Róóma 4 - Fayam Midhab Yiesu Kiristoká He Hol Af Iđiny Kaanaká

Abirááyam iiy yeenle ˈdaalleka Waag hí máá ˈdúwaká chie

¹ Aaléka, eshi eshim kúnnaa gál kúnnaa Yuuˈdííllá hí yé gáá ˈdie-, Abirááyam lééllá ˈdaalleka, kor háteeye?

² Har Abirááyam héllé eekemeyká ˈdaalle ˈdugaka Waag hí máá ˈdúwaká chieka, af kinaalka onnônyka hé hé hol ki memeyká ˈgie. Tá Waag hé hé kinaallá ˈdaalle ˈdugaka mú máá ˈdúwaká ma chéen.

³ Warˈgat Waaˈgiet hát he chieká kieye, Abirááyam Waag iiy yie, iiy yeenlé kinaallá ˈdaalle ˈdugaka in Waag hí máá ˈdúwaká chie.

⁴ Aalé máádhat hujich nieka, héllé he hújích kinaallá gaa aargiroká hé hé halleello-, gaalí mú shieká muuniny, he hújích muí nieká símíslé gaalí mú hol ˈdú nannaa.

⁵ Tá máádhat hé hújíchlé nieká ˈdaalle ˈdugaka Waag hí máá ˈdúwaká ma chegen. He ˈdaa mu Waag iiy yieká in Waag mú máá ˈdúwaká chegedhe. Waag íín gál ađaabano ˈguo-, tá hí iiy yieká ađaabano gaa egeyye, gáál gál ˈdúwaká hođicha.

⁶ ˈDáwuˈd hé úba gál ˈdaa héllé eekemeyká muuninyká Waag hí gál ˈdúwaká ki chieká hélle hodhe. Mu gálallá hát Waag hí ˈdú ˈjiiyyeká úba hodhe, kieye,

⁷ Gál Waag hí ađaabano gaa eeyye-, ađaabanollé kinaal Waag hí gíl sug ki haychéél, ebá Waag hí ˈdú ˈjiiy!

⁸ Máá ađaabanolle Waag hí ali gaa huolleká, ebá Waag hí ˈdú ˈjiiy! ˈDáwuˈd hí yie.

⁹ ˈDúˈjím Waaˈgietallá gál hermisat-, Yuuˈdííllá ˈdaalle tákáma ki taallaa? Ebá hé kidh ma hermisanká ˈdaalle úba ki taal? Warˈgat Waaˈgiet kieye, Abirááyam Waag iiy yie, iiy yeenlé kinaallá ˈdaalle ˈdugaka in Waag hí máá ˈdúwaká chie.

¹⁰ Aaléka, Abirááyam amáre Waag hí máá ˈdúwaká chie? He af giri mu hátle ma hermísankaa? Ebá he af giri mu hermiteká tá el ˈdaal mú Waag hí máá ˈdúwaká chie? He hé af giri mu hátle ma hermísanká muuniny?

¹¹ Aalé mu hermite. Hedh kinaallá hélle kieye, mu hátlé ma hermísanká mú iiy yeenle ˈdaalle ˈdugaka mú Waag hí máá ˈdúwaká chie. Aaléka, mu hé gál ma hermísan-, kor Waag iiy yieká lulle ˈjaalle yie, giri gál kinaallá úba Waag hí gál ˈdúwaká chegetoká.

¹² Eshi eshim kúnnaa Abirááyam íín úba gál hermisat-, Kirísto iiy yíéllá ˈjaallé. Gálallá he gál Yuuˈdi iiy yeen Abirááyam íín hátlé ma hermísanká hí ˈgieká ˈguoká.

¹³ He af iđiny Abirááyam ubaa ˈbíl ílle Waag hí af iđiche-, giri gaal lésal liiletkáka hé hemuumurít ˈdaalle yé ma kí ˈdíiny, he ˈdaa giri mu Waag iiy yieká ˈdaallé he yé kí ˈdie. Aalé mú Waag iiy yeenlééllá, in Waag mú máá ˈdúwaká chie.

