Tímote Erká 3 - Fayam Midhab Yiesu Kiristoká He Hol Af Iđiny Kaanaká

Gál gál Kiristo ˈdeˈdeenká atimlé

¹ ˈDéé hót ˈdúwaká he kieye, máádhat har máá gál Kiristo ˈdeˈdeenká yegetká fedoka, mu hújích midhabká he fede.

² Aaléka, máá gál Kiristo ˈdeˈdeenká hí máá ˈdeensen mán-, min hí tikiˈde-, hol tím ˈguo-, me hí bire-, siríg ˈguo-, dheeg mé guđáan yeget-, héétí hí máá hát ˈdaalimietká gálaat he oonisuoká onnow.

³ Mu hai máá bersh súm igianká onnôny, hai máá aˈgereká onnôny, hí máá abunaʼ-, af ka shalal mán-, birm ma geelnenyká onnow.

⁴ Mu hí ˈbíl geerle tág chirat, umle hí met gaa keekeen, um hí húgúm midhabká ˈguo.

⁵ Máádhat har ˈbíl geerle tág chiranle hí ká adhateka, mu háteeye gál ˈbíl geer Waaˈgiet ˈdeˈdeme?

⁶ Mu hai máá Kirísto ˈjobintééllá iiy gaa yieká onnôny. Máá hatallóóllá gaalí gál Kiristo met gaa koyka, kálmaréél máá ˈdúwaká hollo hol ká dhaˈgama, ˈdéé ki iđiny Waag hí Sátan ki iđimichóóllá úba Waag haí ki iđimicha.

⁷ Héétí mu hí máá gál Kirísto iiy ma yéenká úba hí máá midhabká ka dhaˈgasanká onnow. Mu har máá hatallóóllá ma ká yaalinyka, kálmaréél ha gaalí ˈdeđente, naar Satan af les hai gaa ˈdarama.

Gede ˈbíl geer Waaˈgiet atimlé

⁸ Gede ˈbíl geer Waaˈgiet úba hí hát tikiˈde kinaallá gál siríg ˈguoká onnow. Hai gál af hí nanama-, bersham súm igian-, hát tag ki ˈdimiká he ki aargiroká onnôny.

⁹ Gaal hí fayam Waag hí geerle ká ˈgayye-, káána ke iiy yíéllá chirat, hí hé óg-, ˈduuˈdúwaká eekemeyo.

¹⁰ Aaléka gáál erkob gál Kiristo hí hát ˈdabaanká dhaayo, hí eiy naasat, tá gaal har gál ˈdeensen mánká kátaka, gáál gaalí gede ˈbíl geer Waaˈgiet hoyo.

¹¹ Hát tikiˈdééllá ˈdég íín hí ˈdeg siríg ˈgayyoká onnoyyo, hai ˈdeg gálaat heengʼeetoká onnôny, hí ˈdeg hol tatiyyo-, he lulle hát ˈduwantiká ekemeychoká onnoyyo.

¹² Gede ˈbíl geer Waaˈgiet hí gál ˈdeg hí taata-, ˈdegle ma ˈdú buruminy-, umle ubaa é gerle tág chichiratká onnow.

¹³ Gede ˈbíl geer Waaˈgietallá har hujichaamle hát ˈdabaanká nieka, in gálaat hí gál ˈdúwaká ká dhaˈgama, héétí gaal iiy yeen Yiesu Kirísto ka ˈguoká úba hai gaa gofomo.

Fayam ˈdúwa-, Waaˈgietká

¹⁴ Yú ko ál ˈjob ˈdu gáá yiimetká fede, tá kálmaréél yú ko ál ˈjob ma gáá hilinyka, hééllá yú ko ˈdu gáá veere,

¹⁵ giri gál ˈbíl geer Waaˈgiet húgúmlé ki ijoká kuuní ógká. Gál ˈbíl geer Waaˈgietallá he Waag bííyyo ali iđoká gállé. Gálallá hát ˈbíl áár, gaal hé ˈdúwa-, Waaˈgietká he úr ki chichiˈda.

¹⁶ Hé fálaam mánká he kieye, Waag héllé geer geđi-, káána ke ógallá ebá guđáan! Kirísto hé gon kaadhdhe, lésallá ki ˈdalidhe. Hím Naasan Waaˈgiet hé mú ˈduuwle ká edhesiche. Mu hé gál ˈgasso-, urruká hí arge. Mu hé gaalí kidhano hurt gaa ˈdiiyime. Mu hé gaalí lésallá iiy gaa yie. Héétí hé Waag hí guchlé uratiká mé ki niiyye.