Róóma 12 - Fayam Midhab Yiesu Kiristoká He Hol Af Iđiny Kaanaká

Suor luol-, Waag geer gaa memeychoká hol hoyyíe

¹ Aaléka, nyaaramchú, gillo yú hí ki efe, ˈdaa giri Waag hí geer guurá argisichééllá, gónkícho hol suor luol-, hé Waag hí feˈdoká ekemeycho-, Waag geer gaa memeychoká Waag ki hoyyíe. ˈGíérích ˈdúwa-, hí Waag ki ˈduuwaychoká hééllá.

² Haí húgúm lesalloká enîny, hol Waag ˈdú hayyíe, Waag hí hol gaa layyo, hí tawuny ˈdúwaká shiicho. Hí hatal ˈdiiyyeka, in Waag he gaa feditlé midhab-, taglé-, mú geer gaa memeychoká hí ekemeyche.

³ Hújích ˈdaakíchoka Waag hí ye mé ki koyye-, yú nannúóllá ˈdaalleka, lulkícho yú hí geeye, ˈduuw hí ma lilenyká haí hékícho hóson, tá ˈdaa iiy yeenkícho ˈdaˈdab Waag hí eiy eiy shiichéélláka, máádhat hí hol hát ˈdabaanká eiy naasat.

⁴ Hát tikiˈde gón máádhat met hí hol ká burnayye-, hujichaam hí hol ká eiyyééllá,

⁵ Kirísto gónle úba hát kinaallá. Múúni ke gál Kiristóóllá he ki gón Kiristo. Hé kinaallá kieye, múún lulkúnno hollo ke hol ki ˈgee.

⁶ Waag hé múún lulkúnno gáál ˈdúˈjiyye, gáál hujichaam eiy eiy ká shiiche. Hujichaamééllá uritlé ke ki nannuoká he hé shiicho-, Waag hí gálle ka shigichoká. Máádhat héllé shiicho-, Waag hí shiicheká har ˈdeeny Waag hí ká shigichoká ˈdiiyiminy kátaka, hí iiy yeen he Kirísto ká ˈguoká ˈdaalle ki ˈdiiyeen.

⁷ Mu har héllé shiichoká gálaat ˈdúˈjím kátaka, hí gálaat hát ˈdabaanká ˈdú ˈjeeˈjeen, har héllé shiichoká gálaat ˈdeeny Waaˈgiet onisiny kátaka, hí gálaat hát ˈdabaanká he oonisuo.

⁸ Mu har héllé shiichoká gálaat guofsiny kátaka, hí gálaat ˈdaa Waaˈgiet ki guogofsuo, har héllé shiichoká gálaat kuol gaa chiran kátaka, hí geer gaa midhánt gálaat he ki shiiguo. Mu har héllé shiichoká gálaat hujichaamle mé ki yaalít kátaka, hí aadh lulle tág yaal, har héllé shiichoká gálaat geer guurá argisiny kátaka, hí hodhin midhabká gálaat ki aargisuo.

Atim gál Kiristo hí ki ijoká

⁹ Gielmitkícho hí gielmit ˈdúwaká onnoyyo. Hé gaa nyakarichká nebedhíe, hé ˈdabaan-, Waag hí feˈdoká ki kuongʼoˈdíe.

¹⁰ Gielmit gálle hol ki ˈdalidheká hol ka ˈgáa, hol súm kiikiadhíe.

¹¹ Gon síg hayyíe, gúóf ˈgáa, hodhinaam gálle hújích Máá kúnnaa Guđoká hát ˈdabaanká nannuoká ˈgáa.

¹² Waag hé hí af iđiche-, hí met egetoká, hát geer gaa meentiká ki esée, manyjany hát lulle il hí aargiˈdoká mé ki chiichirtíe, Waag viivitíe.

¹³ Gál Kiristo he hí ki ˈgierˈgernítaka he shiigía, héétí gáláát hí kí faanká mé guđáan yiegedhíe.

¹⁴ Gál hí maanyjasuoká ˈdú ˈguunumíe, gáál haí ˈdoˈdóriny, Waag hí nyuoˈdo, gáál yiegedhíe.

¹⁵ Gál ger hí gaa meedheká hol ˈgar kosolmíe, gál geer ˈdéént ki ijoká hol ˈgar buoyyíe.

¹⁶ Gálaat hol ki midhanáa. Haí gál gálaat ˈdú ˈdúwaká hol ka dhaˈgáminy, tá gál gaalí gál ˈdúwaká ma ka dhaˈgaminyká úba hol ˈdóo. Haí gál súm ˈdaalle léká hol ka dháany.

¹⁷ Haí hé ˈdeewká héllé ˈdeewká akaˈd madîny. Hol ˈdeeˈdemíe, húgúmkícho hí húgúm innum gálaat gaa midhabká onnow.

¹⁸ Gálaat lúl hát hí uˈdoká hol naanná ki yíéđía.

¹⁹ Sheelchú, haí hala kakáany, Waag idholle kar shiigía, hí hala ká naanniyyo, hát Warˈgat Waaˈgiet hí chie-, kieye, Hala kaany yaa hí le, hí ká nannaa, Máá Guđo Waag hí yie, warˈgát hí chieká.

²⁰ Warˈgat Waaˈgiet úba kieye, Máá ko ka kidhichká geer hí gaa boloyka, golólish, báre hí chieska, bie shíish. Hééllá ekeycheka, he hát kó mú ˈduno booˈdoyká mé ˈdú fiiyye, chieká.

²¹ Aaléka, hé ˈdeđewká haí ka ádhan, tá hé ˈdeđew kinaal hé midhabká eekemenyle kí adhdhíe.