Yuána 11 - Fayam Midhab Yiesu Kiristoká He Hol Af Iđiny Kaanaká

Kúfách Lasaaro

¹ Aalé máá eny Bedhene-, gaalí Lasááro yegetká kulnadhe. Mú ényle he ény mú nyaaramlé María ubaa Márta hí léká.

² María halúg nyárlé Lasááro kúlláállá, he María giri Máá Guđoká sáláb usiyyoká ˈgas ˈdú fafiyye-, meenyle dhúrle mú ˈgas ki shugudicheká.

³ Aalé hada hol nyaaram kinaallá Yíésu ˈdéé ˈdú lay, kieye, Máá Guđo, máá kuun hí gielká hé kulnadhe, yie.

⁴ Aalé Yíésu héél maaleká kieye, Kúlláʼ kinaallá el ˈdáˈdle hé kúfach muuniny. Hééllá hatallá ˈdíéllá he giri fargogint Waaˈgiet gálaat hí aargiro-, Iny Waaˈgiet ˈdúúw egeetká.

⁵ Yíésu íín hé tág Márta ubaa María tá Lasááro giel.

⁶ Tá mu Lasááro kúlalle maaleká mu ál kí ˈjie kinaal aadh naam gaa ˈguole.

⁷ He đueká mu lalille geey, kieye, Ka yimedhíe, kí Yuuˈdía hol ˈdú naat, yie.

⁸ Gál láliká mú geey, kieye, Máá gáál he oonisúóllo, kuun kó káána gál Yuuˈdi ko waar ki tutuneká muunîny, geđi ál kinaallo seseenne? gaalí mú yie.

⁹ Yíésu kieye, Bííy kulich-, ke hujich gaa nannuoká hé aadh ˈgas hí tomon tikiˈde a naama muunîny? Máá bííy kulichká gaa seseenká hé ma riigiriny, ˈdaa giri mu les édhúmle ki seseenká.

¹⁰ Máá bííy gaa ongʼoˈdeká gaa seseenká in riigiria. Hééllá he ˈdaa giri edhum mú gaa mánká.

¹¹ Mu ˈdeenyéél beeteká geđi gáál geey, kieye, Shééléch kúnnaa Lasááro hé rafe. Yú ha seeme, mú ramo gaa kiisia, yie.

¹² Mú lalille kieye, Máá Guđo, mu har rafeka, hai miidhandha, gaalí yie.

¹³ Yíésu íín kúfách Lasaaro ˈdeenylé he gáál geđie, tá mú lalille íín rám aađaká he taawue.

¹⁴ Aalé Yíésu gáál ˈdéé hát ˈdabaanká eiy ki nie, kieye, Lasááro hé mán yie,

¹⁵ tá ˈdaa giri yú ál kinaal gaa lalayká, ˈdaakíchoka yáá geer ye gaa meedhe-, giri hí ye iiy chegetoká. Ka kée, kí mú bííyle mé nuo, yie.

¹⁶ Aalé Tómas giri gaalí ˈDíđumos yegetká lalíítí geey, kieye, Múún úba kí mú hol eet, kí mú hol ˈgar kuffo, yie.

¹⁷ Yíésu ali ki ˈdieká Lasááro hát gaalí galie-, uushich afur gaa rafeká maale.

¹⁸ Bédhene hé Yerúsalem ma gaa faganany.

¹⁹ Aalé gál burnay-, Yuuˈdia-, Márta ubaa María ˈdu gáá yimie-, gáál nyárlé mán yieká ˈdugaka gáál imiro gaa shugudmieká hé ál kinaallá gaa ije.

²⁰ Márta Yíésu ká yiimie maalleká đo mú agim naate, María íín ˈbíl ki ˈgisate.

²¹ Aalé Márta Yíésu hol argeká mú geeyche, kieye, Máá Guđo, kúún állá gaa iđînyka, nyárchú hé ma kufúminy.

