Róóma 7 - Fayam Midhab Yiesu Kiristoká He Hol Af Iđiny Kaanaká

Hemuumurit Waag hí gál Yuuˈdi ká shiicheká gim yé gáá ˈdími

¹ Nyaaramchú, yú it halúg hí gál Yuuˈdi-, hí hemuumurít ógallá hí geđia. Hemuumurít hát máádhat hátlé mé waanich hí ˈdaraanká he ki mumuˈdoká it óg.

² Hemurít tikiˈd kieye, máá ˈdiet gaalí eedhdheka, béllé hí eedhdhe kinaallá ˈdaab hátlé les ˈdug ˈdú ijoká hílle, he chie. Tá min bélle har guraam hí guureka, hé hemurit kinaallá gim yé gáá ˈdiiyye. Har feˈdoká egeetoká hé uˈdo.

³ Aaléka, min hátlé bélle mé waanich hí ˈdaraanká eetká, min kinaallá béllé he ˈdú hergiche, gaalí yeedhe. Tá bélle guraam hí guure-, máá eiy hí eedhdheka, af kinaalka hé hemurít hí ˈgas ma egeny, bééllo ˈdú hergiche, hé máá hí yegetká mán.

⁴ Aaléka, nyaaramchú, itín úba af giri hí gón Kiristo hol ˈdú faanne-, hí Kirísto hol ˈgar kuyyeká, it hemuumurit Waag hí gál Yuuˈdi ka shiichééllá gim yé gáá ˈdiiyye. Aalé káánaka, it Kirísto Waag hí loolnoyche-, hí uushich yé gáá ˈdeeycheká gálle chie, giri hé midhab Waag hí feˈdoká saanolle muun gáál yé gáá ˈdeˈdeenká.

⁵ Muun af giri yaalmit kúnnaa hele-, ke ki ijeká gónkúnno balt gaa nyakaridheká hí gaa iđe. Hemuumuritééllá in súm baltééllá gáál gaa verenne, giri hé ˈdeđew-, Waag hí ma fedinyká saanolle muun gáál yé gáá ˈdeˈdeme-, gáál kúfach mé ki kokoyká.

⁶ Aalé ˈdaa giri ke hemuumurit gáál hiigitééllá gim yé gáá ˈdie-, hemuumurít geđi muun gáál he ma ki mumurinyallá, muun káána ke gede Waaˈgiet-, iđiny kaanaká ki ijo-, Hím Naasan Waaˈgiet hí gaa iđo-, hí af tatiyyoká. Iđiny kúnnaa kaanáállá hé hát iđiny héle ke ki ije-, múúnalle ke hemuumurit gaalí veerééllá gim gaa ijeká muuniny.

Hemuumurít hé midhab, kor hé hát níínní gáál ađaabano gim yé gáá ˈdeeychoká mán

⁷ Aalé háte ke yeedhe? Hemuumurít káána he ađáábo ke yeedhe? Híʼi, hemuumurít gon hé ađááb muuniny. Biiy héle hemuumurít mannânyka, yáá onnônyka hé Waag hí ma fedinyká ma kiimísan. Hát káána hemurit kieye, ha hé gálaat gajaltle ˈgíiny, chieká mannânyka, yáá onnônyka gajált hát Waag hí ma fedinyká eiy ma náásan.

⁸ Tá hemurit kinaallá in ađááb kar shiiche, ađááb he met lulle gajaltle ye mé ki koyye. Biiy hemuumurít mannânyka, ađaabano hé onnônyka farguoginsam mannay.

⁹ Kíssóótíá yáá hemuumurít moonnoy. Tá af giri yú hemuumurít eiy naateká, in ađááb ye ˈgaaˈgaate,

¹⁰ ye chies. Hemuumurit yú onnoy-, kerka rubach ˈgayyeká ta kúfacho he ˈgayya.

¹¹ Hemuumuritééllá ííni ađááb kar shiiche, ađááb ye nyimisate, ye hemuumurít ki chies.

¹² Hemuumurit Waag hí gál Yuuˈdi ka shiichééllá íín hé ˈdúwa-, saas mán-, tagléká.

¹³ Aaléka, hemuumurit midhaballá, in hé ye kúfach mé ki kokoyyokâ? Híʼi, hé gon hát kinaallá muuniny. Ađáábo in ye kúfach mé ki koyye, ye hemuumurit midhaballá ki chies. Aalé ˈdaa giri ađááb ye hemuumurit midhaballá ki chieská in káána ađááb hát tág ˈdeewká ke eiy naate.

¹⁴ Hemuumuritééllá hát Waag yé gáá ˈdiiyyeká hé ki óg. Tá kálmaréélka yú yaalmit chia héle kissoká hátle ki íđinyka, af kinaalka yaalmitchú hééllá: yú he ađááb gédéchlé.

¹⁵ Hé yú ekemeyóóllá yáá af ˈdabe. Yú máá máre? Yáá hé midhab-, onnônyka ekemeyoká ma ekemeny-, hé néb-, onnônyka ma ekemenyká ekemeyóol!

¹⁶ Aaléka hé yú ma fediny-, onnônyka yú ma ekemenyká yú ekemeyoka, af kinaalka hemuumurít hát taglé-, yú íín he ˈdeeneyká yáá iiy yie.

¹⁷ Aalé hé ˈdeđew-, yú ekemeyóóllá hé yú dhúrchú hí ma ká mumuran, he ađaabano ye gaa iđóóllá hí ye mé ki kokoyyo.

¹⁸ Hát hé níínní midhab-, ye gaa ijo-, mánká yáá óg. Yú hé ˈdúwaká ekemeyoká fede, kor fargogint hé kinaal ki ekemeyoká yáá mán.

¹⁹ Yú hé midhabká ekemeyoká fede, kor he má ekemeyo. Héétí yáá hé ˈdeđewká ekemeyoká ma fediny, in geđi he ekemeye.

²⁰ Aalé har hé yú ma fedinyká yú ekemeyoka, yáá hé kinaallá dhúrchú hol ma kí mumuran, he ađaabano ye gaa iđoká hí ye mé ki kokoyyo.

²¹ Yaalmit chia kinaal hé yú gaa kimiteká, he af giri yú hé midhabká ekemeyoká fedoká, in hé kinaal afle yú hé ˈdeđewká ekemeye.

²² Hemuumurit Waaˈgiet kaschúka yáá tág giel,

²³ tá yáá hemuumurit éíy taaka gón chiallá gaa iđo-, ubaa kaschú hol oosó-, ye a mé kí ˈjeˈjeennoká hol ki shuunne. Hé kinaallá he ađaabano hemuumuritle gón chiallá gaa iđóóllá.

²⁴ E yaalmit chiallá ebá ˈdéen! Mááya ye gón kufachietallá gaa riima?

²⁵ Gón kufachietallá máá hí ye gaa ririanká he Máá kúnnaa Guđo Yiesu Kirísto! Aaléka, kí Waag gielmít hol ˈdú nuo! Aalé it yaalmit chia kissoká argiyye. Kaschú íín hemuumurit Waaˈgiet ki tielleká he feˈde, tá ˈdaa giri yú ađaabano gim gaa ijeká in yú ađaabano hemuumuritle af ˈduuwasie.