Róóma 16 - Fayam Midhab Yiesu Kiristoká He Hol Af Iđiny Kaanaká

Naa Baulo

¹ Aalé nyaar kúnnaa ˈdúwa-, Fóíbe lééllá, ebá yú hí fayamle shia. Minnééllá gál Kiristo Kenkéra gaa ijoká he hújích Waaˈgiet totom gaa nanniyya.

² Aaléka, ˈdaa giri minnééllá úba he Máá kúnnaa Guđoká máálléká, hát ˈduwantiká mé guđáan yiedhíe, hé hí ki ˈgierˈgereká ˈdú chiichiˈdíe. Minnééllá yú ubaa gál burnayká hé tág nyí yiir gaa chirate.

³ Biríska ubaa Akúla giri nyí hújích Yiesu Kiristo hol ˈgar nanniyyeká ye naa kí yiedhíe.

⁴ Gálallá he gál sidhamle ˈdaachúka sillieká. Yáá tákámchú gáál gielmít hol ma ˈdú nanniny, gál Kiristo kidhdhoká lulle úba hé gáál gielmít hol ˈdú nannuo.

⁵ Gál Kiristo-, gáál ˈbílle hol ˈdú seseenallá úba ye naa kí yiedhíe. Shééléch chia ˈdúwa-, Ebánatos lé-, giri lés Asia erkob Kirísto iiy gaa yieká ye naa kí yiedhíe.

⁶ María giri hí súm hujich kí nanniyyeká ye naa kí yiedhíe.

⁷ Andoroníkos ubaa Yóóniya giri nyaaram chia Yuuˈdi-, gaalí nyí hol ˈgar hiigidheká ye naa kí yiedhíe. Gálallá he gál ye met Kirísto iiy yie-, gál alb fimiká hí súm ógká.

⁸ Shééléch chia ˈdúwa-, Ambiláátos giri Máá kúnnaa Guđo Kirísto el gaa igiróóllá ye naa kí yiedhíe.

⁹ Urbános giri ke hújích Kiristo hol ˈgar nannúóllá, ubaa shééléch chia ˈdúwa-, Sitákus lééllá ye naa kí yeedhíe.

¹⁰ Abéles giri gédéch Kiristo ˈdúwáállá ye naa kí yiedhíe. Gál ˈbíl geer Aristobulu lulle úba ye naa kí yiedhíe.

¹¹ Nyár chia Yuuˈdi-, Heróˈdion ubaa gál ˈbíl geer Narikiso gaa ijo-, Máá Guđo Kirísto ˈdaalle ki ˈgíéllá ye naa kí yiedhíe.

¹² ˈDeg Tirufáína ubaa Tirufóósa lé-, Máá kúnnaa Guđo Kirísto hujich ki nanniyyóóllá ye naa kí yiedhíe. Anso chia Bérsi, úba súm Kirísto hujich ki nanniyyeká ye naa kí yiedhíe.

¹³ Rúfos giri Máá kúnnaa Guđo Kirísto hí hújíchle kí vie-, ˈdúwáállá ubaa ˈjielle ye naa kí yiedhíe. Mú ˈjielle hát ˈjiechú.

¹⁴ Asunkiríte, Félegon, Hérmes, Batiróbas, ubaa Hérmas, tá gál nyaaram-, gál kinaal hol af ijoká úba ye naa kí yiedhíe.

¹⁵ Filólogo, Yúúlia, Néérus ubaa nyaarlé, tá Olúmbas, héétí gál Kiristo-, gál kinaal hol af ijoká lulle ye naa kí yiedhíe.

¹⁶ Hol naa gielmitiká hol naa ki yiegedhíe. Ameeny gál Kiristo lesalloká gaa ijoká hé hí naa ká yie.

Atim biiy el ˈdaˈdká

¹⁷ Nyaaramchú, gillo yú hí ki efe, gál gálaat hol eiy gaa ˈgiˈgidhuo-, hé ˈdaa Kiristoka gaalí oonisieká el ˈgiˈgisat-, hí ˈdaa eiy ki riitisuoká hol ˈdeeˈdeemíe, gaa fagandhíe.

¹⁸ Gál hat kinaalloká hé Máá kúnnaa Guđo Kirísto hújíchle ma nanniny, gaal hé metlé hújíchle nannaa. Gaal ˈdeemano salsaloká ubaa ˈdéé hót he gálaat ki memeyoká he gálaat geđia. Yaalmitééllá in gaalí gál met af gaa guguđoká ki nyiimita.

¹⁹ Hát hí Kirísto hát ˈdabaanká el gaa igiˈdóóllá hé gálaat lulle hí maale. Yaalmit kíchiallá hé tág ye geer gaa meeyche. Hát yú hí gaa fedoká he giri itín hé ˈdúwa-, hí ekemeychoká ˈdaalimle hí ˈgayya-, hí hé ˈdeđewká hol gáá faaganaychoká.

²⁰ Waag naanná ˈgayyoká Sátan ál ˈjob hai gaa ˈdeđeneyche, mú ˈgas metkícho hai gaa igificha. Aaléka, Máá kúnnaa Guđo Yíésu hí ˈdú ˈjeeˈjeen.

²¹ Tímote giri nyí hol hujich ˈgar naniyyóóllá hé hí naa ká yie. Nyaaram chia Yuuˈdiká Lúkios ubaa Yáson, tá Sosibáteros úba hé hí naa ká yie.

²² Tá yáá Máá kúnnaa Guđoká gédéchlé-, warˈgatééllá Báulo kí veere-, Tértiyos lééllá, yáá úba hí naa ká yie.

²³ Gáíyos giri ye mé guđáan yie-, ˈbílle gál Kiristo allóóllá hí hol ˈdu gáá yiimetallá hé hí naa ká yie. Erástos giri ˈjien máállé birm mé ki yaalká ubaa nyár kúnnaa Kowártos hé hí naa ká yie.

²⁴ [Máá kúnnaa Guđo Yiesu Kirísto hí ˈdú ˈjeeˈjeen. Iiy-hí, he hí hát kinaallá yeet.]

²⁵ Aaléka, Waag kí meemeyo! Waag hé Fayam Midhab Kiristo-, yú gálaat ki ˈdiyeenallá ˈdaalleka hí higiraycho. Fayam Midhab Yiesu Kiristóóllá he Waag héllé geer geđi kis ˈgayye-, tá káána ka edhesicheká.

²⁶ Aalé hát warˈgasam gál Waag hí ˈdeem ka shigicheká hí huogodheká ubaa hát Waag bííyyo ali iđóóllá hí muˈdeká, Fayam Midhab Kiristóóllá hé káána gálaat hí kidh lúl mamalsuo, giri gaal Kirísto iiy yeget-, mú el gaa igiroká.

²⁷ Waag ˈdaalím lulle ˈgayyóóllá ˈdaa Yiesu Kiristoka, kí bííyyo ˈdúúw lúl shiiguo. Iiy-hí, he hí hát kinaallá yeet.