²² Tá káána úba hé Waag heesetoká hát Waag hí ko ká shigichoká yáá óg, chie.

²³ Yíésu đo Márta geey, kieye, Nyárkú geđi hai loolnodho, uushich yé hai gáá ˈdeeme, yie.

²⁴ Aalé Márta kieye, Mu hát kúlích biiy el ˈdaˈd-, Waag gálaat uushim yiem gáá ˈdeđichoká íín úba uushich yé gáá ˈdeenká yáá óg, chie.

²⁵ Aalé Yíésu kieye, Uushim yiem gáá ˈdeeny ubaa luolmít he yú. Máá ye iiy yeetká har úba kufúminyka hai loolnodho.

²⁶ Tá gál ye lésallá iiy gaa yeetká lulle taalle bííyyo hé ma kufuminy. Kó héél iiy chíe? muí Márta yie.

²⁷ Aalé Márta kieye, Iiy-hí Máá Guđo, kúún hát Messíya-, Iny Waagoká yáá iiy yie. Kúún he Máá Warˈgat Waaˈgiet hí hote-, lésallá ka yiimetká, chie.

²⁸ Márta hatal chieká đo hol naate, nyaarlé María viiyye, mú nee ki shaakaˈde, kieye, Máá gáál he oonisuoká hé ká ˈjie, ko hegete, chie.

²⁹ María héél maaleká đo les gaa kiisate, Yíésu ˈdú siete.

³⁰ Yíésu af kinaallá hé hátle é ma híliny, hé ál Márta hol gaa argeká ijo.

³¹ Aalé gál Yuuˈdia ˈbíl gaa ije-, María imiro gaa shugudmieká María kiisanléél argeká mú el gaa veere. Gaal tawunyleka, mu uushicho álle he seseme, gaa bebeme, he yie.

³² María ál Yíésu hí gaa ijeká nyuoˈde-, mú argiyyeká, mú ˈgas met les gaa ˈdoyye, kieye, Máá Guđo, kúún állá gaa íđinyka, nyárchú hé ma kufúminy, chie.

³³ Aalé Yíésu María ubaa gállé hol ˈgieká bebime-, argeká đo geer hí súm gaa ˈdeenedhe, geer hí gudhdhe,

³⁴ kieye, Mú ále hí ki galiche? yie. Aalé gaal kieye, Máá Guđo, káde, dháash, gaalí yie.

³⁵ Yíésu đo imiro hí gáá okoˈde.

³⁶ Aalé gál Yuuˈdia kieye, Bá dhaayyíe, mu hát mú giel! yie.

³⁷ Gáál ˈbáál kieye, Mu hé máá in mannayká in eiy ma ˈdéeny! Tá háte, Lasááro kúfach ma ka rían? yie.

Yíésu Lasááro uushich yé gaa ˈdeey

³⁸ Yíésu uushich álle kí ˈjobondheká đo geđi geer hí gudhdhe. Úúshích kinaallá he liish gaalí wáár af gaa koy mare.

³⁹ Yíésu gáál geey, kieye, Wáár ali af gaa ée, yie. Márta giri nyárle mán yieká kieye, Máá Guđo, mu uushich afurro gaa rafe, afééllá hé moˈdoy, chie.

⁴⁰ Aalé Yíésu kieye, Yú ko ma géeny, iiy chieka, Waag hát fargogiyyoká ha aargiˈda, yú ko ma yéen? yie.

⁴¹ Aalé gaal wáár ali af gaa eey. Yíésu úr gaa dhaay, kieye, Baabá, ˈdaa giri ye af maalleká yáá ko gielmít hol ˈdu gáá nie.

⁴² Hát kúún aadh lulle ye af mamalloká yáá óg. Tá gál állá ˈgíéllá ˈdaalle ˈdugaka in yú hééllá ki hodhe, giri hát kuun ye ali gáá kaayyeká gaalí iiy yegetká, yie.

⁴³ Yíésu héél huogodheká, af gaa guđoká Lasááro ki vie, kieye, Lasááro, yé ka ˈdé! yie.

