Róóma 10 - Fayam Midhab Yiesu Kiristoká He Hol Af Iđiny Kaanaká

¹ Nyaaramchú, hé geerchú hí fedo-, tá yú Waag ki vivisatká, he giri gál chia Yisirayelallá rubach aargiroká.

² Gaal hát góf he Waag el ki igiroká ˈguoká, yáá tág óg. Tá gaal hát Waag hí feˈdoká hé eiy ma náásan.

³ Gaal hé ˈgíérích Waag hí gálaat gál ˈdúwaká ki chegetoká eiy ma náásan. Gaal ˈgíéríchlé éíy taaka-, kasleka hol innum Waaˈgietka hol gál ˈdúwaká hođuoká he nanadha. Tá ˈdaa giri gaal he ˈgíérích Waag hí feˈdoká iiy ma yéen-, ma náanká, gáál hé Waag hí gál ˈdúwaká ma chegen.

⁴ ˈGíérích Waag hí feˈdóóllá he Kirísto. Af giri Kirísto ka yimieká in hemuumurít bárle me hí ˈgidhe. Aalé káána ameeny gál Kirísto iiy yegetká lulle Waag innumleka gál ˈdúwaká hai yegedhe.

⁵ Móshe hemuumurít el gaa igiritle ubaa máádhat máá ˈdúwaká yegetká ˈdaalleka hé veereká kieye, máádhat hemuumurít lulle el gaa veere-, ˈduwasieka, luolmít hai aargira, he yie.

⁶ Tá gál Waag iiy yie-, iiy yeenlé kinaal hí gál ˈdúwaká hoycheká hai kieye, Mááya úr mé nannaa, Kirísto les ˈdu gáá egedhdhe? yíen.

⁷ Gaal úba hai kieye, Mááya bííy gál kufeká mé nannaa, Kirísto les ˈdug ˈdu gáá egedhdhe? yíen.

⁸ Warˈgat Waaˈgiet kieye, Fayám hé tág ˈjób. Fayamééllá hé agerkícho ubaa gerkícho gaa iđo, he chie. Fayamééllá he iiy yeen ki Kirísto iiy yie-, káána ke gálaat ki ˈdiyeenallá.

⁹ Har kuun afkú ki kieye, Yíésu he Máá chia Guđoká, chie-, tá mú hát Waag hí geđi loolnoyche-, hí uushich yé gáá ˈdeeycheká geerkú úba iiy ki chieka, af kinaalka Waag hai ko rianna.

¹⁰ Aalé máá Yiesu Kirísto geerle iiy ki yeget-, afle he ki hogodho-, kieye, Yiesu Kirísto he Máá chia Guđoká, yegetká in Waag hí máá ˈdúwaká chegedhe, máá kinaallá rubach hai aargira.

¹¹ Hát Warˈgat Waaˈgiet hí hote-, kieye, Ameeny máá mú iiy yeetká, hé innum Waaˈgiet kern hí ma gaa ˈgiˈgin, chieká.

¹² Hééllá ˈdaa gál Yuuˈdi-, ubaa gál gál Yuuˈdi muuniny-, Yiesu Kirísto iiy yieká ˈdaallé he ki yaalla. Gáál Máállé Guđoká íín tikiˈde. Ameeny gál mú veveenká ha muí ˈdú ˈjeeme.

¹³ Aaléka, ameeny gál Máá Guđóóllá veveenká ha muí riima.

¹⁴ Tá gálaat har Máá Guđóóllá móíytaka, háteeye mú veveme, muí ririma? Tá gálaat hátlé mú fayamle ma máálinyká, háteeye mú og, mú iiy yegedhe? Héétí ˈdaab gálaat hí fayam Máá Guđóóllá ma ki ˈdiiyíminyká, háteeye mú fayamle mamala?

¹⁵ Tá gál gálaat ki ˈdiyeenká ˈdaab gaalí alb ma fíinyká háteeye gáál fayamééllá ki ˈdiyime? Hát Warˈgat Waaˈgiet hí hote-, kieye, Gál fayam midhabká hol gaa sisidhoká ebá ˈgas met hí mídhab! chieká.

¹⁶ Tá hé kinaallá hé kieye, gál gaalí Fayam Midhaballá ki ˈdiiyimeká lullé fayám iiy yie muuniny. Hát káána héle Yisááya Waag yiete-, kieye, Máá Guđo, mááya fayam kuun hí ye ká shiiche-, yú gáál ki ˈdiiyimeká iiy yie? yieká.

¹⁷ Aaléka, iiy yeen fayám maalíti he yé gáá ˈdeˈdeenne, fayam kinaallá he Fayam Midhab Kiristóóllá.

¹⁸ Aalé gál Yisirayel hé fayamééllá ma máálinyo ke yeedhe? Híʼi, gaal hé fayám maale. Hát Warˈgat Waaˈgiet hí hote-, kieye, Fayám hé les lulle eiy bash ki chie, ˈdee hé les lulle mé ki ˈdoy, chieká.

¹⁹ Aaléka, gál Yisirayelallá hé fayamééllá eiy ma náásanno ke yeedhe? Híʼi, gaal hé fayám eiy naate, in fayám điidhe. Móshe hé ˈdeeny héle Waag hí gál Yisirayel geeycheká veere, Waag kieye, Itín gál é meenykícho muuninyká hinaafle ha yu hí gaa verene, kídh hí gál đéeská ka dhaˈgasannoká ha yú ˈdú ˈjeeme, idholle haí cheese, Waag hí chie.

²⁰ Héétí Yisááya hé Waag hí hoteká hát sierm mantiká ˈdiiyime, giri Waag kieye, Yú gál ye hol ma gaa ˈgéˈgenká hé ye shuunne, gál ye ma hegésenká yáá hol argisie, chieká.

²¹ Tá ˈdaa gál Yisirayelalláka, Waag úba kieye, Yáá aadh lulle gáál gil ki egefo, giri gaal ye ˈdu gáá yiimetká, kor gaal ˈdaa giri met guogoká hé ye gaa điidhe, he chie.