Yákob 3 - Fayam Midhab Yiesu Kiristoká He Hol Af Iđiny Kaanaká

Ére mé raan

¹ Nyaaramchú, itín gúch haí gál gálaat he oonisuoká chéen. Múúni ki gálaat he oonisúóllá hát Waag gáál súm ˈdéé ki iđimichoká hé ki óg.

² Múún lulkúnno hát burnayká ki he ˈdeđeneye. Máá kálta af ma koˈdosîny-, erelle aadh lulle mé raraatká, he máá súm hiray-, gónle lulle mé ki yaalká.

³ Farich ke af muul kaay-, sáa yieka, ál ki fedoká ha ki nannaa.

⁴ Héétí kadís kí yeet, kadiská ˈbaal hé guguđo, wááních fargogoká hí tataa, kor íín yaaw niginiká hí af tataa, ál gál kadís kukuoká hí fedoká met nanniyya.

⁵ Gón kúnnoka, ere hé ninniká. Ere ninni-, a geer gaa ijóóllá, in hé burnay-, hol meeny hí gaa iđoká hogodho. Ebá héél dhaayyíe, hóf ninniká in bolomo, tím guđoká ˈdunmaya.

⁶ Ere íín úba hát ˈjiete, gón kúnnoka ííni súm hé ˈdeđewká gaa chachadhdha. In máádhat alulle ˈdeđeneye, mú les ˈdú iđinyle ˈjiet gaa verene. Ííni tikiˈdééllá bololle ˈjiet biiyoká yé gáá ˈdie.

⁷ He met lullé met hí hol ká burnay-, les yíekaʼ, bás yíekaʼ, gaa ijoká hé úba gálaat hí hođisat, gálaat met gaa kekeen.

⁸ Kor ere hé máá níínní hí hođisat-, hí mé chichiratká mán. Ere heđeʼ, hát chár gálaat yegeská, hé ali ki ˈdím muog.

⁹ Ere ííni ke Máá kúnnaa Guđo Baabá Waag ke ki memeye. Tá úba e gál Waag hí yaalmitle tág ka niiyyeká ke ki waaˈgata.

¹⁰ Af geer tikiˈdééllá in Waag meeny ubaa ki waaˈgasan hí yé gáá ˈdeˈdeme. Nyaaramchú, hé kinaallá hé tagle muuniny.

¹¹ Haˈd tikiˈdeká hé bíé méká ubaa bíé bírigká hí gáá feféen? Híʼi, hé hí ma gáá fefeminy!

¹² Nyaaramchú, kinnach hé saano salabká hí gáá higissô? Héétí, ˈgór vinna hé kinnach um hí gáá higissô? Hát tikiˈdééllá haˈd bie hí bírigká hé bíé méká hí ma gáá fefeminy.

ˈDaalim uriet ubaa ˈdaalim lesiet hol ká eiyye

¹³ Itín mááya ˈdaalle, hé burnayká og? Máá kinaallá yaalmitlé midhab ki ijoká ubaa héllé ˈdabaan ekemeyo-, máálle hol ˈdúúw rieká hí gáál ˈdaalimlé kinaallá gáá argisuo. Hol ˈdúúw rím hatallóóllá ˈdaalímmo yé gáá ˈdeˈdeenne.

¹⁴ Tá har hí hinaaf ˈdeewká ubaa he hol ki fedit gálle gálaat ˈdú ˈduuwawká ger ká ˈgayyaka, haí hé kinaallá hol ki memêny. Tá har hí hé kinaallá ekemeycheka, af kinaalka hé ˈdúwaká hí hol gaa layye, hí hé hódhoká hoyche.

¹⁵ ˈDaalim hatallo-, hódhóóllá hé úr ma gáá léen, ˈdaalimééllá he ˈdaalim lesallá. Hé ˈdaalim Waaˈgiet muuniny, he kídhích Waaˈgiet ˈdaalimlé.

¹⁶ Aaléka, ál hí hinááf ubaa he hol ki fedit gálle gálaat ˈdú ˈduuwawká gaa ˈgayyaká ál kinaallá hé hol af ma maalít ubaa he lullé ˈdeđewká hé hí gaa ijo.

¹⁷ ˈDaalim úr yé gáá ˈdeˈdeennoká héllé erká saas mánti, ubaa naanná, tá nog sien, ííni gálaat he ki chiran, ííni met gaa kími, ííni geer guurá ubaa húgúm midhabká, ííni gálaat hol eiy gaa ním mánti, ííni hé leđuđugulleká wuogon.

¹⁸ Gál gálaat naanná hurt ki ijo-, ubaa gálaat naanná hurt gaa sisidhoká, héllé ˈdabaan ekemeyoká hé ˈdúwaká yiem haí gáá ˈdeeme.