⁴⁴ Lasááro giri mán yieká hátlé giri gille ubaa ˈgasle gaalí shaasham ki ˈdane-, gaalí mé úba đafar ki ˈdaneká đo uushich yé gáá ˈdie. Yíésu gáál geey, kieye, Mú uushich đafaraamlééllá gaa furáa, mú hayyíe, mu hí siet, Yíésu hí gáál yie.

Yíésu oosle sulle gaalí nie

⁴⁵ Aalé, gál Yuuˈdia burnay-, María ˈdú gáá yimieká, hé Yíésu hí ekeyká il ki argeká, Yíésu iiy yie.

⁴⁶ Gáál ˈbaal íín gál Farisaay ˈdú sedhe, hé Yíésu hí ekeyká gáál geey.

⁴⁷ Aalé gál guguđo-, suoryoká ubaa gál Farisaay hol vie, ˈdéé iđie. Gaal hol yiete, kieye, Háte ki ˈdeeme? Máá állá gaa seseenallá ebá hé burnay-, ke af ˈdaˈdaboká eekemêy!

⁴⁸ Múún ki máállá hélle hol ma hegesenka, gálaat lulle mú iiy hai yeedhe. Gál Rooma hai ká ruuma, ál kúnnaa ki Waag gaa vivisatká ubaa gábárích kúnnaallá hai gáál gaa ugunma, gaalí hol yie.

⁴⁹ Aalé gaal íínííllá máá gaalí Kayáfas yegie-, wár kinaal geerle máá méte suoryo-, onnoyká ˈdéé hodhe, kieye, Itín gon hé níínní hí ógká mán.

⁵⁰ Itín gon it ma tawûny. Itín hé hí ki midhabká mú tikiˈd gáál ˈdú kufunanká kalat, hát gál Yuuˈdi lulle bebewká muuniny, muí gáál yie.

⁵¹ ˈDeenyééllá hé mú kasle yé ma gáá ˈdíiny. Mu ˈdaa giri wár kinaal geerle máá méte suoryo-, onnoyká in mu hé biiy met gaa ijoká huogodhe. Yaalmit giri Yíésu gál Yuuˈdi ˈdú kufunan-,

⁵² tá gál Yuuˈdi tákámle ma ˈdú kufuminy-, um Waaˈgiet les lulle eiy bash ki yieká úba ˈdú kufunan-, gáál hol ˈdu gáá shuguno-, gáál tikiˈd hođuoká, ta muí hélle huogodhe.

⁵³ Ameeny kinaallá in gaal Yíésu ooslé yegeská sulle nie.

⁵⁴ Aalé Yíésu ameeny kinaallá hé úba gál Yuuˈdia hurt đarám ma gaa síen. In đo mu ál kinaal gaa kie, ubaa lalille lés ˈbakat kí ˈjób-, ényle gaalí Eferááyim yeget mare mé nie, ál kinaal gaa yíéđie.

⁵⁵ Af giri gál Yuuˈdi ˈjilallé máá ˈgasso-, urru-, Waaˈgietká hí gálaat ˈdug gaa nadheká ka ˈjobonteká gál burnayká ˈjienle gaa kie, Yerúsalem mé nie, giri ˈjila hátlé ali ma kí ˈdíinyká hol dhidhiroká.

⁵⁶ Aalé gálaat Yíésu il ki ˈgeˈgedhe, gaal hátlé ˈBíl Waaˈgietká geer gaa ˈgieká hol heegete, kieye, Háte ki yeedhe, mu kín hé ˈjiláállá álle ká yiimet? hol yie.

⁵⁷ Tá gál guguđo-, suoryoká ubaa gál Farisaayká íín hé kis ˈdéé muˈde, giri máádhat Yíésu ál he gaa ijoká óíytaka, mu gáál ˈdéé ˈdú siidho-, mú gaalí ˈgiiliˈgawká.