Tímote Erká 5 - Fayam Midhab Yiesu Kiristoká He Hol Af Iđiny Kaanaká

ˈDeg híyeská ubaa káru atimlé

¹ Karu yaabká ha ki lolódhminy, ˈgóó íl onnônyka ˈjaakú ki gogofsichoká ki guogófsish. Gál yááb rúóreká nyaaramkú ka dháash, guogófsish.

² ˈDeg káruká hát eekú ki sí, gál ˈdiet rúóreká nyaaramkú ka dháash, gáál hát saas mantiká hol hursam gaa yíéđía, guogófsish.

³ ˈDeg híyes-, gálaat mánká gil ki heegélmish.

⁴ Tá min hiyesidheká har um ˈgayyoka, héétí har um maníta, tá um umle ˈgayyoka, um kinaallá er hí é gerle hát ˈduwantiká ki seeseen, um hí gál hí ˈdaleká ubaa eshimle waawayo, wanylé gaalí wayká eumle hidho. Hé kinaallá innum Waaˈgietka hé tagléká.

⁵ Min hiyesidhe-, gál hí wawayo-, mán-, ˈdúwaká Waago he bala ˈdú niiyye, kulich ubaa chúúrélle Waago gil ki egefiyya, vivisata.

⁶ Tá min hiyesidhe-, he fedit lesalloká tákámle mé higilsichoká har úba káána les ˈdug ˈdú iđoka, hé kuyye.

⁷ Atimééllá gáál af ki táátaʼ, giri gáál gaalí ma ˈdeđensenká.

⁸ Tá máá gálle ma wawany-, héétí súm ˈbíl geerle ma wawanyká iiy yeenlé Kirísto iiy yieká he điidhe. Máá hatallóóllá hé máá Kirísto iiy ma yéenká ˈdú ˈdeew.

⁹ Min hiyesidhe-, warram hí tomonaam le ˈdoyye-, tá hátle bélle ma ˈdú buráanyká, túóy ˈdeg híyes-, gál Kiristo hí ki yaalká gaa káab.

¹⁰ Héétí, min hiyesidhe-, túóy kinaal higilloká hí min húgúmle midhantle gálaat hí óg-, umle kuol kaayye-, dheeg geelneyye-, gál Kiristoká ˈgas ˈjiˈjiyye-, gál maanyjayká geer hí shâw ˈdú yegie-, tá hé ˈdabaan-, met hí hol ká burnayká ekenyle hol ˈdú silmicheká onnoyyo.

¹¹ Tá ˈdeg híyes-, rúóreká ha túóy kinaal gaa kôny, ˈdaa giri gáál gónle mé ˈdú yíéđiny hí ká adhateka, een hí mé ká hilleka, gaal hújích Kirísto ki nannieká ali hai kokoo.

¹² ˈDég hatallá ˈdiiyyeka, in ˈdéént kaata, ˈdaa giri gaal he af iđinylé kissoká el ˈgiteká.

¹³ Héétí ˈdeg hatallóóllá túóy kinaal hilleka, húgúm gálle he ma urinyká hai oonooto, ˈjienno hol ˈgas ki higilla. Gaal hé hééllá tákámle ma ekemeny, gaal gálaat úba hai heengʼeedhe, ˈdeemano ma lilenyká hursam hai higila, gaal hé onnônyka ma hogonká hai hogodho.

¹⁴ Aaléka, hát yú fedoká, ˈdeg híyes-, rúóreká hí shuunat, hí umle kuol kaayo, hí é gerle tág ki ˈgiiyyo, giri kídhích kúnnaa Sátanléká kar ma aargiriny-, muun gáál ma eeshenyká.

¹⁵ Hééllá ˈdaa giri ˈdeg híyes-, rúóreká ˈbaal kis hol naate-, Sátan el gaa veeˈdeká.

¹⁶ Min Kirísto iiy chieká har ˈdeg hollé-, híyeská ˈgayyoka, hí ˈdeg kinaallá chirat, waawaycho, hai ˈdég ilshle gál Kiristo ˈdú hâny. Gál Kiristo íín hí ˈdeg híyes-, gálaat mánká kuol gaa chiichirat, waawayo.

¹⁷ Karu Kiristo-, gál Kiristo hát ˈdabaanká met ki ˈgie-, tá súm gál ˈdeeny Waaˈgiet ˈdiiyiminyle ubaa he onisinyle hol ˈdú bieká, gaalí súm gielmít hol ˈdú naannuo, gaalí hújíchle símísle shiiguo.

¹⁸ Hééllá he ˈdaa giri Warˈgat Waaˈgiet kieye, Ány yíerká he đuore ˈdug gaa seseen-, ˈguom ubaa metle hol eiy yé gaa ˈdeđuoka, haí af gaa hîn, hí he kóony ka rían, chieká. Héétí, Máá hujich nannuoká símísle gaalí hol ˈdú naanuo, úba chieká.

¹⁹ Máá kársích Kiristo héllé mákárta-, kerka ˈdeeneyká ko ká geđuoká, ha af nee kôny, ˈdaab gáál naam-, muuninyka, gáál seđ-, hé muí ˈdeeney kinaallá il ma ki árginy-, ko ma ˈdu gáá sînká.

²⁰ Tá gál atím điidhe-, ađááb gaa seseenká, ˈdeentle gálaat met gaa gééđish, giri gálatí sierm hí fafaan-, ađááb ma higilinyká.

²¹ Waag ubaa Yiesu Kirísto tá gál ˈgasso-, urru-, Waag hí waarateká metleka, ha yú ko geey, atim yú ko atíéllá tág chíro, ha gálaat hol eiy gaa nannîny, ˈbaal tírtir ˈdú kokôny, gálatí hélle mé yuyûny.

²² Har máádhat gúch kokoyyoka, ha đo horórt ki ˈjíiny, gil ˈdú fíiny. Héétí, ađaabano gálaat hí gaa seseenká ha híliny, hol saas ka río.

²³ Ha bie tákámle igíminy, ˈdaa geerkú ubaa ˈdaa gón ko chegeskáka, ˈduuny vinnaʼ hé nigini mare úba iigímo.

²⁴ Gáál ˈdáá tikiˈd ađaabanolle hé kaany mán, kúlích ˈdéé ki iđinyká hátlé ali ma kí ˈdíinyká hé gálaat hí óg. Tá gáál ˈbáál íín ađaabanolle erenyo he gaa iđa, kúlích ˈdéé ki iđiny kinaallá yé hai ká ˈdeenne.

²⁵ Hát tikiˈde kinaallá he ekeny midhabká hé kaany mán, tá har úba káána kaany gaa iđoka, hé ma ereminy, yé hai ká ˈdeenne.