Róóma 2 - Fayam Midhab Yiesu Kiristoká He Hol Af Iđiny Kaanaká

Waag gálaat ˈdéé ki iđinylé ˈduwantiká

¹ It halúg gálaat ˈdeđensetéel, itín hát níínní hí hol ˈdéé ˈdú hogotoká mán, ˈdaa giri it tikiˈde hí gáál ˈdeđensetééllá hí hé tikiˈde gaal íín hí ekemeyóóllá úba hí ekemeychóóllá. Af giri hí gálaat hatal ˈdeđensetoká itín dhúr kíchia hí hol ˈdéé ki iđiny Waaˈgiet ˈdú gáá egeyye.

² Waag ˈdéé ki iđinylé gál hééllá ekemeyoká ki iđimichoká hát ˈdúwaká hé ke óg.

³ Aaléka, it hí gálaat ˈdeđensete-, kor hé gaalí ekemeyo kinaal úba hí ekemeychóol! Hí tawuyyeká itínka Waag ˈdéé ki iđinyle met karro hí gaa ˈdaraanna?

⁴ Bá he taalle Waag geer guuralle ubaa nog ki sienle, tá geer gaa guchlé guđo-, hí itín aargisichóóllá hí egesheyche? Mú geer guuralle hát hí af tatiyyo-, giri hí hé kíchia ˈdeđewká haađicha-, tá hí mú makan fafaannaká it eiy ma náásan?

⁵ Aaléka, ˈdaa giri hí met ki guogo-, hí hé kíchia ˈdeđewká ma haađinykáka, in hí Waag kúlíchlé gálaat ˈdéé ki iđimicho-, gálaat he il ká aargisichoká ali kí ˈdeennoká idhollé hí áár kaate.

⁶ Kúlích kinaallá in Waag máádhat héllé he eekemeyká ˈdáble he ki shigicha.

⁷ Gál hé midhabká ekemeyo-, giri aadh ˈdaatika Waag hí meeycho-, muí gál ˈdúwaká yeget-, gón ma kufuminyká muí shiguoká, luolmit biiyoká Waag haí shigicha.

⁸ Tá gál giri tákámle he hol ki fedo-, hé ˈdúwaká điđidhan-, hé ˈdeđewká el gaa igiroká, Waag idholle ubaa Waag he il ká argisinyle hai aargira.

⁹ Ameeny máá hé ˈdeđewká gaa seseenká manyjasiny ubaa gon bólo il haí aargiˈda. Hééllá erkob gál Yuuˈdi il hí aargiˈda, el gaa igíˈdelle gál gál Yuuˈdi muuninyká il hí aargiˈda.

¹⁰ Tá ameeny máá hé midhabká ekemeyoká Waag haí meeyche, máá ˈdúwaká Waag haí cheedhe, naanná ha muí shigia. Hééllá erkob gál Yuuˈdi hí aargira, el gaa igíˈdelle gál gál Yuuˈdi muuninyká úba hí aargira.

¹¹ Waag hé gálaat ˈdug ma gáá dhaˈgaminy, gálaat héllé ger ka ˈguoká dhaˈgasanna, in gálaat hát ˈduwantiká ˈdéé ki iđimicha.

¹² Gál hemuumurit Waag hí gál Yuuˈdi shiicheká muog-, hé ˈdeđewká gaa seseenká, úba káána hemuumurít moonnônyka, sidhamle hai baađaa. Tá gál hemuumurit Waag hí gál Yuuˈdi shiicheká óg-, kor hé ˈdeđewká gaa seseen-, hemuumurit kinaal ˈdeđeneyoká Waag ˈdéé haí ki iđimicha.

¹³ Aaléka, gál hemuumurit kinaal mamalo-, kor hemuumurít el ma gaa igirinyká, innum Waaˈgietka hé gál ˈdúwaká muuniny. Tá gál hemuumurit kinaal el gaa igiro-, ekemeyoká in Waag innumleka, Waag hí gál ˈdúwaká chegedhe.

¹⁴ Gál kidhdho-, hemuumurit Waag hí gál Yuuˈdi shiicheká muog-, kor hé midhab-, hemuumurit kinaal hí hogotoká ekemeyoká, gál kinaallá dhúrle hé hemuumurit kinaal hí gaa iđo.

