Róóma 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo, gédéch Yiesu Kiristo-, Waag hí ká viiyye-, hí máállé ali gaa kaanyká hosote-, Waag hí Fayamlé Midhaballá hol gaa sinle mé ki koyyeká.

² Fayam Midhaballá hé kis Waag hí gállé ˈdeem ka shigicheká ká shiiche, gaalí ˈdiiyime, gaalí Warˈgat Waaˈgiet gaa veere.

³ Fayam Midhaballá Waag Inyle ˈdaallé he ki taalla. Inyáállá he máá gón gálaat kaadhdhe-, ˈbíl íl ˈDawuˈd yé gáá ˈdieká.

⁴ Inyáállá Hím Naasanle he Hím Naasan Waaˈgiet. Waag fargogintlé Inyáállá geđi ki loolnoyche, Íny uushich yé gáá ˈdeeyche. Yaalmitééllá in Waag Inyáállá hát Inyléká gáál eiy kí niiyye. Iny Waaˈgietallá he Máá kúnnaa Guđo Yiesu Kirísto.

⁵ Mu íín ˈdaalleka in Waag nyí ˈdúˈjímle ká shiiche, nyí gállé alb fimiká hosote, giri kidh hátlé met hí hol ká eiyyeká nyí Fayam Midhaballá ki ˈdiyeenne-, gaal fayám iiy yeget-, Waag met gaa kekeen-, meeny Kiristo ˈduuwayoká.

⁶ It Roomáállá úba he gál tikiˈde-, Waag hí ká viiyye-, Yiesu Kirísto hí lééllá.

⁷ Warˈgatééllá it Waag hí giel-, Waag hí ká viiyye-, hí gálle hosote-, hí Róóma gaa iđoká yú hí ˈdu gáá veere. ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

Fiirit Báulo hí gál Kiristo Roomaká fiirieká

⁸ Hé erkob yú hogodhoká, lulkícho ˈdaa kíchoka yáá Waagchú gielmít hol ˈdú nannuo. Hééllá he ˈdaa giri hát itín hí Yiesu Kirísto iiy chieká ˈdeenyle biiy lulle bash ki yieká.

⁹ Waag giri yú fargogintchú lulle hujich ki nannuo-, Inyle Fayamlé Midhaballá yú ˈdiyeenallá, hát aadh lulle yú hí kí vivisatká hé óg.

¹⁰ Yáá úba aadh lulle Waag vivisat, giri har Waag hí feˈdoka, Waag ye kar shigicho-, yú hí ál ˈjob af kí ˈdeˈdeenká.

¹¹ Yáá tág hí fiirie, giri yú hí af kí ˈdeˈdeen-, hé shiicho-, Waag Hím Naasanle yé gáá ˈdeˈdeen-, hí fargogínt shiguoká hí aargiˈdaká.

¹² Hát yú fedoká, af giri ke hol af ijoká iiy yeen ke Kirísto iiy yie-, ke ˈgúóllá ke hol ki gogofsuoká yú fede.

¹³ Nyaaramchú, hééllá mé ka gáa, hát yú af burnayká hí ˈdu gáá yiimetká fedo-, kor hát ˈdabe-, ˈjíig káána đigallá. Hé yú fedoká he giri hát tikiˈde yú gáál kidhóótí Fayam Midhab Kiristóóllá ki ˈdiiyime-, gaal Kirísto enníéllá, in úba it Roomáállá yú hí ki ˈdiyeenká yú fede.

¹⁴ Hújích chiallá gál ushúmbaká ubaa gál ushúm muuninyká, tá gál ˈdaalim warˈgasano ˈguoká ubaa gál ˈdaalim warˈgasano mánká ˈdaallé he ki yaalla.

¹⁵ ˈDaa kinaallá ˈdugaka in yú súm gúóf ˈgaa, giri it Róóma gaa iđáállá úba yú hí Fayam Midhab Kiristóóllá ki ˈdiyeenká.

ˈGíérích Waag hí gálaat ki ririannoká

¹⁶ Fayam Midhab Kiristóóllá ˈdugaka kern hé ye ma ˈgiˈgin, ˈdaa giri fayamééllá Waag hí gál Kirísto iiy yegetká lulle ki ririannoká. Fayamééllá erkob gál Yuuˈdi hí maale, tá gál gál Yuuˈdi muuninyká yé ˈdú ˈdiiyye.