¹⁴ Tá gál hemuumurít el gaa igiro-, kor iiy yeen mánká har gál af iđiny Waaˈgiet aargiroká kátaka, af kinaalka iiy yeen hé ˈdúúw mán, he af iđiny Waaˈgiet úba hé kátaká mán.

¹⁵ Hemuumurít ˈdeeneny in máádhat idho Waaˈgiet ubaa he il ká argisinyle gim gaa iđimicha. Tá hemuumurít mannânyka, af kinaalka biiy hé hemuumurít ˈdeeneny mán.

¹⁶ Aaléka, he af iđiny Waag hí Abirááyam af iđiche kinaallá iiy yeen ˈdaallé he ká nannaata. He af iđinyééllá ˈdúˈjím Waaˈgieto he yé gáá ˈdeˈdeenne. He af iđinyééllá hé gál Waag hí hemuumurít ka shiicheká tákámle hí ma lileny, gál iiy yeen Abirááyam hí ˈgieká ˈgúóllá úba haí aargira, ˈdaa giri Abirááyam gál Waag iiy yegetká lulle ˈjaalléká.

¹⁷ Hééllá he hé Warˈgat Waaˈgiet hí hote-, giri Waag Abirááyam geeyche-, kieye, Yú é meet burnayyeká ˈjaallé ko hođia, mú chieká. Waag Abirááyam hééllá af iđichééllá he Waag tikiˈde gál kufeká luolmít shigicho-, hé kálta biiy ma gaa íđinyká ˈdéé hótle yé kí ˈdeđichóóllá. Aalé Abirááyam Waag iiy yie.

¹⁸ He af iđiny Waag hí Abirááyam af iđiche-, máálle Waag hí é meet burnayyeká ˈjaalle hođichoká chíéllá, har káána úba Abirááyam far ˈdú gogonoyyeka, Abirááyam hé Waag ˈdéé hótle ˈdúúw hote. Waag úba kieye, ˈBíl ílkú burnatle hát ˈdaab hidhinóóllá, chie.

¹⁹ Har úba káána bár kinaal Abirááyam vinadhe-, warram hí kúˈd tikiˈd chie-, tawunyleka gón gályaab fargogínt gáá ˈdabe-, héétí Sáára har úba ˈdal mannayye-, vinateka, Abirááyam hé iiy yeenlé hélle Waag hí af iđicheká tág ki yiel.

²⁰ Mu hé ˈdeeny Waag hí af iđichééllá ma ki náan. Mu hé iiy yeenle far ki gogoy, Waag meey, Waag ˈdúúw shie.

²¹ Hé Waag hí mú af iđichééllá, hát Waag fargogint giri hé kinaal ˈduuwasichoká ˈgayyo-, muí ógká, in mu Waag ma ki náan.

²² Mú iiy yeenlééllá ˈdaalle ˈdugaka in Waag mú máá ˈdúwaká chie.

²³ ˈDéé hót Waag hí mú máá ˈdúwaká chíéllá, hé mú ˈdaalle tákámle ma ki taaliny.

²⁴ He múúni giri Waag Máá kúnnaa Guđo Yíésu uushich yé gáá ˈdeeycheká ke iiy yie-, Waag múún gáál gál ˈdúwaká chegetóóllá hé úba ˈdaakúnno ki taal.

²⁵ Waag Yíésu ká silliche-, gálaat gíl geer gaa kaayye-, gálaat mú yiesallá, he giri mu ađaabanokúnno gáál gáá bibisuoká. Héétí Waag geđi mú loonoyche-, mú uushich yé gáá ˈdeeychééllá, he giri mu múún gáál innum Waaˈgiet gaa ˈduuwasuoká.