¹⁵ Gálallá húgúmle hemuumurit kinaal hát gaal íín ger gaa iđoká he gálaat ká aargisia. Gáál úba hé kasle hí af tatiyyo. Aalé kúlích gaal Waag met ki ˈdeenká, gaal héllé ˈdeđew-, eekemeyká, tawunyle haí ˈdeđensete, héétí héllé midhab-, eekemeyká, tawunylé kinaal úba he hát midhabká haí geđicha.

¹⁶ Tá kúlích gaal Waag met ki ˈdeen kinaal ali kí ˈdiiyyeka, Waag ˈdaa Yiesu Kiristoka gálaat lulle héllé ger geđiká hai ká eedhesicha, máádhat hát ˈdúwaká hai hogoto, muuninyka, mu hát ˈdúúw muuninyká hai hogoto. Yaalmitééllá he hé ke Fayam Midhab yú hí ki ˈdiyeenallá gaa argeká.

Báulo gál Yuuˈdi hol gál ˈdúwaká ka dhaˈgasanká ˈdeente

¹⁷ It halúg hí gál Yuuˈdi-, hí kerka hí hemuumurit Waag hí shiicheká hát ˈdabaanká ki ˈgiiyya-, hí hol memeyche-, hí Waag gálle hol chegetóol!

¹⁸ It halúg gaalí hemuumurit Waaˈgiet onisie-, hí hát Waag hí feˈdoká óg-, hí hé ˈdúwaká eiy naasanle úba ógal!

¹⁹ It gál Waag muogká gál hí af tatuoká hol hoyche-, ubaa gál kas Waag eiy ki nannasatká mánká hí édhúmle hol hoychéel!

²⁰ Héétí gál đéeská gállé hí af tatuoká hol hoyche-, gál ˈdaa ma lílenká gállé hí he oonisuoká hol hoychéel! It halúg ˈdaalím ubaa ˈdúúw lulle hát hemuumurit Waaˈgiet gaa iđoká ógal!

²¹ Aaléka, itín in hí gálaat he oonisicha háluke, tá háteeye dhúrkícho hí he hol ma oonisiny? It buraa hát ˈdeewká ˈdeentle hí gálaat ki ˈdiyeennééllá, he in haí buruanna?

²² It gálaat geđicha-, hí kieye, haí hol burúminy chegetallá, he in hollo hí hol buruanna? It waagam hódho-, gálaat hí gille tagano ki nieká néballá, he in waagam kinaal énylé gálaat hí gaa vivisatká hí gaa buruanna?

²³ It hemuumurit Waaˈgiet hát hí súm ógká gálaat geđicháal! Hemuumurit Waaˈgiet hí ˈdeđeneychóóllá, hé kinaallá Waago hí egesheyche muuniny?

²⁴ Warˈgat Waaˈgiet hát hoteká, kieye, Húgúmkícho hé Waag méé ˈdeeney, Waag meenyle hé kidh hí chaachare.

²⁵ It gál Yuuˈdííllá, har hí hemuumurit Waaˈgiet ki ˈgiiyyaka, af kinaalka hermisankícho hé ˈdúúw ˈgayyo. Tá har hí hemuumurit Waaˈgiet ma ki ˈgiinyka, af kinaalka hermisankícho hé hermisan kátaká mán.

²⁶ Tá gál gál Yuuˈdi muuniny-, ma heermisanallá hemuumurit Waaˈgiet ki ˈgieka, hé Waag hí hát gálle ma ká dhaˈgaminy?

²⁷ Kidh ma hermisan-, kor hemuumurit Waaˈgiet el gaa igiroká, it Yuuˈdi-, hí heermisato-, hí hemuumurit Waaˈgiet warˈgasamle ˈgayya-, kor hí hemuumurít ˈdeđeneychóóllá haí ˈdeđente.

²⁸ Har káána gál ko ˈdaléél he gál Yuuˈdi káta-, kúún gaal ko hermisieka, hééllá hé ko máá Waaˈgiet ma hođiny.

²⁹ He Waag geer ubaa mé ki sinno in máádhat máá Waaˈgiet hođia. Hermisan ˈdúwaká hé kinaallá. Hermisan ˈdúwáállá hé hemuumurít el gaa igiritle yé ma gáá ˈdeˈdeminy, Hím Naasan Waaˈgiet af maalíti he yé gáá ˈdeˈdeenne. Hermisanééllá gál hí hermisatká gálaat hí memeyoká hé ma fediny, Waag hí memeychoká he fede.