Yákob 2 - Fayam Midhab Yiesu Kiristoká He Hol Af Iđiny Kaanaká

ˈDú ˈdííniny il gíl gaa helitlé

¹ Nyaaramchú, it Máá kúnnaa Guđo ˈdúwa-, Yiesu Kirísto iiy chíéllá haí gál kaamúreká ˈdú ˈdííníminy.

² Hát káána máá itínka, kamúrut-, đafaraam ˈdabaanká fadhdhe-, hórkí gíl ká ˈguoká ˈdiiyiminykícho ká yimie-, tá ál tikiˈde kinaal máá he mán-, sharim ka hiteká úba ál kinaal ká yimieka,

³ itín máá đafaraam hí ˈdabaan kinaal hí argiyyeka, káde, kara midhaballá ˈdú yíéđigo hí cheedhe. Tá máá giri he mánká íín áltí ki ˈdé, hí ma cheenka, nyí ˈgas met gáá yíéđigo hí cheedhe.

⁴ Itínka, hééllá hé gál kaamúreká ˈdú ˈdíínínyle muunîny? Hééllá hí ekeycheka, af kinaalka ar tawuny ˈdeewká ˈgayyoká hí chie.

⁵ Nyaaram chia yú gielallo, hééllá nee kóo. Gál lésalláka, gálaat hí gál he maamanká ka dhaˈgasanká hé Waag hí ma wááran, hí kamur iiy yeenká ma shíiny? Mu hé úba gáál ma wááran, giri Guch Waaˈgiet gál mú gielká muí af iđieká úba aargiroká?

⁶ Aaléka, it gál he maamanká eesheyche. Gál kaamúrééllá íín hé gál hí he ki nannasat-, hí gál hí ˈdeem ki iđimuoká met egewká muunîny?

⁷ Gál meeny ˈdúwa-, máálle ˈdaalle hí ki ˈgiiyyáállá fiichiloká hé gaal íín muunîny?

⁸ Har hemurit súm guđo-, Warˈgat Waaˈgiet geer gaa iđo-, giri kieye, Máá olkú hát kúún hol gielallá úba géélneb, chieká, hí el gaa igiˈdaka, af kinaalka hé ˈdúwaká hí ekemeyche.

⁹ Tá har hí gálaat hol eiy gaa nanniyyaka, af kinaalka hé ˈdeewká hí ekeyche. Hemurít hé úba hí hé kinaallá ˈdú ˈdeensete.

¹⁰ Máá hemuumurít lulle hát ˈdabaanká el gaa igiro-, kor hemurít tikiˈd ˈdeeneyoká, hemuumurít lullé he ˈdeeney.

¹¹ Máá kieye, Haí hol burúminy, yieká in úba kieye, Ha máádhat chíésiny, yie. Aaléka, har hí hol ma buruminy-, kor hí máádhat chieska, af kinaalka it gál hemuumurit Waaˈgiet ˈdeđeneyoká chie.

¹² Hé hí hogotoká ubaa hé hí ekemeychoká ˈdeemle hát hemuumurit gáál mé fufuˈdoká hí ki iđimichoká onnóo.

¹³ Máá geer guuralle gálaat ma aargisinyká, kúlích ˈdéé ki iđinyká hé Waag hí geer guurá ma aargisiny. Geer guurá hé ˈdéé ki iđiny far ˈdú gogiyyo.

Iiy yeen he ekeny mánká

¹⁴ Nyaaramchú, hééllá háteeye midhab? Máádhat kieye, Yú yáá iiy yeen ˈguo, yeget-, kor máá kinaal he ekeny manítaka, iiy yeen kinaallá hé mú bíísíchô?

¹⁵ Hát káána nyárkúnno, muuninyka, nyaarkúnno tikiˈd, geleem ubaa ˈguom aadh lulle kokuoká maníta-,

¹⁶ kor itín mú tikiˈd mú geey-, kieye, Waag ki sí, ˈdéeny hai ko fáminy, hé geere kom, héyyig, mú yie-, kor máá kinaallá hé mú ki ˈgierˈgerneyká hé mú gaa shieká manítaka, hé kinaallá háteeye midhab?

¹⁷ Hát tikiˈdééllá har hí iiy yeen tákámle ˈgayya-, hí he ma gaa ekemenyka, af kinaalka iiy yeenkícho hai kuyye.

¹⁸ Tá kálmareka, mú tikiˈd hatallá hai yeedhe, Kúún kó iiy yeen ˈgayyo, yú yáá he ekeny ˈguo, hai yeedhe. Ebá iiy yeen kua hé gaa ekemeycho-, mánnallá ye ka argísish, tá yú íín hé chia ekemeyoká iiy yeenchú hai ko aargisicha.

¹⁹ Kuun Waag hát tikiˈdeká kó iiy chie. Kúbu! Hé kinaallá úba hé aryáán hí óg, aryáán hí gaa faađanan.

²⁰ Kó đeechal, iiy yeen hé gaa ekemeycho mán kinaal hát ˈbakatéél in ha ko ká aargisía?

²¹ Af giri eshi eshim kúnnaa Abirááyam Waag af ma đíin-, inylé Yísak kúb ˈdú iifie-, onnônyka íny suor hođieká, héllé ekey kinaal ˈdugaka, hé Waag hí máá ˈdúwaká ma chéen?

²² Mú iiy yeenle ubaa hé muí ekeyká hát hol hujich ˈgar nie-, mú iiy yeenle hé muí ekeyká hí ˈduwayká, kó argiyyê?

²³ Héél ˈdugaka in Warˈgat Waaˈgiet ˈdeenylé hote-, giri kieye, Abirááyam ˈdeeny Waaˈgiet iiy yie, tá mú iiy yeenlé kinaallá ˈdugaka in Waag mú máá ˈdúwaká chie, yieká ˈduway. Aalé mú gaalí Waag máá béelle yie.

²⁴ Aalé máádhat hát iiy yeenle tákámle muuniny, héllé ekemeyoká ˈdugaka, Waag hí máá ˈdúwaká ka dhaˈgasannoká it argiyye.

²⁵ Hát tikiˈdééllá Ráab giri sharmúut onnoyye-, gál dhéˈgeká eete-, gáál shuolsiche-, gáál ˈgíérích éíy taaka niiyyeká, héllé ekeyche kinaallá ˈdugaka hé Waag hí máá ˈdúwaká ma chéen?

²⁶ Aaléka, gon sidh manítaka hát kuyyeká it óg. Hát tikiˈdééllá iiy yeen hé gaa ekemeychoká manítaka hai kuyye.