Yákob 1 - Fayam Midhab Yiesu Kiristoká He Hol Af Iđiny Kaanaká

¹ Yú he Yákob, Waag ubaa Máá Guđo Yiesu Kirísto gédéchlé. Warˈgatééllá it é meet tomon a naama-, biiyano hí ma lilenyká gaa iđáállá yú hí ˈdu gáá verene. Náa!

Manyjasiny ubaa ayaˈginy

² Nyaaramchú, manyjasiny ubaa ayaˈginy met hí hol ká eiyyeká il hí argiyyeka, ger midhabká ki eedhdhíe, ger hí gaa meet.

³ Hefano hatallóóllá hí gáá naate-, kor iiy yeenkícho hátle fargogíntaka, hé kinaallá hát mé ki chirsan yé ˈdú ˈdeˈdeennoká it óg.

⁴ Aaléka, mé ki chirsankícho hí hújíchle beeset, giri itín hí gaa higirayyo-, hí tagle cheet-, hé hí gaa láká mánká.

⁵ Har itín máádhat ˈdaalím ˈdabeka, hí Waag ruogono. Waag hé gíl ma gogonony, máá hí rogononká hé ˈdéé ma ki ˈdaraminy, mú ˈdaalím hai shigicha.

⁶ Máá Waag rogononká íín hai Waag ki nannáan, mu hí iiy yeen ˈguo. Máá Waag ki nannaatká hát bárán waanich hí hol gaa sisidho-, mé lođuđugul he ki ˈdaraanká mánká.

⁷ Máá yaalmit kinaallá ˈguoká hát Máá Guđoká he ma gaa aargirinyká hí onnow.

⁸ Máá kinaallá he máá geer hí naama-, he lullé ekemeyoká ger totom gaa ˈgiˈgisatká.

⁹ Nyár kúnnaa he hí gáá gaawká hí yaalmitlé ˈdúwa-, Kiristoká gaa geyyuo.

¹⁰ Máá kúnnaa he hí guđoká héllé guđo ˈguoká hát ˈdúúw mánká hí kimisat, tá hí gaa geyyuo. Máá kamúrutká hát kállány heefurmuoká.

¹¹ Hát tikiˈde aadh ká ˈjeˈjeen-, kulkul ˈguor kállánylé ˈdabaanká guogosuo-, okoˈdmúóllá, in máá kamúrutká hátlé giri héllé kinaal gaa seseenká in úba el me hí ˈgiidha.

¹² Máá hé héf ˈguo-, farguogoká ˈdaalleka mé ki chirsatká hé Waag hí ˈdú ˈguunuanne. ˈDaa giri mu héél mé ki chirte-, yíé gaa ˈdieká, mú luolmit biiyo-, Waag gál hí gielká hí af iđicheká Waag haí shigicha.

¹³ Har máádhat hé mákárta-, ˈdeewká hí ladhdheka, hai kieye, Waago ye hé ˈdeew kinaallá mé ki kokoyyo, yéen, ˈdaa giri Waag hé ˈdeew-, hí lalaatká mánká. Waag íín úba hé máá níínní af ˈdú nannasat-, hé ˈdeewká mé ki kokoyyoká mán.

¹⁴ Máádhat íín he feditlé gaa nyakaridheká hí heergisata, hí lalaata.

¹⁵ He feditééllá in seenne, he ekeny ˈdeewká ˈdaalla. Tá he ekeny ˈdeewká máádhat ˈgaaˈgaateka, đo kúfach hai ˈdalle.

¹⁶ Nyaaram chia yú gielallo, haí hol nyimísan.

¹⁷ He lullé shiicho-, gaa ˈdabaan-, midhabká úrro he yé gáá ˈdeˈdeme. Hé shiichóóllá Waag úr édhúmle ká kuonneká he yé gáá ˈdie. Waag hé hát gaach hol gaa mamaˈdóóllá hol ma gaa mamadiny.

¹⁸ Waag hát muun gáál ki feˈdeká in ˈdeeny ˈdúwáállá gáál ˈdalmaat kaanaká gáá shiiche, giri múún he lullé muí les ká koyká ki saanollé erká yegetká.

ˈDeeny Waaˈgiet el gaa igiríti

¹⁹ Nyaaram chia yú gielallo, ˈdeenyééllá mé ka ˈgáa: Máádhat hí gálaat af nee kuokuo, hátlé ˈdéé ma húógonká hí erkob kasso, hí nog siet, hai ál ˈjob gáá iiđídhminy.

²⁰ Idho máádhat hé luolmit saas mán-, Waag hí feˈdoká yé ma ˈdú ˈdeˈdeminy.

²¹ Aaléka, yaalmisano gaa nyakaridheká ubaa ađaabano biiy lulle gaa iđóóllá hol ka ridhdhíe, ˈdeeny Waag hí ger fiiyyééllá hodhin midhabká ki eedhdhíe. ˈDeeny kinaallá in sidhamkícho riima.

²² Haí hol nyimísan, hí hállééllá ˈdéé taalle tákámle nee kokôny, ˈdee héllé hogodhoká eekemeyyíe.

²³ Máá taalle ˈdeeny Waaˈgietallá nee kokuo-, kor ˈdee hátlé yieká he ma gaa ekemenyká, máá kinaallá hát máá innumle síbil ki dhaay-,

²⁴ kor sedheka, yaalmitlé yielká tíkíˈdé kinaal hí gaa baađayyoká.

²⁵ Tá máá ˈdeeny Waaˈgiet-, ˈdúwa-, gáál mé fufuróóllá súm hát ˈdabaanká taalle eiy nannasat-, tá hé maaleká hí in ma ká baađany-, el gaa igiroká, héllé ekemeyoká Waag haí ˈdú ˈgunnuanna.

²⁶ Máádhat har hol máá ˈgíérích Waaˈgiet gaa igiroká ká dhaay-, kor hol ére mé ma dhaˈgaminyka, hollo hol nyiimita, mu ˈgíéríchlé Waaˈgiet gaa igiro kinaallá hé ˈdúúw mán.

²⁷ ˈGíérích ˈdúwa-, Waaˈgiet-, saas mán-, ˈJaa kúnnaa Waag hí fedoká hééllá: um híyeská ubaa ˈdeg híyeská héllé hí ki ˈgierˈgereká ke ˈdú chichirat-, ubaa yaalmit lesallo-, gaa nyakaridheká ke hol gáá faaganayoká.