¹⁷ Fayam Midhaballá héllé gáál geđichoká he ˈgíérích Waag hí gálaat ki ˈduuwaychoká. ˈGíérích kinaallá he iiy yeen kúnnaa er ke Kirísto iiy yie-, tá taalle ke mú iiy yegetallá tákáma, hát giri káána Warˈgat Waaˈgiet hí hote-, kieye, He ˈdaa iiy yeen máádhat hí Waag iiy yie-, hí ˈgúóllá in Waag mú máá ˈdúwaká chie, mú luolmít shiiche, chieká.

Waag gál hí điidheká he il hai ká aargisicha

¹⁸ Waag hé gálaat geeyche, giri idholle úr gáá haađicho-, gál Waag kian ka mán-, héllé gaa nyakarich-, gaa seseen-, hé ˈdúwaká mé ki yuyuoká lulle ˈdú iđimichoká.

¹⁹ Waag hééllá gáál ki ekemeychóóllá he ˈdaa giri Waag biiy gaa iđinyle ˈduuwle ubaa yaalmitlé kaany mán-, gáál kí edhesicheká gálaat hí gíl sug ki haađuoká.

²⁰ Ameeny Waag les ka kuonneká fargogintlé biiyoká ubaa íín hát he lúl hí ki ijoká lúl hé édh-, kaany mánká tákáma. He met lullé Waag hí ka kuonnééllá in Waag ke il ma ki argirinyallá ˈduuwle gálaat aargisia. Aaléka gálaat Waag ˈduuwle hé hát níínní gaa faalanká mán.

²¹ Har úba gaal Waag óíytaka, gaal mu hát Waagká hé mú ma memeny, mú gielmít hol ma ˈdú nanniny. Gáál hé tawuny hí ˈdeenete, gáál ˈdaalimlé éésh mánnallá hé đéém hí koch chie.

²² Gaal gál ˈdaalle léká hol yegedhe, kor gaal hé đées yie.

²³ Gaal hé Waag bííyyo ali iđo-, ma kufuminyká ˈduuwle hay, hé kufunan-, gaalí yaalmit hát káána gálaat, kimíre, bíne, tá guur tág gaa nieká bala ˈdú nie, waagamle hote.

²⁴ Hééllá ˈdaalle ˈdugaka in gaal héllé fedo-, gaa nyakarichká Waag hí ˈdú hayche, giri gaal babatle el gaa igiro-, hé kern mantiká ekemeyoká.

²⁵ Gaal hé Waag ˈduuwle hé hódhoká in gaa nie. Gaal hé Waag he lúl ka kuonnééllá hay, hé Waag hí ka kuonneká waagamle hote, viivite. Waag les lulle ka kuonnééllá taalle bííyyo gaalí meemeyo. Iiy-hí, he hí hát kinaallá yeet.

²⁶ Gáál Waag hanylééllá, in Waag gáál babat kern mantiká ˈdú hayche. Gáál gállé ˈdietká hé herginy aađaká gíl sug ki hay, íín tákámle hol heergime.

²⁷ Hát tikiˈdééllá gáál gállé yaabká úba hé herginy aađa-, gál ˈdietká gíl sug ki hay, hé babat íín tákámlé yaab-, hol hergisanká hí ˈgaaˈgaate, hé herginy kern manti kinaallá hol ki eekemey. Aalé gaal héllé ˈdeđew-, gaa seseme kinaal ˈdugaka, gaal ínnallé hol gon bólo ki ˈgeˈgedhe.

²⁸ Aalé ˈdaa giri gaal Waag óny hát hé ˈdúwaká ma ká dhaˈgaminy-, ma chichiranká, in Waag gáál kaslé ˈdeenete kinaal ˈdú hayche, hé onnônyka gálaat hí ma ekemenyká ekemeye.

²⁹ Gáál saas ˈgany, ađááb, he hol ki fedíti, hé gaa nyakarichká, gajálti, nyuogich, hol oosó, ubaa hódho, tá điđám hí koch. Gaal gálaato heengʼeedhe,

³⁰ gálaato meet ˈdeđeneye, hé Waag néb, hollo hol chachara, churshámo ˈdoˈdomo, hollo hol memeye, gaal ˈgierim hé ˈdeđewká ki ekemeyoká tagano kokoo, hé gál hí ˈdaleká met ma gaa kekeminy,

³¹ hé kás mán, héllé gálaat af iđimuoká he el ˈgiˈgita, hé gálaat gielmít ka mán, héétí hé gálaat geer guurá ka mán.

³² Har úba káána gaal hemuumurit Waaˈgiet-, giri gál hé hatallóóllá ekemeyoká hát he kufunanká óíytaka, gaal hé hééllá ekenyle tákámle el ma gaa igiriny, gaal gál hééllá ekemeyoká gál ˈdúwa hé ˈdeeney mánká he ká dhaˈgama.