Títo 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo, gédéch Waaˈgiet. Yú Waago ye máá ali gaa kaany-, Yiesu Kiristoká hoyche, giri gál Waag hí waarateká ki ˈdiyeen-, gaal Kirísto iiy yeget-, ˈdeeny ˈdúwa Waaˈgietallá lulle gaalí hát ˈdabaanká chiirat-, gaal hát Waag hí feˈdoká yíéđianká.

² ˈDeeny ˈdúwáállá ˈdaalleka in Waag gálle hát luolmit biiyoká aargiroká og. Hééllá Waag hátlé les ma ka kúóninyká Waag hí murate, tá Waag hé af ka hódho mán.

³ Tá aleđuđugul Waag hí muˈdeká ali kí ˈdiiyyeká in Waag ˈdeeny luolmit biiyóóllá ká edhesiche. Waag Rúbách kúnnaallá in ˈdeenyééllá ˈdaa hemuritle yú ki ˈdiyeenká ye mé ki koyye.

⁴ Títo, warˈgatééllá kúúni yú ko ˈdu gáá verene. Kuun veel chia yú ko ká dhaˈgama, ˈdaa giri yú ubaa kúún ke Yiesu Kirísto iiy yieká. ˈJaa kúnnaa Waag ubaa Máá kúnnaa Rubachiet Yiesu Kirísto hí ko ˈdú ˈjeeˈjeen, hí ko naanná shiiguo.

Gál Kiristo gál hí met ki ˈgieká hát Waag hí ki feˈdo-, ijoká

⁵ Yú ko Keréte ki hayallá, he giri kuun hújích muun gáál gíl af yé ma gaa ˈdíinyká, hol akaˈd tág ki kokoyyo-, ubaa ˈjien lullé gál Kiristo hí gaa ijoká, karu gál Kiristo met ki ˈgieká, hát yú ko geeyká, les gaa shugunnoká.

⁶ Kársích gál Kiristo mé ki yaalká hí máá gaalí ma ˈdeđensen-, ˈdúwa-, min hí tikiˈde-, umle hí um húgúm midhabká ˈguoká onnow. Mú umle hai um gálaat met ma gaa kekeminy-, kóóros-, gálaat hí ˈdeđensetká onnôny.

⁷ ˈDaa giri gál Kiristo máállé méteká hújích Waaˈgiet mé ki yaalká, mu hí máá gálaat hí ma ˈdeđensenká onnow. Mu hai máá mé gogo-, ídho ˈjób-, bersh hí fafaan-, aˈgere-, már ˈguoká onnôny.

⁸ Mu hí máá gelmeshich-, hé ˈdabaanká gaa fedo-, kás ˈguo-, hugum hí midhab-, saas mán-, hol tatuoká onnow.

⁹ Mu hí fayam Kiristo ˈdúwáállá hát giri gaalí onisieká hát ˈdabaanká ki yaal. Hát kinaallá in mu he onisiny ˈdúwáállá gálaat af ki tataa, tá gál fayam Kiristóóllá fálaam gaa iđimuoká fáláámle hát tagle muuninyká gáál eiy ki nannaa.

¹⁰ Yú hatallá ko geđúóllá he ˈdaa giri biiy gál burnay-, aˈgierˈgere-, ˈdeem met ˈdaraan-, gálaat baađisuoká hí gaa ijoká. Gálallá gúch hí gál gálaat hermisan mé ki tatuoká.

¹¹ Gál hatallóóllá mé il ki súoy, gaal hai kar árginy. Gálallá he gál he onisiny tagle muuninyká é ger gálaat ki baađisuo-, birm hol gaa ˈgeˈgedhoká.

¹² Gálallá máállé ˈdaallé mare úba hatallá he yie, kieye, Gál Kerete taalle he gál hođomlé-, đányar-, ma heyiminy-, he ma urinyká, he yie.

¹³ Hé máá kinaallá hí hodhééllá hé ˈdúwa. Aaléka, gál hatallóóllá il gíl gaa hélish, gáál hát ˈdabaanká af taʼ, giri gaal Fayam Midhab Kiristóóllá ˈgíéríchlé leđuđugulleká nannaat-,

¹⁴ gaal hibano gál Yuuˈdi hí hol af tág ki koyká ubaa hemuumurit gál ˈdeeny ˈdúwaká hol gaa sormosuoká hí mureká nee ma kokonyká.

¹⁵ Gál saas mánká hé he lulle hí saas ki mán, tá gál iiy yeen mán-, gaa nyakarichká hé hé níínní hí saas ki mánká mán. Hééllá ˈdaa giri gáál kasle ubaa tawunyle íín gaa nyakaridheká.

¹⁶ Gaal hát he yegetká kieye, nyáá nyí Waag ógo he yegedhe, kor gaal héllé ekemeyóóllá, gálle he gál Waag muogká. Gaal he gál hé Waag hí nébká ekemeyo-, gálaat met ma gaa kekeminy-, hé midhabká ekenyle uritle mánká.