Róóma 13 - Fayam Midhab Yiesu Kiristoká He Hol Af Iđiny Kaanaká

Kansimano lesietká kí ˈdúúw shiiguo

¹ Máádhat hí les kansimanolle hemuumuritle el gaa iigiro, ˈdaa giri kansimano lesietallá máá éíy taaka hí gáál shieká mán-, Waag hí gáál shiicheká. Gál les met ki ˈgíéllá Waago hí hujichaam kinaallá met ki koyye.

² Aaléka, máá kansimano lesietká hemuumuritle điidhoká, hát Waag hí muˈdeká he điđidhma. Gál hé kinaal ekemeyoká ínnallé hol Waag ˈdéé ki iđinyle mé ki kokoo.

³ Gál hé ˈdúwaká ekemeyoká hé kansimano hí sierm ma fafiny, gál hé ˈdeđewká ekemeyoká in kansimano siermle ˈgaa. Kúún máá kansimano siermle mánká chegetoká féˈde? Af kinaalka, hé ˈdúwaká eekémesh. Hát kinaallá in gál kansimano ˈgúóllá ko memeye.

⁴ Gál kansimano ˈgúóllá hé Waag hí gedelle hosote, giri gaal hí ˈdeˈdeenká. Tá har hí hé ˈdeđewká ekemeychoka, af kinaalka sierm ˈgáa, ˈdaa giri gaal fargogint gálaat he il ká aargisuoká ˈguoká. Gálallá he gede Waaˈgiet giri gál he ˈdeđeneyoká ˈdéé ki iđimuoká.

⁵ Aaléka, gál kaansúóllá met gaa keekemíe, tá he hé ˈdaa he il ká argisiny kianle tákámle muuniny, he ˈdaa giri hééllá hé taglé onnônyka ki ekemeyoká.

⁶ Hééllá ˈdaalle ˈdugaka, gibíre mangis ki guugusáa. Mangis gállé hí hujich ki nannuo-, gibíre gugusatallá úba he gede Waaˈgiet.

⁷ Hé hemuumurit mangis hí muˈde-, gaalí mangis les ki fafuoká, lúl mangis les ki fáa. Máá mangis gibíre kí shugunoká gibíre gugusatka, mú gibíre shía. Máá kansím ˈguoká ˈdúúw shía, met gaa keekemíe.

Gielmít ˈgany

⁸ Ew hí ˈgayyaká hí tikiˈd tákámle onnoyyo. Hé kinaallá he giri hí hol gielmít aargisichoká. Tá har hí gálaat gielmít aargisichoka, af kinaalka hemuumurit Waaˈgieto hí đuđusicha.

⁹ Hemuumurit hát káána kieye, Haí hol ˈdú burúminy, Ha máádhat chíésiny, Ha buráany, Ha máádhat hélle gajaltle ˈgíiny, héétí hemuumurit éíy taaka úba Waag hí muˈdeká lulle hemurit giri kieye, Máá olkú hát kúún hol gielallá úba géélneb, chieká he geer gaa iđa.

¹⁰ Máá máá olle gielká hé mú ma gáá ˈdeđenen. Hát kinaallá in gielmít hemuumurit Waaˈgiet đuusicha.

Kí hé ˈdeđewká hayo, kí hát Waag hí feˈdoká ká yíéđuo

¹¹ Aaléka, ˈdaa giri báral hát ka beeyyeká hí ógká, ram gaa kée, in banáa. Bár ke Kirísto iiy yieká fag, kúlích muí gáá ˈjeˈjeen-, muí muun gáál gaa ririanká ˈjob.

¹² Chúúre hé ká beeyye, biiy fuan hé ká ˈjobonte. Aaléka, hé ˈdeđew-, gaalí bííy gaa ongʼoˈdeká gaa ekemesetká kí hayo, kí édhum hélle hisat.

¹³ Kí hé midhab-, gaalí bííy kulichká gaa ekemeyoká eekemeyo, ha ke hé ˈdeđew-, hát káána herginy kern mantiká, bersh famíti, herginy gálle hol ma shúúnanká, hé gaa nyakarichká, hol gáá mony mánti, héétí hol oosó, ubaa hinááf ˈgany ha ke ˈgíiny.

¹⁴ Héél afleka, kí Máá Guđo Yiesu Kirísto húgúmle ˈguo, ha ke balt gaa nyakaridhe-, gonnietká tawunyle ˈgíiny.