he lulle haí oonisia, he met lullé yú hí geeyká táb haí kí gagadha.

²⁷ Yáá hí naanná af kí hay, naanná chia yú hí shie. Naanna yú hí shíéllá, hé hát naanna gál lesalloká hí hol shiguoká muuniny. Ha ger hí gaa ˈdéénen, hí seerêny.

²⁸ ˈDeeny giri yú hí geey-, yú kieye, Yú ha seeme, kor geđi hollo hí hol ˈdu gáá naadha, yú hí yieká, it maalle. Itín hí ye geelnênyka, hát yú ˈJaachú bííyle mé nannúóllá gerle onnônyka hé hí gaa meedhe, ˈdaa giri mu ye ˈdú guđoká.

²⁹ Aalé hééllá hátlé ali ma kí ˈdíinyká yáá hí geey, giri he ali kí ˈdieka, hí iiy chegetoká.

³⁰ Yáá ál ˈjíig hí ki geeyoká mán, ˈdaa giri kánsích lesallo-, Sátan léká ká yiimetká. Máá kinaallá hé níínni ye gil kí mumuroká mán,

³¹ tá hééllá yú hurt higilóóllá he giri les gálle yú hát ˈJaachú giel-, hé ˈJaachú hí ye kí mureká lulle el gaa igiroká kiimisatká. Ka kée, kí siet, Yíésu hí lalille yie.